މާލެ ސިޓީ ކައުންސިލުގެ އޮޑިޓު ކޮމިޓީން ސަނީހު އިސްތިއުފާ ދިފި

މާލެ ސިޓީ ކައުންސިލުގެ އޮޑިޓު ކޮމިޓީގެ ޗެއާ ކަމުން ހުޅުމާލެ މެދު ދާއިރާގެ ކައުންސިލަރު އަހުމަދު ސަނީހު ހަނީފު މިއަދު އިސްތިއުފާ ދެއްވައިފި އެވެ. 

ސަނީހު އެ ކޮމިޓީގެ ޗެއާ ކަމުން އިސްތިއުފާ ދެއްވި ކަން މާލެ ސިޓީ ކައުންސިލުން ވަނީ އަދަދަު ނޫހަށް ކަށަވަރުކޮށްދީފަ އެވެ. ނަމަވެސް އޭނާ އިސްތިއުފާ ދިން ސަބަބެއް ނޭނގެ އެވެ. 

ސަނީހަކީ މާލެ ސިޓީ ކައުންސިލުގައި ޕީއެންސީ ތަމްސީލުކުރައްވާ ދެ ކައުންސިލަރުންގެ ތެރެއިން އެކަކެވެ. ކައުންސިލުގެ ކޮމިޓީތައް ބެހިއިރު އޮޑިޓު ކޮމިޓީ އޭނާއާ ހަވާލުކޮށް، ފިނޭންސް ބަޖެޓު އެންޑް ރިސޯސް މޮބިލައިޒޭޝަން ކޮމިޓީގެ ވައިސް ޗެއާމަނަކަށް ހަމަޖެއްސި އެވެ. 

މާލެ ސިޓީ ކައުންސިލުގެ މި ނިންމުމަށް ގިނަ ބަޔެއްގެ ފާޑުކިޔުން އަމާޒުވި އެވެ. ސަބަބަކީ ބިންވެރިޔާ ގޯތިތަކުގެ މައްސަލައިގައި އަދި ވޯޓާ ތީމް ޕާކުން ސާމާނުތަކެއް ވަގަަށް ނެގި މައްސަލައިގައި އޭނާގެ ބައިވެރިވުމެއް އޮތް ކަމަށް ތުހުމަތުކުރެވޭތީ އެވެ.

މާލޭ ސިޓީ ކައުންސިލުގެ އޮޑިޓު ކޮމިޓީގެ ޗެއާގެ މަގާމު ޕީއެންސީގެ ސަނީހަށް ދީފި

މާލީ ގިނަ މައްސަލަތަކެއް ފެންމަތިވެފައިވާ ސިޓީ ކައުންސިލުގެ މި މަގާމުތައް އޭނާއަށް ދީފައިވަނީ، ބިންވެރިޔާ ގޯތިތަކުގެ ވައްކަމުގެ މައްސަލައިގައި އޭނާގެ ބައިވެރިވުން އޮތް. މާލޭ ސިޓީ ކައުންސިލުގެ އޮޑިޓް ރިޕޯޓްތައް ގަވާއިދުން ނެރެފައިނުވާއިރު، މިއީ ދައުލަތުން އެންމެ ބޮޑު ބަޖެޓެއް ހޭދަކުރާ އެއް އިދާރާ.

ސަނީހަކީ ބިންވެރިޔާ ގޯތި ވައްކަން ހިނގި ދުވަސްވަރު ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) ގެ ޗީފް ރިއަލް އެސްޓޭޓު އޮފިސަރެވެ. މި މައްސަލައިގައި އެޗްޑީސީން ވަޒީފާއިން ވަކިކުރި މީހުންގެ ތެރެއިން ވަޒީފާ އިއާދަކޮށް ނުދެނީ ވެސް ސަނީހަށް އެކަންޏެވެ. 

ކައުންސިލަށް ފާޑުކިޔުން އަމާޒުވީ އަނެއް ސަބަބަކީ މި ދެ ކޮމިޓީގެ މަސައްކަތަކީ ސިޓީ ކައުންސިލަށް އެންމެ ފާޑުކިޔުން އަމާޒުވާ އެއް މައްސަލަ ކަމުގައިވާ މާލީ ހާމަކަމެއް ނެތް މައްސަލައާ ސީދާ ގުޅޭ މަސައްކަތަކަށް ވާތީ އެވެ. 

މާލެ ސިޓީ ކައުންސިލަކީ ކައުންސިލުތަކުގެ ތެރެއިން އެންމެ ބޮޑު ބަޖެޓެއް ލިބޭ ކައުންސިލެވެ. މިހެން ނަމަވެސް އެ ކައުންސިލު ގަވާއިދުން އޮޑިޓެއް ނުކުރެ އެވެ. އެހެންވެ ވޭތުވި ފަސް އަހަރު ދުވަހުގެ ތެރޭގައި ކައުންސިލުން ހަރަދު ކުރި ގޮތެއް އެނގޭކަށް ނެތެވެ.