އޭޝިއަން ކަޕް ކޮލިފިކޭޝަންގައި ރާއްޖެއިން ޓިމޯ ލެސްޓޭ އަތުން 1-0 ގެ ނަތީޖާ އަކުން ބަލިވުމުން މާފަށް އެދުމަށް ފަހު ގައުމީ ޓީމާ ދުރަށް ދާން ކޯޗު އަލީ ސުޒޭން ނިންމައިފި އެވެ.
ޓިމޯ ލެސްޓޭ މެޗަށްފަހު، ސޯޝަލް މީޑިއާގައި ކުރި ޕޯސްޓެއްގައި ސުޒޭން ބުނީ ޓިމޯ ލެސްޓޭ މެޗުގައި ރާއްޖެއިން ކުޅުނީ ދަށް ކުޅުމެއް ކަމަށް ގަބޫލުކުރާ ކަމަށެވެ. އަދި އެކަމަށް ދިވެހި ފުޓުބޯޅަ އާއިލާގެ ކިބައިން މާފަށް އެދޭ ކަމަށް ސުޒޭން ބުންޏެވެ.
"އަޅުގަނޑު މި ޓީމާ އެކު ކުރި މަސައްކަތް މިހާ ހިސާބުން މި ނިމުނީ. އަދި ކުރިއަށް އޮތް ތަނުގައި މި ޓީމާއެކު މަސައްކަތް ކުރާ އެންމެން އަށް އަޅުގަނޑުގެ ހެޔޮ ދުއާތައް އޮންނާނެ ކަމުގައި ދަންނަވަން، " ސުޒޭން ބުންޏެވެ.
ސުޒޭން ބުނީ ދިވެހި ފުޓުބޯޅަ އުނދަގޫ ހާލަތެއްގައި އޮއްވަ ގައުމީ ޓީމާ އެކު މަސައްކަތް ކުރަން ލިބުން އެއީ ވަރަށް ބޮޑު ޝަރަފެއް ކަމުގަ އެވެ. އަދި، ކޯޗުކަމުގެ މަގާމުގައި ހުރި ދުވަސްތަކުގައި އެއްބާރުލުންދިން ކުޅުންތެރިންނާ، އޮފިޝަލުން އަދި މެނޭޖްމަންޓަށް ޝުކުރުއަދާ ކުރާ ކަމަށް ސުޒޭން ވަނީ ބުނެފަ އެވެ.
މިދިޔަ އޭޕްރީލް މަހު، އެފްއޭއެމް އިން ވަނީ ގައުމީ ޓީމަށް ކޯޗަކު ހޯދުމަށް އިއުލާނުކޮށްފަ އެވެ. އެއީ، މި މަހު ސާފް ޗެމްޕިއަންޝިޕާއި އޭޝިއަން ކަޕް ކޮލިފައިންއާ ދިމާކޮށް، ތިން މަހުގެ ކޮންޓްރެކްޓެއްގަ އެވެ. އެކަމަކު، ފަހުން، ސާފް ޗެމްޕިއަންޝިޕް އަންނަ އަހަރަށް ލަސްވުމާ ގުޅިގެން، އެފްއޭއެމް ނޯމަލައިޒިން ކޮމިޓީން ނިންމީ ދެ މެޗަށް އާ ކޯޗެއް ހޯދުމުގެ ބަދަލުގައި ސުޒޭނާ އެކު، ކުރިއަށްދިއުމަށެވެ.
ރާއްޖޭގެ އެންމެ ކާމިޔާބު އެއް ކޯޗު، ސުޒޭން ވަނީ ގައުމީ ޓީމުގައި އެންމެ ފަހުން މަސައްކަތްކުރި، ބިދޭސީ ދެ ކޯޗުން ކަމަށްވާ، ނެދަލެންޑްސްގެ މާޓިން ކޫޕްމަން އާއި އިޓަލީގެ ފްރެންޗެސްކޯ މޮރިއޭރޯގެ އެސިސްޓަންޓް އަކަށް މަސައްކަތްކޮށްފަ އެވެ. ކޫޕްމަން ވަކިކުރުމުން، 2021 ވަނަ އަހަރުގެ ސާފް ޗެމްޕިއަންޝިޕްގައި ސުޒޭން ވަނީ ގައުމީ ޓީމުގެ ހެޑް ކޯޗެއްގެ ޒިންމާ އުފުލައިފަ އެވެ. އޭގެ ފަހުން، މޮރިއޭރޯ ހަވާލުވީ 2021 ވަނަ އަހަރުގެ އޮކްޓޫބަރު މަހު ފަހުކޮޅުގަ އެވެ. އެ އަށް ފަހު، ސުޒޭން ހުރީ މޮރިއޭރޯގެ އެސިސްޓަންޓް އަކަށެވެ. މޮރިއޭރޯގެ ކޮންޓްރެކްޓް ހަމަވުމުން، 2023 ވަނަ އަަހަރުގެ އޮގަސްޓް މަހުން ފެށިގެން ގައުމީ ޓީމުގެ ކޯޗަކަށް މަސައްކަތް ކުރަމުން އަންނަނީ ސުޒޭން އެވެ.
މިދިޔަ އަހަރު ގައުމީ ޓީމުން ކުޅުނު އެކުވެރިކަމުގެ ދެ މެޗުގައި ބަންގްލަދޭޝާ ދެކޮޅަށް ވެސް ގައުމީ ޓީމުގެ ކޯޗަކަށް މަސައްކަތްކުރީ ސުޒޭން އެވެ. އަދި، މާޗް މަހު އިންޑިއާއާ ދެކޮޅަށް ރާއްޖޭން ކުޅުނު އެކުވެރިކަަމުގެ މެޗާއި އޭޝިއަން ކަޕް ކޮލިފައިންގައި ފިލިޕީންސާ ކުޅުނު މެޗުގައި ވެސް ޓީމަށް އިރުޝާދުދިނީ ސުޒޭން އެވެ. އިންޑިއާ އަތުން 3-0 އިން ބަލިވިއިރު، ފިލިޕީންސް އަތުން ބަލިވީ 4-1 އިންނެވެ.
މިއަދު، ޓިމޯ ލެސްޓޭ އަތުން ބަލިވިއިރު، މީގެ ފަސް ދުވަސް ކުރިން، ސިންގަޕޫރު އަތުން އެކުވެރިކަމުގެ މެޗަކުން ވަނީ 3-1 އިން ބަލިވެފަ އެވެ. އެހެންކަމުން، ސުޒޭންގެ އިރުޝާދުގެ ދަށުން ގައުމީ ޓީމުން އެންމެ ފަހުން ކުޅުނު ފަސް މެޗުން ވެސް ވަނީ ބަލިވެފަ އެވެ.
