ޓްރީ ޓޮޕް ހޮސްޕިޓަލުން ށ. އަތޮޅު ހޮސްޕިޓަލާ ގުޅިގެން މިދިޔަ ހަފްތާ ބަންދުގައި ށ. ފުނަދޫގައި ބޭއްވި ހެލްތު ކޭމްޕް ކާމިޔާބުކަމާއެކު ނިންމާލައިފި އެވެ.
ށ. އަތޮޅުގެ ސަރަހައްދުގެ ރަށްތަކާއި ރިސޯޓުތަކުގެ މީހުން މާލެއަށް ދަތުރުކުރުމުގެ ބަދަލުގައި ރަށުގައި ތިބެގެން ފެންވަރު ރަނގަޅު ސިއްހީ ހިދުމަތާއި ހާއްސަ ބަލިތަކުގެ ޑޮކްޓަރުންގެ މަޝްވަރާ ހޯދުމުގެ ފުރުސަތު ފަހިކޮށްދިން މި ކޭމްޕްގައި 350 މީހުން ބައިވެރިވި އެވެ.
މި ހެލްތު ކޭމްޕްގައި ޓްރީ ޓޮޕް ހޮސްޕިޓަލުގެ ފަރާތުން ބައިވެރިވީ ކަށީގެ ބަލިތަކާއި، ނާރުގެ އޮޕަރޭޝަން، ހަމުގެ ބަލިތައް، ހޯމޯން ބަލިތައް، ފުއްޕާމޭގެ ބަލިތައް އަދި ކުޑަކަމުދާ ނިޒާމުގެ ބަލިތަކަށް ހާއްސަ ޑޮކްޓަރުންނެވެ.
ބަލިމީހުންނަށް ފަރުވާ ދިނުމުގެ އިތުރުން މި ކޭމްޕްގެ ތެރެއިން ށ. އަތޮޅު ހޮސްޕިޓަލުގައި މަސައްކަތްކުރާ މުވައްޒަފުންގެ ހުނަރު އިތުރުކުރުމަށާއި މައުލޫމާތު މުއައްސަނދިކުރުމަށް ސެޝަންތަކެއް ބޭއްވި އެވެ.
މިއީ އަތޮޅުތެރޭގެ ރަށްތަކަށް އަމާޒުކޮށްގެން ޓްރީ ޓޮޕް ހޮސްޕިޓަލުން ކުރިއަށްގެންދިޔަ 17 ވަނަ ހެލްތު ކޭމްޕް ކަމަށްވާއިރު، ކޭމްޕްތަކުން 4،000 އަށްވުރެ ގިނަ މީހުންނަށް ހިދުމަތް ދީފައިވެ އެވެ.
ޓްރީ ޓޮޕް ހޮސްޕިޓަލަކީ ރާއްޖެގެ ސިއްހީ ހިދުމަތުގެ ދާއިރާގައި އިސް ދައުރެއް އަދާކަމުން އަންނަ ހޮސްޕިޓަލެކެވެ. އެ ހޮސްޕިޓަލުގެ މައިގަނޑު އަމާޒަކީ އައު އުސޫލުތަކާއި ހިދުމަތްތައް ތައާރަފްކޮށް، ރައްޔިތުން ބެރު ގައުމުތަކަށް ސިއްހީ ފަރުވާ ހޯދަން ދާންޖެހޭ ސަބަބު މަދުކުރުމާއި، ސިއްހީ ހިދުމަތުގެ ހަރަދު ކުޑަކުރުމެވެ.
