އެޕަލް ކުންފުނީގެ ސިރީ ވޮއިސް އެސިސްޓެންޓަށް ގެންނަން ނިންމި އާޓިފިޝަލް އިންޓެލިޖެންސް ނުވަތަ އޭއައި ފީޗާތައް ތައާރަފުކުރުން ލަސްވުމާ ގުޅިގެން ހިއްސާދާރުން ކުރި ދައުވާ 250 މިލިއަން ޑޮލަރު ދެއްކުމަށްފަހު ކޯޓުން ބޭރުގައި ހައްލުކުރުމަށް އެޕަލް އިން އެއްބަސްވެއްޖެއެވެ.
މި މައްސަލައަކީ އެޕަލް އިން އޭއައިގެ އާ ފީޗާތައް ނެރޭނެ ކަމަށް ބުނެ އިޝްތިހާރު ކުރުމަށްފަހު، އެ ވައުދުވި މުއްދަތަށް އެކަން ފުރިހަމަނުވުމުން ކުންފުނީގެ ހިއްސާދާރުންނަށް މާލީ ގެއްލުންވި ކަމަށް ބުނެ ހުށަހެޅި މައްސަލައެކެވެ.
އެމެރިކާގެ ކެލިފޯނިއާގެ ފެޑަރަލް ކޯޓަށް 2024 ވަނަ އަހަރު މި މައްސަލަ ހުށަހެޅީ ޕީޓަރ ލޭންޑްޝެފްޓް ނަމަކަށް ކިޔާ މީހެކެވެ. މި ދައުވާގައި ބުނެފައިވަނީ 2024 ވަނަ އަހަރު ބޭއްވި އެޕަލްގެ އަހަރީ ސޮފްޓްވެއަރ ޑިވެލޮޕަރުންގެ ކޮންފަރެންސްގައި، އެ އަހަރު ނެރުނު އާ އައިފޯންތަކާއެކު ސިރީގެ ވަރުގަދަ އޭއައި އަޕްގްރޭޑްތަކެއް ލިބޭނެ ކަމަށް އެޕަލް އިން ބުނެފައިވާ ކަމަށެވެ. އަދި އެކަމަށް އަމާޒުކޮށް ގިނަ އިޝްތިހާރުތަކެއް ވެސް އެޕަލް އިން އޭރު ހިންގާފައިވެއެވެ. ނަމަވެސް، އާ އައިފޯންތައް ބާޒާރަށް ނެރުނުއިރު އެ ފީޗާތައް ހިމަނާފައެއް ނުވެއެވެ.
މި މައްސަލައިގައި ހިއްސާދާރުން ފާހަގަކޮށްފައިވަނީ، އާ ފީޗާތައް ނެރުން ލަސްވުމުގެ ސަބަބުން ކުންފުނީގެ ހިއްސާގެ އަގަށް ނޭދެވޭ އަސަރުކޮށް، އިންވެސްޓަރުންނަށް ބޮޑެތި ގެއްލުންތަކެއް ލިބިފައިވާ ކަމަށެވެ. އެޕަލް އިން 2025 ވަނަ އަހަރު ބުނެފައިވަނީ ސިރީގެ އޭއައި އިން ބޮޑު ބަދަލެއް ފެންނާނީ މިއަހަރު ކަމަށެވެ. ކުންފުނީގެ އިސްވެރިން މިހާރު ކަށަވަރުކޮށްދީފައިވާ ގޮތުގައި، ސިރީގެ އާ ފީޗާތައް ދައްކާލާނީ އަންނަ މަހު ބާއްވާ އެޕަލްގެ އަހަރީ ޑިވެލޮޕަރުންގެ ކޮންފަރެންސްގައެވެ.
މި މައްސަލަ ހައްލުކުރުމަށް 250 މިލިއަން ޑޮލަރު ދޭން އެޕަލް އިން އެއްބަސްވި ނަމަވެސް، އެ ކުންފުނިން އެއްވެސް ގޯހެއް ހެދިކަމަކަށް އިއުތިރާފެއް ނުވެއެވެ. މި އެއްބަސްވުން ފުރިހަމަވާނީ ކޯޓުގެ ފަނޑިޔާރަކު އެކަން ފާސްކުރުމުންނެވެ. އެޕަލް އިން ނެރުނު ބަޔާނެއްގައި ބުނެފައިވަނީ 2024 ވަނަ އަހަރު 'އެޕަލް އިންޓެލިޖެންސް' ތައާރަފުކުރި ފަހުން އޭއައިގެ ގިނަ ފީޗާތަކެއް ކަސްޓަމަރުންނަށް ފޯރުކޮށްދީފައިވާ ކަމަށެވެ.
އެޕަލްގެ ބަޔާނުގައި އިތުރަށް ބުނެފައިވަނީ، ދެ ފީޗާއެއް ލިބުން ލަސްވުމާ ގުޅިގެން ހުށަހެޅުނު ދައުވާތައް ހައްލުކުރަން ނިންމީ، ކުންފުނީގެ މައިގަނޑު މަސައްކަތަށް ސަމާލުކަން ދިނުމުގެ ގޮތުން ކަމަށެވެ. އެއީ ކަސްޓަމަރުންނަށް އެންމެ އުފެއްދުންތެރި އަދި ޒަމާނީ އުފެއްދުންތަކާއި ހިދުމަތްތައް ފޯރުކޮށްދިނުމެވެ. މި އެއްބަސްވުމުގެ ސަބަބުން ގިނަ ދުވަސްތަކަކަށް ދެމިގެންދާނެ ގާނޫނީ މަރުހަލާތަކަކުން ސަލާމަތްވެ، ކުންފުނީގެ ކުރިމަގުގެ އޭއައި މަޝްރޫއުތަކަށް އިސްކަންދިނުމުގެ ފުރުސަތު އެޕަލްއަށް ލިބިގެންދާނެއެވެ.
