އަންނަ ބުދަ ދުވަހު ރިލީޒްކުރުމަށް ހަމަޖެހިފައިވާ ދިވެހި ފިލްމު "ޕަރީ" ޕްރިމިއާ ކުރުމަށް ރާއްޖެ އަންނަނީ ބޮލީވުޑްގެ ފަންނާނެއް ކަމަށްވާ ސުރްޖަސިކާ ދާސް ކަމަށް އެ ފިލްމު އުފެއްދި ސީޒަން އަލީ ޕްރޮޑަކްޝަންސް އިން ހާމަކޮށްފި އެވެ.
ސުރްޖަސިކާ މަޝްހޫރުވެގެން ގޮސްފައިވަނީ މިދިޔަ އަހަރު ރިލީޒްކުރި ލީޑް އެކްޓްރެސްއެއްގެ ގޮތުގައި ކާޖޮލް ހަރަކާތްތެރިވި ބޮލީވުޑް ފިލްމް "މާ" އިންނެވެ. އެ ފިލްމުގައި ނަންދިނީގެ ރޯލުން ސުރްޖަސިކާގެ އެކްޓިން ގިނަ ބަޔަކަށް ކަމުދިޔަ އެވެ.
ކުރިން ބައެއް ޑްރާމާ ސީރީޒްތަކުގެ ރޯލުތަކުން ފެނިގެންދިޔަ ސުރްޖަސިކާ ވަނީ ކުރު ފިލްމް އިއްތިފާގްގެ ރޯލެއް ވެސް ކުޅެފަ އެވެ.
ސީޒަން އަލީ ޑައިރެކްޓްކުރާ ބިރުވެރި ފިލްމު "ޕަރީ" ގެ ޓިކެޓް މިދިޔަ ޑިސެމްބަރު މަހުގެ 19 ވަނަ ދުވަހުން ފެށިގެން އޮލިމްމަހުން ގެންދަނީ ވިއްކަމުންނެވެ.
ސީޒަންގެ އިތުރުން އަހުމަދު އަހުސަން ޕްރޮޑިއުސްކޮށްފައިވާ ޕަރީ ފިލްމުގެ ވާހަކަ ބިނާވެފައިވަނީ އަވައްޓެރި ސްރީ ލަންކާއަށް ދާ ދިވެހި އާއިލާއަކަށެވެ.
އެ އާއިލާއަށް ލަންކާގައި ދިމާވާ ނާމާން އަދި ބިރުވެރި ހާދިސާތަކެއްގެ މައްޗަށް ބިނާކޮށް އުފައްދާފައިވާ މި ފިލްމަކީ ބެލުންތެރިންގެ ގައިން ހީބިހި ނަގުވާލާނެ ފަދަ ތަފާތު މަސައްކަތެކެވެ.
ފިލްމުގެ މައިގަނޑު ރޯލުން ފެންނާނީ މަރްޔަމް ލަމްސާ ލަތީފް (ޕަރީ)، އާއި އައިޝަތު ރިޝްމީ، ސީޒަން، ޖުމައްޔިލް ނިމާލް އަދި ޝީލާ ނަޖީބް އެވެ.
ލަންކާގެ މޭކަޕް އާޓިސްޓުންނާއި ޝޫޓިންގް ކުރޫގެ އެހީތެރިކަން މި ފިލްމަށް ހޯދާފައިވާއިރު، ސީޖީއައި އާއި ވިޝުއަލް އިފެކްޓްސް އަދި 7.1 ސަރައުންޑް ސައުންޑް މިކްސިންގްގެ މަސައްކަތް ކުރިއަށް ދިޔައީ އިންޑިއާގެ މަޝްހޫރު ސްޓޫޑިއޯތަކުގައެވެ.
ފިލްމުގެ ޓިކެޓް މިހާރުވެސް ދަނީ ވިއްކަމުންނެވެ. ޓިކެޓު ގަތުމަށް 9331242 ނަންބަރަށް ގުޅުމަށް ވަނީ އެދިފަ އެވެ.
