އޮސްކާ ތަފާތު ދައްކައި 22 އަހަރަށް ފަހު އީސްޓް ބެންގޯލަށް އިންޑިއާގެ ޗެމްޕިއަންކަން

May 22, 2026, 1:40 PM
އޮސްކާ ބްރުޒޮން، އިންޑިއަން ސުޕަ ލީގުގެ ތަށްޓާ އެކު.

އޮސްކާ ބްރުޒޮން، އިންޑިއަން ސުޕަ ލީގުގެ ތަށްޓާ އެކު.

ކަލްކަތާ، އިންޑިއާ (މެއި 22) - ދެކުނު އޭޝިއާ ސަރަހައްދުގައި އާދަޔާހިލާފު ކާމިޔާބީތަކެއް ހާސިލްކުރަމުން އަންނަ ސްޕެއިނުގެ ކޯޗު، އޮސްކާ ބްރުޒޮންގެ އެހީއާ އެކު، އީސްޓް ބެންގޯލް އެފްސީން 22 އަހަރަށް ފަހު އިންޑިއާގެ މައި ލީގުގެ ޗެމްޕިއަންކަން ހޯދައިފި އެވެ. 

މިއީ، އިންޑިއަން ސުޕަ ލީގު (އައިއެސްއެލް)ގެ ޗެމްޕިއަންކަން އީސްޓް ބެންގޯލުން ހޯދި ފުރަތަމަ ފަހަރެވެ. މީގެ ކުރިން، އީސްޓް ބެންގޯލުން ލީގު ހޯދި ތިން ފަހަރު ވެސް އެއީ އިންޑިއަން ނެޝަނަލް ލީގު އެވެ. އެ ގޮތުން، އީސްޓް ބެންގޯލުން މީގެ ކުރިން ލީގު ޗެމްޕިއަންކަން ހޯދީ 2000/2001 އާއި 2002/2003 އަދި 2003/2004 ވަނަ އަހަރު އެވެ. 

އީސްޓް ބެންގޯލުން ލީގު ޗެމްޕިއަންކަން ހޯދީ ދެ ވަނައިގައި ނިންމި މޯހަން ބަގާންއާ ޕޮއިންޓުގެ ގޮތުން އެއްވަރުވި ނަމަވެސް ލަނޑުގެ ތަފާތުންނެވެ. ރޭ ކުޅުނު ލީގުގެ ފަހު މެޗުގައި، ކަލްކަތާ ޑާބީގައި، އީސްޓް ބެންގޯލް އާއި މޯހަން ބަގާން ވަނީ 1-1 އިިން އެއްވަރުވެފަ އެވެ. 

މިއާ އެކު، 2024 ވަނަ އަހަރު، އީސްޓް ބެންގޯލްގެ ކޯޗުކަމާ ހަވާލުވި އޮސްކާ މި ވަނީ އެ ޓީމަށް ތާރީހީ ކާމިޔާބެއް ހޯދައިދީފަ އެވެ.

ރާއްޖޭގެ ނިއު ރޭޑިއަންޓް ސްޕޯޓްސް ކްލަބާ އެކު، ދިވެހި ޕްރިމިއާ ލީގުގެ ޗެމްޕިއަންކަން ހޯދައި، ބަންގްލަދޭޝްގެ ބަޝުންދަރާ ކިންގްސްއާ އެކު، ބަންގްލަދޭޝް ޕްރިމިއާ ލީގުގެ ޗެމްޕިއަންކަން ހޯދި އޮސްކާ މި ވަނީ ދެކުނު އޭޝިއާ ސަރަހައްދުގެ ތިން ގައުމުގެ މައި ލީގުގެ ޗެމްޕިއަންކަން ހެޑް ކޯޗެއްގެ ގޮތުގައި ހުރެ ހޯދައިފަ އެވެ. 

މީގެ 22 ވަރަކަށް އަހަރު ކުރިން އަނިޔާއާ ހެދި ފުޓްބޯޅަ ކެރިއަރު ނިންމާލަން ޖެހުނު ސްޕެއިނުގެ ސެލްޓަ ވީގޯ އަށް ނިސްބަތްވާ އޮސްކާ، ކޯޗިން ލައިސަންސް ފުރިހަމަ ކުރަންދެން މަަސައްކަތް ކޮށްފައިވަނީ، ޕާޓް ޓައިމްކޮށް ބޭންކެއްގަ އެވެ.  

ކޯޗިން ލައިސަންސް ހޯދި ގޮތަށް 2007 ވަނަ އަހަރު ކޯޗިން ކެރިއަރު ރަސްމީކޮށް ފަށައި، އޮސްކާގެ ކެރިއަރުގެ ބޮޑުބައި ހޭދަކޮށްފައިވަަނީ ދެކުނު އޭޝިއާގަ އެވެ. އެ ގޮތުން، ދެކުނު އޭޝިއާގައި އޭނާގެ ފުރަތަމަ މަންޒިލަަކީ ވެސް އިންޑިއާ އެެވެ.

ސްޕޯޓިން ގޯއާގެ ހެޑް ކޯޗަކަށް 2012 އިން 2014 އަށް މަސައްކަތްކުރި އޮސްކާ ދެން ފެނުނީ 2015 އާއި 2016 ގައި، މުމްބައި ސިޓީގައި ނިކޮލަސް އަނެލްކާގެ އެސިސްޓަންޓް ކޯޗެއްގެ ގޮތުގަ އެވެ. އޭގެ ފަހުން، އެއް ސީޒަނުގައި މަޔޯކާގެ އެސިސްޓަންޓް ކޯޗަކަށް ހުރުމަށް ފަހު، އެނބުރި އައިސް 2017 ވަނަ އަހަރު ކުރީކޮޅުގައި މުމްބައި އަށް ކޯޗުކޮށްދިނެވެ. އަދި، އެ އަހަރު މެދުތެރެއިން ރާއްޖޭގެ ނިއު ރޭޑިއަންޓާ ހަވާލުވި އެވެ. އަދި، ނިއުގައި ދެ އަހަރު ހޭދަކުރުމަށް ފަހު، 2019 ވަނަ އަހަރު ސެޕްޓެމްބަރުގައި ބަންގްލަދޭޝްގެ ބަޝުންދަރާ ކިންގްސްއާ ހަވާލުވި އެވެ. އަދި، އެ ޓީމު ދޫކޮށްލައި، އީސްޓް ބެންގޯލާ ހަވާލުވީ 2024 ގަ އެވެ. އޮސްކާ، ވަނީ ބަޝުންދަރާގެ ކޯޗަކަށް މަސައްކަތްކުރިއިރު، 2021 ވަނަ އަހަރުގެ ސާފް ޗެމްޕިއަންޝިޕްގައި ބަންގްލަދޭޝް ގައުމީ ޓީމުގެ ކޯޗުކަން ވެސް ކޮށްފަ އެވެ. 

ދެކުނު އޭޝިއާގެ ތިން ގައުމެއްގައި ކާމިޔާބު ހޯދި ގޮތާ ބެހޭގޮތުން، އޮސްކާ ވަނީ އޭނާ ދެކޭގޮތް، އިންޑިއަން ސުޕަ ލީގުގެ މީޑިއާ އަށް އިންޓަވިއުއެއް ދީފަ އެވެ. 

"މިއީ އަހަރެންގެ ކެރިއަރުގެ އެންމެ މަތީ ލެވަލް. އެކަން ފޮރުވޭކަށެއް ނެތް. މިދިޔަ 15 ވަރަކަށް އަހަރަކީ ވަރަށް މުއްސަނދި ކެރިއަރެއް ވަރަށް ކެރިގެން އަހަރެން ކުރިއަށްގެންދިޔައީ. އާއިލާއާ ދުރުގައި ތަފާތު އެކި ގައުމުތަކުގައި، އެކި ސަގާފަތްތަކުގެ ތެރޭގައި މަސައްކަތްކުރީ ތަފާތު ލީގުތަކުގައި،" އޮސްކާ ކިޔައިދިނެވެ. 

"އަހަންނަށް ރާއްޖޭގައި (ނިއު ރޭޑިއަންޓްގައި ހުރެ) ލީގު ހޯދުނީ ވަރުގަދަ ޓީމެއްގެ ގޮތުގައި މާޒިޔާ އޮއްވައި. ބަންގްލަދޭޝްގައި އަހަރެން (ބަޝުންދަރާއާ އެކު) ލީގު ހޯދިިއިރު ވަރުގަދަ ޓީމަކީ އަބަހާނީ. މިހާރު އަހަރެން ހުވަފެން މި ހާސިލްކުރީ އީސްޓް ބެންގޯލްގައި ހުރެ ވަރުގަދަ ޓީމެއްގެ ގޮތުގައި މޯހަން ބަގާން އޮއްވައި." 

އޮސްކާ ވަނީ އީސްޓް ބެންގޯލަށް މި ކާމިޔާބީ ލިބުމުގައި ޓީމުގެ މެނޭޖްމަންޓާއި ކުޅުންތެރިން އަދި ސަޕޯޓަރުން އޭނާ އަށް ކުރި އިތުބާރަށް ޝުކުރު އަދާކޮށްފަ އެވެ. 

ކޮމެންޓް

ފަހުގެ ޚަބަރު

ސިޓީ އާއި އާސެނަލަށް މޮޅެއް ނުލިބުނު، ޗެލްސީ ބަލިވެއްޖެ

އިނގިރޭސި ޕްރިމިއާ ލީގުގައި ރޭ ކުޅުނު މެޗުތަކުން މެންޗެސްޓާ ސިޓީ އާއި އާސެނަލް އެއްވަރުވިއިރު، ޗެލްސީ ވަނީ ލީޑްސް ޔުނައިޓެޑް އަތުން 4-1 އިން ބަލިވެފައި. ސިޓީ އާއި ފުލަމް ބައްދަލުކުރި މެޗު 1-1 އިން އެއްވަރުވިއިރު، އާސެނަލް އާއި ނިއުކާސަލް ބައްދަލުކުރި މެޗު ނިމުނީ 2-2 އިން އެއްވަރުވެގެން.

އޮޑިން ކޮންމެ މެޗެއްގައި ވެސް ޓީމު ވަރުގަދަކޮށްގެން ނަތީޖާ ނެރެން

ދިވެހި ޕްރިމިއާ ލީގުގައި އޮޑި ސްޕޯޓްސް ކްލަބުން ކޮންމެ މެޗަކަށް ވެސް ނުކުންނަނީ ޓީމު ވަރުގަދަކޮށް ރަނގަޅު ނަތީޖާއެއް ނެރުމުގެ އަމާޒުގައި ކަމަށް އެ ޓީމުގެ ކޯޗު ލޫޗޯ ބުނެފި. ލީގުގެ ބްރޭކުގެ ތެރޭގައި ޓީމުގެ ފިޓްނަސް އާއި ކުޅުން ރަނގަޅުކުރަން ގިނަ މަސައްކަތްތަކެއް ކޮށްފައިވާއިރު، މާދަމާ ޓީސީއާ ދެކޮޅަށް ނުކުންނާނީ މެޗުގެ ކޮންޓްރޯލް ހޯދައިގެން މޮޅުވާން

ނިއު ރޭޑިއަންޓް ބަލިކުރުން މުޅި ވިކްޓަރީ އަށް އިތުބާރަކަށްވާނެ

ދިވެހި ޕްރިމިއާ ލީގުގައި ނިއު ރޭޑިއަންޓާ ދެކޮޅަށް ކުޅޭ މެޗުން މޮޅުވުމަކީ ވިކްޓަރީގެ އިތުބާރު ބޮޑުވެ، ސަޕޯޓަރުންގެ ޝައުގުވެރިކަން އިތުރުވާނެ ކަމެއް ކަމަށް އެ ޓީމުގެ ކޯޗު މޯހަން ބުނެފި ލީގުގައި މިހާތަނަށް ބަލިނުވެ އޮތް މި ދެ ޓީމުގެ ކުރިމަތިލުމަށް ވިކްޓަރީ އޮތީ ވަރަށް ރަނގަޅަށް ތައްޔާރުވެފައި ކަމަށްވެސް އޭނާ ފާހަގަކުރި

މުޑްރިކް އާއި ޔޫކްރެއިން އެފްއޭގެ ކޯޅުމެއް

މަނާބޭހުގެ މައްސަލައެއްގައި 21 މަސް ދުވަހުގެ ސަސްޕެންޝަނެއް ފުރިހަމަކުރުމަށްފަހު، ޔޫކްރެއިންގެ މިހައިލޯ މުޑްރިކް އެ ގައުމުގެ ފުޓްބޯޅަ އެސޯސިއޭޝަނުން އިހުމާލުވި ކަމަށް ބުނެ ކުރި ތުހުމަތުތަކާ ގުޅިގެން މައްސަލަ ހޫނުވެއްޖެއެވެ. މުޑްރިކްގެ މި ވާހަކަތަކަށް ރައްދު ދެއްވަމުން ޔޫކްރެއިން އެފްއޭގެ ރައީސް އަންޑްރީ ޝެވްޗެންކޯ ވިދާޅުވީ މުޑްރިކް ހަދަނީ ދޮގު ކަމަށާއި، މިއީ އެސޯސިއޭޝަނުގެ އަގުވައްޓާލަން ކުރާ ކަމެއް ކަމަށެވެ.

ޓޮމް ބްރެޑީ ޗެލްސީގެ ހިއްސާއެއް ގަންނަނީ

އެމެރިކަން ފުޓްބޯޅަ ލެޖެންޑް ޓޮމް ބްރެޑީ، ކްލިއަލޭކް ކެޕިޓަލް މެދުވެރިކޮށް އިނގިރޭސި ކްލަބް ޗެލްސީގެ މައިނޯރިޓީ ހިއްސާއެއް ގަތުމަށް ދަނީ މަސައްކަތް ކުރަމުންނެވެ. މި އިންވެސްޓްމަންޓާއެކު އޭނާއަށް ވޯޓުލުމުގެ ހައްގު ނުލިބުނު ނަމަވެސް، ކުރިއަށް އޮތް ތަނުގައި ކްލަބުގެ ބޯޑުން ފުރުސަތު ލިބުމުގެ ފުރުސަތު އެބައޮތެވެ. ބްރެޑީ މި ފިޔަވަޅު އަޅަނީ ބާމިންހަމް ސިޓީގައި އޮތް އޭނާގެ ހިއްސާ ދޫކޮށްލުމަށްފަހުއެވެ.

ބަޔާން އެއްވަރުވި މެޗުގައި ކޭން އަށް ސީރިއަސް އަނިޔާއެއް

ޖަރުމަނު ލީގުގައި ކޮލޯންއާ ދެކޮޅަށް ކުޅުނު މެޗުގައި ބަޔާން މިއުނިކްގެ ފޯވާޑް ހެރީ ކޭންގެ ކުޑަހުޅަށް ލިބުނު ސީރިއަސް އަނިޔާއަކާ ގުޅިގެން، ތިން މަސް ދުވަހަށް އޭނާ ކުޅުމާ ދުރުގައި ހުންނަން ޖެހިއްޖެ. ބަޔާން މި މެޗުން 1-1 އިން އެއްވަރުވިއިރު، މި ނަތީޖާއާއެކު ލީގުގެ އެއްވަނަ މަގާމު ގެއްލުމުގެ ބިރު އެ ޓީމަށް ވަނީ ކުރިމަތިވެފައި

ސްޕެއިން ކައިރިން ބަދަލުހިފަން ޒިދާން ބޭނުމެއް ނޫން

ނޭޝަންސް ލީގުގެ ކުއާޓާ ފައިނަލުގައި ސްޕެއިނާ ދެކޮޅަށް ނުކުންނައިރު، ފްރާންސްގެ އަމާޒަކީ ވޯލްޑް ކަޕްގެ ބަލިވުމުގެ ބަދަލުހިފުމުގެ ބަދަލުގައި މުބާރާތުގެ ތަށި ހޯދުން ކަމަށް ކޯޗު ޒިދާން ބުނެފި. ޒިދާން ފާހަގަކުރި ގޮތުގައި މިއީ އާ މުބާރާތެއް ކަމަށާއި، އަންނަ މާޗް މަހު އޮންނަ މި މެޗުތަކަށް ޓީމު އޮތީ ވަރުގަދަ އަމާޒެއްގައި

Newsletter

Get the latest news delivered straight to your inbox