މެންޗެސްޓާ (ޖެނުއަރީ 2) - ފްރާންސް ފުޓްބޯލްއިން ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާ އަށް ދޭ ބެލޮންޑިއޯ އެވޯޑް މިިދިޔަ އަހަރު ލިބެން ޖެހޭނީ ރެއާލް މެޑްރިޑްގެ ވިނީޝިއުސް ޖޫނިއާ އަށް ކަމަށް ބުނެ، ކްރިސްޓިއާނޯ ރޮނާލްޑޯ ދެއްކި ވާހަކަ އަށް ބެލޮންޑިއޯ އެވޯޑް ހޯދި މެންޗެސްޓާ ސިޓީގެ ރޮޑްރީ ރައްދުދީފި އެވެ.
ރޮޑްރީ އަށް މި ޓްރޮފީ ދިން ހަފްލާ އަށް ރެއާލް މެޑްރިޑުގެ ކުޅުންތެރިއަކު ވެސް އަދި އޮފިޝަލަކު ވެސް ހާޒިރެއް ނުވެ އެވެ. ރެއާލުން އެ ރަސްމިއްޔާތު ބޮއިކޮޓްކުރީ ޔުއެފާ އިން ނުފޫޒު ފޯރުވައިގެން، އެ އެވޯޑް ވިނީޝިއުސް ޖޫނިއާ އަށް ނުދީ ރޮޑްރީ އަށް ދިން ކަމަށް ސްޕެއިނުގެ މީޑިއާ އިން ތުހުމަތުކޮށްފައިވަނިކޮށެވެ. ބެލޮންޑިއޯ ފައިނަލް ވޯޓިން އަށް ބަލާއިރު، ރޮޑްރީ އަށް 1170 ޕޮއިންޓް ލިބުނެވެ. ދެ ވަނަ ހޯދި ވިނީޝިއުސް އަށް ލިބުނީ، 1129 ޕޮއިންޓެވެ.
ދާދި ފަހުން، ގްލޯބް ސްކޮ އެވޯޑްސްގައި، ރޮނާލްޑޯ ވާހަކަ ދައްކަމުން ބުނީ، ގްލޯބް ސޮކާގެ މޮޅު ފޯވާޑްގެ އެވޯޑާއި ފީފާ ބެސްޓް އެވޯޑްސް ލިބުނު ވިނީިޝިއުސް އަށް ބެލޮންޑިއޯ ވެސް ހައްގުވާ ކަމަށެވެ.
އެ ވާހަކަތަކާ ގުޅޭގޮތުން ސުވާލުކުރުމުން ރޮޑްރީ ބުނީ، ރޮނާލްޑޯ އެ ފަދަ ވާހަކަތަކެއް ދެއްކުމުން ލިބުނީ ހައިރާންކަން ކަމަށާއި އެންމެ ރަނގަޅަށް ބެލޮންޑިއޯ އެވޯޑް ދެނީ ކިހިނެއްކަން އެނގޭނެ މީހުންގެ ތެރޭގައި ރޮނާލްޑޯ ހިމެނޭނެ ކަަމަށެެވެ.
"މި އަހަރު އަހަންނަށް ބެލޮންޑިއޯ އެވޯޑް ލިބެންޖެހޭ ކަމަށް ދެކުނު ނޫސްވެރިން އަހަންނަށް ވޯޓު ލީ. ފަހަރުގައި ވެދާނެ އެއީ ރޮނާލްޑޯ އަށް ބެލޮންޑިއޯ ލިބުނު ފަހަރުތަކުގައި އޭނާ އަށް ވޯޓު ދިން ނޫސްވެރިން ކަމަށް ވެސް. އަހަންނަށް ހީވަނީ އޭރު އެ ކަމަށް އޭނަ އެއްބަސްވާނެހެން،" ރޮޑްރީ ބުންޏެވެ.
ރޮނާލްޑޯ ވަނީ ފަސް ފަހަރު ބެލޮންޑިއޯ އެވޯޑް ހޯދައިފަ އެވެ. ބެލޮންޑިއޯ އެވޯޑް 2010-2015 އަށް ދިނީ ފީފާ އެވޯޑާ އެއްކޮށްލައިގެން ފީފާ ބެލޮންޑިއޯގެ ގޮތުގަ އެވެ. ރޮނާލްޑޯ ބެލޮންޑިއޯ ހޯދާފައިވަނީ، 2008، 2013، 2014، 2016 އަދި 2017 ވަނަ އަހަރު އެވެ.
ފުޓްބޯޅައިގެ އެންމެ ދުވަސްވީ އަދި ޝަރަފްވެރި އެއް އެވޯޑް ކަމަށްވާ ބެލޮންޑިއޯ އަކީ 1956 ވަނަ އަހަރުން ފެށިގެން ދެމުން އަންނަ އެވޯޑެކެވެ. މި އެވޯޑް 1995 ވަނަ އަހަރާ ހަމަޔަށް ދިނީ ހަމައެކަނި ޔޫރަޕް ކުޅުންތެރިންނަށެވެ. އެކަމަކު، އޭގެ ފަހުން ވަނީ ޔޫރަޕުގެ ކްލަބަކަށް ކުޅޭ ދުނިޔޭގެ ކޮންމެ ކުޅުންތެރިޔަކަށް ވެސް ލިބޭ ގޮތަށް ބަދަލުކޮށްފަ އެވެ. އަދި ފަހުން 2007 ގައި ވަނީ ދުނިޔޭގެ ކޮންމެ ގައުމެއްގައި ކުޅޭ ޕްރޮފެޝަނަލް ކުޅުންތެރިންނަށް ވެސް ހުޅުވާލައިފަ އެވެ. ކޮވިޑް-19 ގެ ސަބަބުން 2020 ވަަނަ އަހަރު ބެލޮންޑިއޯ ހަފްލާ ނުބާއްވަ އެވެ.
ފްރާންސް ފުޓްބޯލް އިން ދޭ ބެލޮންޑިއޯ އެވޯޑަށް ވޯޓު ދިނުމުގެ ފުރުސަތު ދެނީ، އެކްރެޑިޓްކުރާ ނޫސްވެރިންނާއި ފުޓްބޯޅަ ކޯޗުންނަށެވެ.
