ފާއިތުވި އަހަރުތަކުގައި މާޒިޔާ ސްޕޯޓްސް އެންޑް ރެކްރިއޭޝަނަށް ކުޅުނު ގިނަ ކުޅުންތެރިންތަކެއް ކްލަބް ދޫކޮށްލާފައިވީ ނަމަވެސް، މިހާރު އެ ޓީމުގައި އޮތް ސްކޮޑުގައި ހިމެނޭ ޒުވާން ކުޅުންތެރިންނާ އެކު ވެސް ރަނގަޅު މިސްރާބުން ކުރިއަށްދެވޭނެ ކަމުގެ އިތުބާރު އެބައޮތް ކަމަށް މާޒިޔާގެ ކެޕްޓަން، ސަމޫހު އަހުމަދު (ސަމުއްޓެ) ބުނެފި އެވެ.
ޖެހިޖެހިގެން ފަސް ސީޒަނުގައި މާޒިޔާއާ އެކު، ދިވެހި ޕްރިމިއާ ލީގުގެ ޗެމްޕިއަންކަން ހޯދި ގިނަ ކުޅުންތެރިންތަކެއް އެ ޓީމު ދޫކޮށްލާފައިވާއިރު، މާޒިޔާ އިން މި ފަހަރުގެ ސީޒަން ފެށީ ޗެރިޓީ ޝީލްޑް މެޗުގައި، ފަހަތުން އަރައި ނިއުއާ އެއްވަރުކޮށް ޕެނަލްޓީ ޖަހައިގެން މޮޅުވެގެންނެވެ.
އޭގެ ފަހުން، މާޒިޔާ އިން ވަނީ ކަޕް ވިނާސް ކަޕްގައި. ކުޅުނު ދެ މެޗުން މޮޅުވެފަ އެވެ. ފުރަތަމަ މެޗުގައި، އޮޑި ސްޕޯޓްސް ކްލަބް އަތުން 2-1 އިން އަދި، ދެ ވަނަ މެޗުގައި ބުރު ސްޕޯޓްސް ކްލަބް އަތުން ވެސް 2-1 އިން މޮޅުވި އެވެ.
އޭއެފްސީ ޗެލެންޖު ލީގުގެ ކޮލިފައިން ބުރުގައި، ރާއްޖޭގެ ލީގު ޗެމްޕިއަން، މާޒިޔާ ސްޕޯޓްސް އެންޑް ރެކްރިއޭޝަނުން މާދަމާ ހަވީރު ތަޖިކިސްތާންގެ އެފްސީ ރެގާރު ޓަޑާޒް ބައްދަލުކުރާ މެޗަކީ ވަރުގަދަ ޗެލެންޖެއް ކަމަށާއި މާޒިޔާގެ ކޮންމެ ކުޅުންތެރިއަކު މި މެޗުގައި 100 ޕަސެންޓް ދޭން ޖެހޭނެ ކަމަށް އެ ޓީމުގެ ކޯޗު، ތޯމަސް ޓްރުޗާ ވަނީ މިއަދު ބޭއްވި ނޫސްވެރިންގެ ބައްދަލުވުމުގައި ބުނެފަ އެވެ.
ވަރުގަދަ ޗެލެންޖެއް، މާޒިޔާގެ ކޮންމެ ކުޅުންތެރިއަކު 100 ޕަސެންޓް ދޭން ޖެހޭނެ
އޭއެފްސީ ޗެލެންޖު ލީގުގެ ކޮލިފައިންގައި މާދަމާ ތަޖިކިސްތާންގެ ރެގާރު ޓަޑާޒްއާ ދެކޮޅަށް ކުޅޭ މެޗަކީ ވަރުގަދަ ޗެލެންޖެއް ކަމަށާއި، މޮޅުވުމަށްޓަކައި ކޮންމެ ކުޅުންތެރިއަކު 100 ޕަސެންޓް ދޭންޖެހޭނެ ކަމަށް މާޒިޔާގެ ކޯޗު ޓްރުޗާ ވަނީ ބުނެފައި. ރެގާރަކީ އެންމެ ފަހުން ކުޅުނު ފަސް މެޗުން ވެސް މޮޅުވެ، ފޯމުގައި އޮތް ޓީމެއް ކަމަށް ޓްރޫޗާ ވަނީ ފާހަގަކޮށްފައި
އެ ނޫސްވެރިންގެ ބައްދަލުވުމުގައި، ސުވާލަކަށް ދިން ޖަވާބުގައި، ސަމުއްޓެ ބުނީ، ކޯޗު ފާހަގަކުރި ގޮތަށް މި (ކުޅެން ޖެހޭ) ޓީމު މިއީ ވަރަށް ވަރުގަދަ ޓީމެއް ކަމަށެވެ. އެކަމަކު، މާޒިޔާ ކުޅުންތެރިން، "އެންމެން އެކަތިގަނޑެއް ގޮތަށް ކުޅެގެން" މި މެޗު ކާމިޔާބު ކުރެވޭތޯ ހުރިހާ ކުޅުންތެރިން ވެސް މަސައްކަތް ކުރާނެ ކަމަށް ސަމުއްޓެ ވަނީ ބުނެފަ އެވެ.
"އިރާދަކުރެއްވިއްޔާ، މި ޓީމާ އެކު ރަނގަޅު ހިސާބަކަށް ދަތުރުކުރާނެ، ހުރިހާ ކުޅުންތެރިން ވެސް މަސައްކަތް އެބަކުރޭ އެ ކަމަށް،" ސަމުއްޓެ ބުންޏެވެ.
ތަޖިކިސްތާންގެ ރެގާރުން އެންމެ ފަހުން ކުޅުނު ފަސް މެޗުން ވެސް މޮޅުވެފައިވާއިރު، އެ ޓީމުން އަންނާނީ ވެސް މާޒިޔާގެ ކަންކަން ބަލައިގެން ތައްޔާރުވެގެން ކަމަށް ސަމުއްޓެ ވަނީ ބުނެފަ އެވެ.
"ހަމަ އެ ގޮތަށް މާޒިޔާ ވެސް އެ ކޮޅު ޓީމުގެ ކަންކަން ބަލާނެ. ދެން، ހަމަ ވަރަށް އުނދަގޫވާނެ. ވަރަށް އުނދަގޫ މެޗެއް މިއީ،" ސަމުއްޓެ ބުންޏެވެ.
"މާޒިޔާގެ މިހާރު މި އޮތް ސީނިއާ ޓީމުގައި ތިބޭނީ ހުސް، ވާހަކަ އަކީ، މާޒިޔާގެ ސީނިއާ ޕްލޭޔަރުން. މިސާލަކަށް، އުމުރުން ކުޑަ ވެދާނެ. އެކަމަކު، އެ ކުޅުންތެރިންނަކީ ގިނަ މެޗުތަކެއް ކުޅެފައި ތިބި ކުޅުންތެރިން. މާޒިޔާގައި ގިނަ އަހަރުތަކެއް، ނޫނީ ދުވަސްތަކެއް ވަންދެން ޕްރެކްޓިސްގައި ބައިވެރިވާ ޕްލޭޔަރުން އެ ތިބީ. އެ ޕްލޭޔަރުންނަކީ ޒުވާން ކުޅުންތެރިންނޭ، ސީނިއާ ޕްލޭޔަރުންނާ ތަފާތު ވާނެއޭ، އެހެނެއް ނޫން، ހުރިހާ ޕްލޭޔަރުން ވެސް ހަމަހަމަވާނެ،"
މާޒިޔާ އާއި ރެގާރު ބައްދަލުކުރަން އޮތް މެޗު އެންމެ ފުރަތަމަ ކުޅެން ތާވަލުކޮށްފައި އޮތީ މިއަދު ހަވީރު ގަލޮޅު ދަނޑުގަ އެެވެ. އެކަމަކު، ތަޖިކިސްތާންގެ ކަޕް ޗެމްޕިއަން، ރެގާރު ޓަޑާޒް، ރާއްޖެ އަންނަން ދަތުރު ފަތުރުގެ ކަންކަން ހަމަޖެހުމުގައި، މައްސަލަތަކެއް ދިމާވެ، ރާއްޖެ އާދެވުނީ މިއަދު ހެނދުނެވެ. އެހެންވެ، އޭއެފްސީން ނިންމީ، މެޗު، ބުދަ ދުވަހު ހަވީރަށް ފަސްކުރުމަށެވެ.
މިދިޔަ އަހަރު ރެގާރު ވަނީ އޭއެފްސީ ޗެލެންޖު ލީގުގެ ގްރޫޕް ސްޓޭޖުގައި ކުޅެފަ އެވެ. އެ ގޮތުން، މިދިޔަ ފަހަރުގެ ކޮލިފައިންގައި މާޒިޔާ ކަޓުވާލުމަށް ފަހު ގްރޫޕް ސްޓޭޖަށް ކޮލިފައިވި ކުވެއިތުގެ އަލް އަރާބީން ވަނީ ގްރޫޕް ސްޓޭޖުގައި ރެގާރު އަތުން 2-1 އިން މޮޅުވެފަ އެވެ.
ރެގާރު އާއި މާޒިޔާ ބައްދަލުކުރާ މެޗު ފަށާނީ މާދަމާ 15:00 ގަ އެވެ.
