އަންނަ އަންގާރަ ދުވަހު މާލޭގައި ބާސެލޯސް ނަސަންދުރާގައި ފަށާ ހަތް ވަނަ ކެރަމް ވޯލްޑް ކަޕުން ރާއްޖޭގެ އަންހެން ޓީމަށް ރަން މެޑަލެއް ނުހޯދެންވީ ސަބަބެއް ނެތް ކަމަށް އެ ޓީމުގެ ތަޖުރިބާކާރު ކުޅުންތެރިޔާ، އައިމިނަތު ވިޝާމާ ބުނެފި އެވެ.
ރާއްޖޭގައި، 11 އަހަރަށް ފަހު ކެރަމް ވޯލްޑް ކަޕް ކުރިއަށްދާނީ އަންނަ މަހުގެ 2-6 އަށެވެ. އެންމެ ފަހުން 2014 ވަނަ އަހަރު ރާއްޖޭގައި، ކެރަމް ވޯލްޑް ކަޕެއް ބޭއްވީ، ސަން އައިލެންޑް ރިސޯޓުގަ އެވެ. މި ފަހަރު، ބާސެލޯސް ނަސަންދުރާގައި މުބާރާތް ކުރިއަށްދާއިރު، އެ މުބާރާތަށް ހާއްސަކޮށް ރާއްޖޭގެ ޓީމުން އަންނަނީ 45 ދުވަހުގެ ފޯކަސް ޓްރެއިނިންތަކެއް ކުރިއަށްގެންދަމުންނެވެ.
ވިޝާމާގެ އިތުރުން، ގައުމީ އަންްހެން ކެރަމް ޓީމުގައި ހިމެނެނީ، އައިމިނަތު ވިދާދު، އައިޝަތު ފައިނާޒް، ފާތިމަތު ރަޔާނާ އަދި އައިޝަތު ނަހުފާ އެވެ.
"އަންހެން ކެރަމް ޓީމާ ދޭތެރޭގައި ވަރަށް ޕޮޒިޓިވްކޮށް މީނީ. ދެން، ކުރިން މުބާރާތެއްގައި އެބައިން ފައިނަލެއް ކުޅެފައި. އެހެންވީމަ، އަޅުގަނޑުމެންނަށް ރަން މެޑަލަކަށް ދާން ވަރަށް ރަނގަޅު ފުރުސަތެއް މިއީ، އަޅުގަނޑުމެންނަށް ނުލިބޭނެ އެއްޗެއް ނޫން މި ގޯލްޑަކީ، މިހާރު ތިބި ކުޅުންތެރިން ތިބީ ވަރަށް ފޯމުގައި، ހަމަ އަޅުގަނޑު ދެކެނީ، ފައިނަލުގައި ރަނގަޅު ވަނައެއް ހޯދައި، އިރާދަކުރެއްވިއްޔާ، އަޅުގަނޑުމެންނަށް ރަނގަޅު ކާމިޔާބެއް ލިބޭނެ،" މިދިޔަ ބުރާސްފަތި ދުވަހު ބޭއްވި ކެރަމް ވޯލްޑް ކަޕްގެ ނޫސްވެރިންގެ ބައްދަލުވުމުގައި، ވިޝާމާ ބުންޏެވެ.
މިދިޔަ އަހަރު، އެެމެރިކާގެ ކެލަފޯނިއާގައި ކުރިއަށްދިޔަ، ހަ ވަނަ ކެރަމް ވޯލްޑް ކަޕުން ރާއްޖޭގެ އަންހެން އަދި ފިރިހެން ޓީމުން ލޯ މެޑަލް ހޯދި އެވެ. ފިރިހެން ގައުމީ ޓީމުން ޓީމް އިވެންޓްގައި ފުރަތަމަ ފަހަރަށް ކެރަމް ވޯލްޑް ކަޕެއްގައި މެޑަލެއް ހޯދިއިރު، އެ ޓީމުން ތިން ވަނަ ހޮވި މެޗުގައި ބައްދަލުކުރީ ސިންގަޕޫރާ އެވެ. އަންހެން ގައުމީ ޓީމުން ތިން ވަނަ ހޯދީ އެމެރިކާ ބަލިކޮށްފަ އެވެ.
ގައުމީ ޓީމުގެ މެނޭޖަރު، ހުސެއިން އަލީ ބުނީ، ގައުމީ ކެރަމް ޓީމުުގެ ޓްރެއިނިން އަށް އިންޑިއާ އިން ގެނެސްފައިވާ ދެ ޓްރެއިނަރުން ވެސް ފާހަގަކޮށްފައިވާ މައިގަނޑު ކަމަކީ، ރާއްޖޭގެ ކުޅުންތެރިންގެ ކިބައިގައި ހުނަރު އެބަހުރިކަން ކަމަށެެވެ. އަދި، މި ފަހަރުގެ ވޯލްޑް ކަޕްގައި އެ ހުނަރުގެ ބޭނުންކޮށް ކާމިޔާބު ހޯދަން މަދުވާ ސަޕޯޓް ލިބޭނެ ކަމުގެ އުންމީދު އެބައޮތް ކަމަށް ހުސެއިން ވަނީ ބުނެފަ އެވެ.
"ކުޅުންތެރިންނަށް މަދުވާ އެއްޗަކީ، އަޅުގަނޑު ގަބޫލުކުރާގޮތުގައި، ބޭރުގައި ކުޅޭ މުބާރާތްތަކުގައި ސަޕޯޓަރުން ނެތުން، ދެން، މި ފަހަރު ގަބޫލުކުރަނީ މި ފަހަރުގެ މުބާރާތުގައި މި ސަޕޯޓް ލިބޭނެ ކަމަށް ކުރީގައި އަޅުގަނޑުމެން ވޯލްޑް ކަޕް ލެވަލް މުބާރާތްތައް ކުޅުނުއިރު، މުޅިންހެން ރާއްޖޭން ބޭރުގައި ކުޅެފައި ހުރީ، ދެން، ރާއްޖޭގައި ކުޅުނު މުބާރާތުގަައި، އިއްތިފާގުން ކުޅެން ޖެހުނީ ރިސޯޓެއްގައި، އެހެންވެ، އާއިލާ އަށް ވެސް ރައްޓެހިންނަށް ވެސް އަދި ސަޕޯޓަރުންނަށް ވެސް މެޗުތަކަށް ނުދެވުނު އެކަމަކު މި ފަހަރު މި ފުރުސަތު އެބައޮތް. އެހެންވެ، މި ފަހަރު ސަޕޯޓަރުން މެޗުތަކަށް އައިސް ހިތްވަރު ދިނުމުން ރަން މެޑަލެއް ހޯދަން ހިތްވަރަކަށްވާނެ،" ހުސެއިން ބުންޏެވެ.
ފަހަކަށް ވުރެން ގިނަ ވޯލްޑް ޗެމްޕިއަނުން ވެސް ވާދަކުރާ މި ފަހަރުގެ ކެރަމް ވޯލްޑް ކަޕްގައި، 17 ގައުމަކުން 150 އަށް ވުރެން ގިނަ ކުޅުންތެރިން ވާދަކުރާ ކަމަށް ކެރަމް އެސޯސިއޭޝަނުން ވަނީ ބުނެފަ އެވެ. ކެރަމް ވޯލްޑް ކަޕްގެ ޕްރޮމޯޝަނަށް ގިނަ ކަންތައްތަކެއް ކެރަމް އެސޯސިއޭޝަނުން އަންނަނީ ކުރިއަށްގެންދަމުންނެވެ.
