ނިމިދިޔަ ސީޒަނުގައި ބުރު ސްޕޯޓްސް ކްލަބަށް ކުޅުނު މިޑްފީލްޑަރު، އަބްދުﷲ ޖުނައިދު (ޖޭންނޭ)، އޮޑި ސްޕޯޓްސް ކްލަބަށް ބަދަލުވެއްޖެ އެވެ.
އޮޑި އަކީ ފުރަތަމަ ޑިވިޝަނުގައި ޖޭންނޭ ފެންނާނެ ފަސް ވަނަ ޓީމެވެ. އެ ގޮތުން، ލ. ގަމަށް އުފަން، ޖޭންނޭ އެންމެ ފުރަތަމަ ކުޅެފައިވަނީ މާޒިޔާ ސްޕޯޓްސް އެންޑް ރެކްރިއޭޝަން އަށެވެ. ތިން ވަނަ ޑިވިޝަނުން ފާހަގަވި ޖެންނޭ، މާޒިޔާގެ ޒުވާން ޓީމަށް ވެސް ކުޅުމަށް ފަހު، އޭގެ ފަހުން، ސީނިއާ ޓީމަށް ވެސް ވަނީ ކުޅެފަ އެވެ. ސީނިއާ ޓީމުގައި ގިނަ މެޗުތަކެއްގައި ކުޅުނީ ބަދަލެއްގެ ގޮތުގަ އެވެ.
އޭގެ ފަހުން، ފުރަތަމަ ޑިވިޝަނުގައި ޖޭންނޭ ވަނީ، ދަ ގްރާންޑޭ ސްޕޯޓްސް ކްލަބާއި ސުޕަ ޔުނައިޓެޑް ސްޕޯޓްސް (ސަސް)ގެ އިތުރުން، ބުރު އަށް ކުޅެފަ އެވެ.
ޖޭންނޭ ވަނީ މިދިޔަ ސީޒަނުގައި ބުރުން ރިލީސް ހޯދައިގެން، ޖެނުއަރީ މަހު، ތައިލެންޑުގައި ބޭއްވި ސާފް ފުޓްސަލް ޗެމްޕިއަންޝިޕްގެ ޗެމްޕިއަންކަން ހޯދި ރާއްޖޭގެ ގައުމީ ފުޓްސަލް ޓީމަށް ވެސް ކުޅެފަ އެވެ. އަދި، އޭނާ ވަނީ، މީގެ ކުރިން، ކްލަބް ވެމްކޯ އަށް ފުޓްސަލް ކުޅެމުން، ކްލަބް މޯލްޑިވްސް ކަޕްގެ ޗެމްޕިއަންކަން އެ ޓީމަަށް ހޯދައިދިނުމުގެ އިތުރުން، މުބާރާތުގެ އެންމެ މޮޅު ކުޅުންތެރިޔާ އަށް ދޭ ކިންގްގެ މަގާމު ވެސް ހޯދައިފަ އެެވެ.
އޮޑިން ދެ ވަނަ ޑިވިޝަނުގެ ޗެމްޕިއަންކަން ހޯދަައި، ފުރަތަމަ ޑިވިޝަނުގައި ވާދަކުރި ފުރަތަމަ ސީޒަނުގައި ވަނީ، ފުރަތަމަ ކުޅުނު ޕްރީ ސީޒަން މުބާރާތް، އެފްއޭއެމް ލީގު ކަޕްގެ ދެ ވަނަ ހޯދައިފަ އެވެ. އޭގެ ފަހުން، ދިވެހި ޕްރިމިއާ ލީގުގެ ދެ ވަނަ އަށް ދިޔައިރު، ޕްރެޒިޑެންޓްސް ކަޕްގެ ޗެމްޕިއަންކަން ހޯދި އެވެ. އެކަމަކު، އެފްއޭ ކަޕްގައި ވަނީ ކުއާޓާ ފައިނަލުން ކަޓައިފަ އެވެ.
