ޖަރުމަނުގެ ލައިޕްޒިގް އެއާޕޯޓަށް ޑްރޯން ބޭނުންކޮށްގެން ދިން ހަމަލާއެއްގެ ފަހަތުގައި ރަޝިއާގެ އަތެއްވާ ކަމަށް ބުނެ ހުޅަނގުގެ ގައުމުތަކުން ކުރާ ތުހުމަތުތަކަކީ، ބޮޑު ހަނގުރާމައެއްގެ ފެށުން ކަމަށް ރަޝިއާގެ ފޮރިން މިނިސްޓަރު ސަރްގޭ ލަވްރޯވް ސިފަކުރައްވައިފި އެވެ.
އާދީއްތަ ދުވަހު ވާހަކަދައްކަވަމުން ލަވްރޯވް ވަނީ ހުޅަނގުން ކުރާ މި ތުހުމަތުތަކަށް ވަރަށް ބޮޑަށް ފާޑުވިދާޅުވެފަ އެވެ.
ޖަރުމަނުގެ ޗާންސެލަރު ފްރެޑްރިކް މާޒްއަށް އިޝާރާތް ކުރައްވައި ލަވްރޯވް ވިދާޅުވީ، ޖަރުމަނަކީ ވިލާތުގެ އެންމެ ވަރުގަދަ އަސްކަރީ ބާރަށް ހެއްދެވުމަށް މާޒް ގެންގުޅުއްވާ ސިޔާސަތުތައް މިހާރު އަމަލީ ގޮތުން ތަންފީޒު ކުރަން ފަށާފައިވާ ކަމަށެވެ. އަދި މާޒްގެ އެ އަމަލުތަކަކީ ހަގީގަތުގައި ރަޝިއާއާ ދެކޮޅަށް ހަނގުރާމަ އިއުލާން ކުރުން ފަދަ ކަމެއްގެ ގޮތުގައި ލަވްރޯވް ސިފަކުރެއްވި އެވެ.
މިދިޔަ މަހު ލައިޕްޒިގް/ހާލޭ އެއާޕޯޓަށް ޑްރޯން ބޭނުންކޮށްގެން ދޭން އުޅުނު ހަމަލާގެ ޒިންމާ އުފުލަންޖެހޭނީ ރަޝިއާ އިން ކަމަށް ނިންމާފައިވާ ކަމަށް ޖަރުމަނު ސަރުކާރުން ސެޕްޓެމްބަރު މަހުގެ 1 ވަނަ ދުވަހު ވަނީ ބުނެފަ އެވެ.
މި ހާދިސާއާ ގުޅިގެން ޖަރުމަނުން ވަނީ ރަޝިއާއާ ދެކޮޅަށް ފިޔަވަޅުތަކެއް އަޅަން ނިންމައި، ބާލިންގައި ހުންނަ ރަޝިއާގެ ކޮންސިއުލޭޓަކާއި ސަގާފީ މަރުކަޒެއް ބަންދުކުރުމަށް އަމުރުކޮށްފަ އެވެ.
ޖަރުމަނުން ކުރާ މި ތުހުމަތުތަކަކީ އެއްވެސް އަސާސެއް ނެތް ދޮގު ތުހުމަތުތަކެއް ކަމަށް ބުނެ ރަޝިއާ އިން ވަނީ އެކަން ދޮގުކޮށްފަ އެވެ. އަދި އެ ހަމަލާގެ އިލްޒާމް ރަޝިއާގެ ބޮލުގައި އެޅުވުމަށްޓަކައި ޖަރުމަނުން ދޮގު ހެކި އުފައްދަމުންދާ ކަމަށް ވެސް ރަޝިއާ އިން ވަނީ ތުހުމަތުކޮށްފަ އެވެ.
