ރެގާރުގެ ފޯކަސް ހުރީ މެޗުގެ ކުރިން މާޒިޔާއާ މެދު ވަކި ވިސްނުމެއް ނުގެންގުޅެން

Aug 11, 2026, 11:22 PM
ގަލޮޅު ދަނޑުގައި މިއަދު މެންދުރު ފަހު ބޭއްވި ނޫސްވެރިންގެ ބައްދަލުވުމުގެ ތެރެއިން ރެގާރުގެ ކޯޗު އަލީޝާ ތުކްތައޭވް ވާހަކަ ދައްކަނީ.--- ފޮޓޯ: އިމޭޖަސް.އެމްވީ / އަދަދު ސްޕޯޓްސް

ގަލޮޅު ދަނޑުގައި މިއަދު މެންދުރު ފަހު ބޭއްވި ނޫސްވެރިންގެ ބައްދަލުވުމުގެ ތެރެއިން ރެގާރުގެ ކޯޗު އަލީޝާ ތުކްތައޭވް ވާހަކަ ދައްކަނީ.--- ފޮޓޯ: އިމޭޖަސް.އެމްވީ / އަދަދު ސްޕޯޓްސް

އޭއެފްސީ ޗެލެންޖު ލީގުގެ ކޮލިފައިން ބުރުގައި، ރާއްޖޭގެ ލީގު ޗެމްޕިއަން، މާޒިޔާ ސްޕޯޓްސް އެންޑް ރެކްރިއޭޝަނާ ދެކޮޅަށް މާދަމާ ހަވީރު ތަޖިކިސްތާންގެ އެފްސީ ރެގާރު ޓަޑާޒުން ނުކުންނާނީ ދޭން ޖެހޭ އިހުތިރާމް ދީގެން ނަތީޖާ ނެރެން ކުރަން ޖެހޭ ހުރިހާ މަސައްކަތެއްގެ ފޯކަސް ދަނޑުމައްޗަށް ދޫކޮށްލުމަށް ކަމަށް އެ ޓީމުގެ ކޯޗު، އަލީޝާ ތުކްތައޭވް ބުނެފި އެވެ. 

 މި މެޗު އެންމެ ފުރަތަމަ ކުޅެން ތާވަލުކޮށްފައި އޮތީ މިއަދު ހަވީރު ގަލޮޅު ދަނޑުގަ އެެވެ. އެކަމަކު، ތަޖިކިސްތާންގެ ކަޕް ޗެމްޕިއަން، ރެގާރު ޓަޑާޒް، ރާއްޖެ އަންނަން ދަތުރު ފަތުރުގެ ކަންކަން ހަމަޖެހުމުގައި، މައްސަލަތަކެއް ދިމާވެ، ރާއްޖެ އާދެވުނީ މިއަދު ހެނދުނެވެ. އެހެންވެ، އޭއެފްސީން ނިންމީ، މެޗު، މާދަމާ ހަވީރަށް ފަސްކުރުމަށެވެ. 

މާދަމާގެ މެޗުގެ ކުރިން މިއަދު ގަލޮޅު ދަނޑުގައި ބޭއްވި ނޫސްވެރިންގެ ބައްދަލުވުމުގައި، ރެގާރުގެ ކޯޗު، ތުކްތައޭވް ބުނީ، ދަތުރު ފަތުރު ދިޔައީ އެންމެ ރަނގަޅަކަށް ނޫން ކަމަށް ވިޔަސް މެޗަށް އެންމެ ރަނގަޅަށް މި ތިބީ ތައްޔާރުވެގެން ކަމަށެވެ. 

"ޓްރެއިނިން ކުރިއަށްގެންދަން އެއް ދުވަސް ވަރު މެޗާ ގާތްކޮށްފައި މި ލިބުނީ. ދެން، ޓްރެއިިނިން ގެންގޮސްފައި މެޗާ މެދު ދެން ގޮތެއް ނިންމަން އެނގޭނީ. (ދަތުރުފަތުރުގައި ދިމާވި މައްސަލަ) މިއީ، ފުޓްބޯޅައިގައި ހިނގާ ކަމެއް. ވާނީ ކީއްކަމެއް ބުނަން ވަރަށް އުނދަގޫވާނެ. އަހަރެމެން މި ތިބީ ތަންކޮޅެއް ލަހުން އާދެވިފައި. އެކަމަކު، އެއީ އުޒުރަކަށް ހަދައިގެން އެ ވާހަކަ ދައްކަން ނެތިން. އަހަރެމެން ވީ އެންމެ ރަނގަޅަށް މަސައްކަތް ކުރާނަން ނަތީޖާ ނެރެން،" ޔުއެފާ ޕްރޯ ލައިސަންސް ހާސިލްކޮށްފައިވާ ކޯޗު، ތުކްތައޭވް ބުންޏެވެ. 

ދިވެހި ޕްރިމިއާ ލީގުގެ ޗެމްޕިއަންކަން ޖެހިޖެހިގެން ފަސް ވަނަ ފަހަރު ހޯދާފައިވާ މާޒިޔާ އަކީ އޭއެފްސީން ޗެލެންޖު ލީގު ތައާރަފްކުރި ފަހުން މި މުބާރާތުގައި ރާއްޖެ ތަމްސީލްކުރި ހަމައެކަނި ޓީމަކީ މާޒިޔާ އެވެ. ފުރަތަމަ އަހަރު ގްރޫޕް ސްޓޭޖުގައި ކުޅުނު ނަމަވެސް މިދިޔަ ސީޒަނުގައި ކޮލިފައިން އިން ކެޓީ އެވެ.

މިދިޔަ އަހަރު ރެގާރު ވަނީ އޭއެފްސީ ޗެލެންޖު ލީގުގެ ގްރޫޕް ސްޓޭޖުގައި ކުޅެފަ އެވެ. އެ ގޮތުން، މިދިޔަ ފަހަރުގެ ކޮލިފައިންގައި މާޒިޔާ ކަޓުވާލުމަށް ފަހު ގްރޫޕް ސްޓޭޖަށް ކޮލިފައިވި ކުވެއިތުގެ އަލް އަރާބީން ވަނީ ގްރޫޕް ސްޓޭޖުގައި ރެގާރު އަތުން 2-1 އިން މޮޅުވެފަ އެވެ. 

ތަޖިކިސްތާން ފުޓްބޯޅައިގައި އެންމެ ފަހުން ކުޅުނު ފަސް މެޗުން ވެސް މޮޅުވި ރެގާރު މި ވަގުތު އޮތީ ރަނގަޅު ފޯމެއްގަ އެވެ. އެކަމަކު، އޭއެފްސީ ޗެެލެންޖު ލީގަށް ނުކުންނައިރު، އެ ޓީމުން ގަބޫލުކުރާ ހަގީގަތަކީ، މި ލެވަލްގެ މުބާރާތްތަކުގައި އެކި އަހަރުތަކުގައި ކުރިމަތިވާ ޗެލެންޖް ތަފާތުވާނެ ކަމެވެ. 

"ކޮންމެ އަހަރަކު ކޮންމެ ޓީމަކަށް ވެސް ތަފާތުކޮށް ތައްޔާރުވެވޭނެ. ޗެމްޕިއަންޝިޕް (ޗެލެންޖް ލީގުގެ) ލެވަލް މަތި ވެސް ވެދާނެ، ދަށް ވެސް ވެދާނެ. އެއީ ދިމާވެދާނެ ކަމެއްގެ މައްޗަށް އޮތް ކަމެއް. އެއް ފަހަރު މުބާރާތުގެ ތަޖުރިބާ އޮތަސް ދެ ވަނަ ފަހަރު އޭގެ ބޭނުންނުހިފިދާނެ. މާޒިޔާ ވެސް ރަނގަޅަށް ތައްޔާރުވިއްޔާ، އެ މީހުން ކުޅޭނެ ރަނގަޅަށް. އެ މީހުންނަށް ތައްޔާރުނުވެވިއްޖިއްޔާ އެކަން ނުވެދާނެ ބޭނުން ގޮތަށް. އެއީ މި ކަހަލަ ގޮތަކަށް އޮތް ކަމެއް،" ތުކްތައޭވް ބުންޏެވެ.  

"މާޒިޔާ އަކީ ވެސް ރަނގަޅު ޓީމެއް، ކޮންމެ ޓީމެއް ވެސް ކުޅޭނީ މޮޅުވާން. ކޮންމެ ޓީމެއް ވެސް އެންމެ ރަނގަޅަށް ދަނޑުމަތީގައި މަސައްކަތްކުރާނެ،" 

މާޒިޔާ ޓީމުގައި ރަނގަޅު ކުޅުންތެރިން އެބަތިބި ކަމަށާއި އޭއެފްސީގައި ކުޅެން ގެންނަ ކުޅުންތެރިން ވެސް ރަަނގަޅުވާނެ ކަމަށް ރެގާރުން ގަބޫލުކުރެ އެވެ. އަދި، "ފުޓްބޯޅައިގައި ވަކި ކުޅުންތެރިއެއް މޮޅޭ، ވަކި ކުޅުންތެރިއެއް ދަށެކޭ ނުބުނެވޭނެ" ކަމަށާއި އެއީ، ކޮންމެ ޓީމެއް ވެސް މެޗުތަކަށް ފުރިހަމަ އަށް ތައްޔާރުވާން މަސައްކަތްކުރާއިރު، އެ ދޭން ޖެހޭ އިހުތިރާމް ދިނުން މުހިންމު ކަމަށް ތުކްތައޭވް ވަނީ ބުނެފަ އެވެ. 

"ދެން، އަހަރެމެން މި ޖެހެނީ ކުރިއަށް މި އޮތް މެޗަށް ރަނގަޅަށް ތައްޔާރުވާން،" ތަޖިކިސްތާންގެ ވަރުގަދަ ޓީމެއް ކަމަށްވާ އިސްތިގްލާލްގައި ވެސް ކޯޗިން މަސައްކަތްކުރި، ގައުމީ ޓީމުގެ ކުރީގެ ކުޅުންތެރިޔާ، ތުކްތައޭވް ބުންޏެވެ. 

އެންމެ ފަހުން އޮތް އޭޝިއަން ކަޕް ކޮލިފައިންގައި ތަޖިިކިސްތާނުން ވަނީ ރާއްޖެ ދެ ފަހަރު ބަލިކޮށްފަ އެވެ. މިދިޔަ އަހަރު އޮކްޓޫބަރު މަހު 9 ވަނަ ދުވަހު، ތަޖިކިސްތާނުގައި ކުޅުނު މެޗުން އެ ޓީމުން 2-0 އިން ރާއްޖެ ބަލިކުރިއިރު، އޭގެ ހަތަރު ދުވަސް ފަހުން، މާލޭގައި ކުޅުނު މެޗުން، ތަޖިކިސްތާން މޮޅުވީ 3-0 އިންނެވެ. 

"ގައުމީ ޓީމު ކުޅޭ ގޮތާއި ކްލަބްތައް ކުޅޭ ގޮތާއި ވަރަށް ތަފާތު ވާނެ. ތައްޔާރީތައް ވެސް ވަރަށް ތަފާތުވާނެ. ދެން، މާޒިޔާއާ ދެެކޮޅަށް ތައްޔާރުވާނެ ގޮތެއް ނުބުނެވޭނެ. މިހާރު ފޯކަސް ކުރަނީ މެޗުގައި (ކާމިޔާބު ހޯދަން ބޭނުންވާ) ކަންކަން ކުރަން،" ތުކްތައޭވް ބުންޏެވެ. 

މީގެ ކުރިން އޭއެފްސީ ޕްރެޒިޑެންޓްސް ކަޕްގެ ޗެމްޕިއަންކަން ތިން ފަހަރު ހޯދާފައިވާ ރެގާރުން މިދިޔަ އަހަރުގެ ޗެލެންޖު ލީގުގެ ގްރޫޕް ސްޓޭޖުގައި ކުޅުނު ތިން މެޗުން ލިބުނީ އެންމެ ޕޮއިންޓެކެވެ. އެ ޓީމުން މި ފަހަރުގެ މުބާރާތުގެ ގްރޫޕް ސްޓޭޖުގެ ޖާގައެއް ހޯދުމަށް މާދަމާ މާޒިޔާއާ ދެކޮޅަށް ކުޅޭ މެޗު ފަށާނީ، 15:00 ގަ އެވެ. 

ކޮމެންޓް

ފަހުގެ ޚަބަރު

ސިޓީ އާއި އާސެނަލަށް މޮޅެއް ނުލިބުނު، ޗެލްސީ ބަލިވެއްޖެ

އިނގިރޭސި ޕްރިމިއާ ލީގުގައި ރޭ ކުޅުނު މެޗުތަކުން މެންޗެސްޓާ ސިޓީ އާއި އާސެނަލް އެއްވަރުވިއިރު، ޗެލްސީ ވަނީ ލީޑްސް ޔުނައިޓެޑް އަތުން 4-1 އިން ބަލިވެފައި. ސިޓީ އާއި ފުލަމް ބައްދަލުކުރި މެޗު 1-1 އިން އެއްވަރުވިއިރު، އާސެނަލް އާއި ނިއުކާސަލް ބައްދަލުކުރި މެޗު ނިމުނީ 2-2 އިން އެއްވަރުވެގެން.

އޮޑިން ކޮންމެ މެޗެއްގައި ވެސް ޓީމު ވަރުގަދަކޮށްގެން ނަތީޖާ ނެރެން

ދިވެހި ޕްރިމިއާ ލީގުގައި އޮޑި ސްޕޯޓްސް ކްލަބުން ކޮންމެ މެޗަކަށް ވެސް ނުކުންނަނީ ޓީމު ވަރުގަދަކޮށް ރަނގަޅު ނަތީޖާއެއް ނެރުމުގެ އަމާޒުގައި ކަމަށް އެ ޓީމުގެ ކޯޗު ލޫޗޯ ބުނެފި. ލީގުގެ ބްރޭކުގެ ތެރޭގައި ޓީމުގެ ފިޓްނަސް އާއި ކުޅުން ރަނގަޅުކުރަން ގިނަ މަސައްކަތްތަކެއް ކޮށްފައިވާއިރު، މާދަމާ ޓީސީއާ ދެކޮޅަށް ނުކުންނާނީ މެޗުގެ ކޮންޓްރޯލް ހޯދައިގެން މޮޅުވާން

ނިއު ރޭޑިއަންޓް ބަލިކުރުން މުޅި ވިކްޓަރީ އަށް އިތުބާރަކަށްވާނެ

ދިވެހި ޕްރިމިއާ ލީގުގައި ނިއު ރޭޑިއަންޓާ ދެކޮޅަށް ކުޅޭ މެޗުން މޮޅުވުމަކީ ވިކްޓަރީގެ އިތުބާރު ބޮޑުވެ، ސަޕޯޓަރުންގެ ޝައުގުވެރިކަން އިތުރުވާނެ ކަމެއް ކަމަށް އެ ޓީމުގެ ކޯޗު މޯހަން ބުނެފި ލީގުގައި މިހާތަނަށް ބަލިނުވެ އޮތް މި ދެ ޓީމުގެ ކުރިމަތިލުމަށް ވިކްޓަރީ އޮތީ ވަރަށް ރަނގަޅަށް ތައްޔާރުވެފައި ކަމަށްވެސް އޭނާ ފާހަގަކުރި

މުޑްރިކް އާއި ޔޫކްރެއިން އެފްއޭގެ ކޯޅުމެއް

މަނާބޭހުގެ މައްސަލައެއްގައި 21 މަސް ދުވަހުގެ ސަސްޕެންޝަނެއް ފުރިހަމަކުރުމަށްފަހު، ޔޫކްރެއިންގެ މިހައިލޯ މުޑްރިކް އެ ގައުމުގެ ފުޓްބޯޅަ އެސޯސިއޭޝަނުން އިހުމާލުވި ކަމަށް ބުނެ ކުރި ތުހުމަތުތަކާ ގުޅިގެން މައްސަލަ ހޫނުވެއްޖެއެވެ. މުޑްރިކްގެ މި ވާހަކަތަކަށް ރައްދު ދެއްވަމުން ޔޫކްރެއިން އެފްއޭގެ ރައީސް އަންޑްރީ ޝެވްޗެންކޯ ވިދާޅުވީ މުޑްރިކް ހަދަނީ ދޮގު ކަމަށާއި، މިއީ އެސޯސިއޭޝަނުގެ އަގުވައްޓާލަން ކުރާ ކަމެއް ކަމަށެވެ.

ޓޮމް ބްރެޑީ ޗެލްސީގެ ހިއްސާއެއް ގަންނަނީ

އެމެރިކަން ފުޓްބޯޅަ ލެޖެންޑް ޓޮމް ބްރެޑީ، ކްލިއަލޭކް ކެޕިޓަލް މެދުވެރިކޮށް އިނގިރޭސި ކްލަބް ޗެލްސީގެ މައިނޯރިޓީ ހިއްސާއެއް ގަތުމަށް ދަނީ މަސައްކަތް ކުރަމުންނެވެ. މި އިންވެސްޓްމަންޓާއެކު އޭނާއަށް ވޯޓުލުމުގެ ހައްގު ނުލިބުނު ނަމަވެސް، ކުރިއަށް އޮތް ތަނުގައި ކްލަބުގެ ބޯޑުން ފުރުސަތު ލިބުމުގެ ފުރުސަތު އެބައޮތެވެ. ބްރެޑީ މި ފިޔަވަޅު އަޅަނީ ބާމިންހަމް ސިޓީގައި އޮތް އޭނާގެ ހިއްސާ ދޫކޮށްލުމަށްފަހުއެވެ.

ބަޔާން އެއްވަރުވި މެޗުގައި ކޭން އަށް ސީރިއަސް އަނިޔާއެއް

ޖަރުމަނު ލީގުގައި ކޮލޯންއާ ދެކޮޅަށް ކުޅުނު މެޗުގައި ބަޔާން މިއުނިކްގެ ފޯވާޑް ހެރީ ކޭންގެ ކުޑަހުޅަށް ލިބުނު ސީރިއަސް އަނިޔާއަކާ ގުޅިގެން، ތިން މަސް ދުވަހަށް އޭނާ ކުޅުމާ ދުރުގައި ހުންނަން ޖެހިއްޖެ. ބަޔާން މި މެޗުން 1-1 އިން އެއްވަރުވިއިރު، މި ނަތީޖާއާއެކު ލީގުގެ އެއްވަނަ މަގާމު ގެއްލުމުގެ ބިރު އެ ޓީމަށް ވަނީ ކުރިމަތިވެފައި

ސްޕެއިން ކައިރިން ބަދަލުހިފަން ޒިދާން ބޭނުމެއް ނޫން

ނޭޝަންސް ލީގުގެ ކުއާޓާ ފައިނަލުގައި ސްޕެއިނާ ދެކޮޅަށް ނުކުންނައިރު، ފްރާންސްގެ އަމާޒަކީ ވޯލްޑް ކަޕްގެ ބަލިވުމުގެ ބަދަލުހިފުމުގެ ބަދަލުގައި މުބާރާތުގެ ތަށި ހޯދުން ކަމަށް ކޯޗު ޒިދާން ބުނެފި. ޒިދާން ފާހަގަކުރި ގޮތުގައި މިއީ އާ މުބާރާތެއް ކަމަށާއި، އަންނަ މާޗް މަހު އޮންނަ މި މެޗުތަކަށް ޓީމު އޮތީ ވަރުގަދަ އަމާޒެއްގައި

Newsletter

Get the latest news delivered straight to your inbox