ދިރާގު ދިވެހި ޕްރިމިއާ ލީގުގައި މިރޭ ވިކްޓަރީ ސްޕޯޓްސް ކްލަބް އަތުން 3-0 އިން ފަސޭހަ މޮޅެއް ހޯދައި އޮޑި ސްޕޯޓްސް ކްލަބުން ދެ ވަނަ މަގާމުގައި ލީޑު ދަމަހައްޓައިފި އެވެ.
މި މެޗަށް ނުކުުތްއިރު، ތިން ވަނައިގައި އޮތް ނިއު ރޭޑިއަންޓް ސްޕޯޓްސް ކްލަބުން ވަނީ އޮޑިއާ ދެ ޕޮއިންޓަށް ގާތަށް ޖެހިލައިފަ އެވެ. އޮޑިން މިރޭ މޮޅުނުވިނަމަ، މާޒިޔާ ސްޕޯޓްސް އެންޑް ރެކްރިއޭޝަން އަށް ޖެހިޖެހިގެން ފަސް ވަނަ ފަހަރަށް ލީގު ޗެމްޕިއަންކަން ލިބޭނެ އެވެ. އެކަމަކު، އޮޑިން ވަނީ ވިކްޓަރީ އަތުން މޮޅުވެ، ދެ ވަނައިގައި ފަސް ޕޮއިންޓުގެ ލީޑު ދަމަހައްޓައިފަ އެވެ.
ލީގުގެ އެއް ވަނައިގައި އޮތް މާޒިޔާ އަށް 16 މެޗުން 44 ޕޮއިންޓް ލިބިފައިވާއިރު، ދެ ވަނައިގައި އޮތް އޮޑި އަށް 16 މެޗުން 38 ޕޮއިންޓް ވަނީ ލިބިފަ އެވެ. ނިއު އިން ތިން ވަނައިގައި އޮތީ 16 މެޗުން 33 ޕޮއިންޓް ހޯދައިގެންނެވެ.
ގަލޮޅު ދަނޑުގައި މިރޭ ކުޅުނު މެޗުގެ 12 ވަނަ މިނިޓްގައި އޮޑިން ލީޑުނެގި އެވެ. މިއީ، އައިހަމް އަހުމަދު (އައިހު) އަރިމަތިން ނަގައިދިން ބޯޅައަކަށް އޭރިއާތެރެއިން އަރައި، ގުޔާނާގެ ފޯވާޑް، ކިއާނޫ މާޝް ބްރައުން ބޮލުން ޖެހި ގޯލެކެވެ. އޭގެ ހަ މިނިޓް ފަހުން، ވިކްޓަރީގެ ނޭޕާލް ކީޕަރު، ކިރަން ކުމާރް ލިމްބޫ ކުރިއަށް އަރައި ރަނގަޅަށް ސާފުނުކޮށްލެވުނު ބޯޅައެއްގައި، އޮޑިންކުރި އެޓޭކަކުން، އޭރިއާތެރެއަށް ހުސްކޮށް އަރައި، ލަނޑު ޖެހީ އަބްދުﷲ ލޫތު އިބްރާހިމް (ސާނޭ) އެވެ.
ފުރަތަމަ ހާފުގެ ފަހު މިނިޓްގައި އޮޑީގެ ތިން ވަަނަ ލަނޑު ޖެހީ މުޒްދާން ހަސަން އެވެ. ވިކްޓަރީގެ ޑިފެންޑަރުންގެ އޮފްސައިޑް މަޅިން ސަލާމަތްވެ، އޭރިއާތެރެއިން މުޒްދާން ފުރަތަމަ ފޮނުވާލި ބޯޅަ ކީޕަރު ކިރަން މަތަކުރިއިރު، ރީބައުންސަށް ނުކުތުމުން ވަނީ ފަސޭހައިން ގޯލަށް ވައްދާލައިފަ އެވެ.
ވިކްޓަރީން ވެސް ފުރަތަމަ ހާފުގައި އެޓޭކުތަކެއް ކުރި އެވެ. އެ ގޮތުން، އެ ޓީމުގެ ސްލޮވާކިއާ ފޯވާޑް މިލޯސް ލެޗްނީ އަށް ލިބުނު ދެ ފުރުސަތެއްގައި ފޮނުވާލި ހަމަލާ ވެސް ގޯލާ ސީދާނުވި އެވެ. ދެ ވަނަ ހާފުގައި ވިކްޓަރީން ބަދަލުތަކެއް ގެނެސްގެން ގޯލެއް ޖެހޭތޯ ކުރި މަސައްކަތުގައި އޭރިއާތެރެއިން ހުސެއިން ނިޔާޒް މުހައްމަދު (ބޮކުރީ) އަށް ލިބުނު ފުރުސަތުގައި އެންމެ ރަނގަޅަށް ފޮނުވާލެވޭ ގޮތެއްނުވި އެވެ.
އޮޑިން ދެ ވަނަ ހާފުގައި ކުރި އެޓޭކުތަކުގައި އެ ޓީމުގެ އަހުޒަމް ރަޝީދު (އަހޫ) އަށް ގޯލަށް ފޮނުވާލަން ރަނގަޅު ބޯޅަތަކެއް ލިބުނު ނަމަވެސް ފުރުސަތުތަކުގެ ބޭނުން ރަނގަޅަށް ނުހިފުނެވެ.
