ދުބާއީ، ޔޫއޭއީ (ޑިސެމްބަރު 28) - ފްރާންސް ފުޓްބޯލް އިން ހޮވާ ދުނިޔޭގެ އެންމެ މޮޅު ފުޓްބޯޅަ ކުޅުންތެރިޔާ އަށް ދޭ ބެލޮންޑިއޯ އެވޯޑް ހައްގީ ރެއާލް މެޑްރިޑް އަށް ކުޅެމުން އަންނަ ބްރެޒިލްގެ ފޯވާޑް ވިނީޝިއުސް ޖޫނިއާ އަށް ކަމަށް ރެއާލްގެ ލެޖެންޑް ކްރިސްޓިއާނޯ ރޮނާލްޑޯ ބުނެފި އެވެ.
ގްލޯބް ސޮކާ އެވޯޑްސްގައި ވާހަކަ ދައްކަމުން ރޮނާލްޑޯ ބުނީ މި އަހަރުގެ ބެލޮންޑޯ ހައްގީ ރެއާލްއާ އެކު ޗެމްޕިއަންސް ލީގު ކާމިޔާބުކުރި ވިނީޝިއުސް އަށް ކަމަށެވެ. ގްލޯބް ސޮކާ އިން ހޮވި މޮޅު ފޯވާޑްގެ އެވޯޑްގެ އިތުރުން ފީފާ ބެސްޓް އެވޯޑްސް ވެސް ހޯދީ ވިނީޝިއުސް އެވެ.
"އަހަރެން ގަބޫލުކުރާ ގޮތުގައި އޭނާ (ވިނީޝިއުސް) އަށް ބެލޮންޑޯ އެވޯޑް ހައްގު. މި ފަހަރުގެ އެވޯޑް ފެއާ ކަމަށް އަހަރެން ގަބޫލެއް ނުކުރަން. އެ މީހުން އެވޯޑް ދިނީ ރޮޑްރީ އަށް. ރޮޑްރީ އަށް ވެސް އެވޯޑް ހައްގު. އެކަމަކު އަހަރެން ގަބޫލުކުރަނީ އެވޯޑް ލިބެން ޖެހެނީ ޗެމްޕިއަންސް ލީގު ކާމިޔާބުކޮށް އެ މުބާރާތުގެ ފައިނަލުގައި ގޯލު ޖެހި ވިނީޝިއުސް އަށް" ރޮނާލްޑޯ ބުންޏެވެ.
ވިނީޝިއުސް އަށް ބެލޮންޑިއޯ އެވޯޑް ނުލިބޭކަން އެނގުނު ހިސާބުން ރެއާލްގެ ކުޅުންތެރިންނާ އެ ޓީމުގެ މެނޭޖުމަންޓުން ވަނީ އެ ހަފްލާ ބޮއިކަޓްކޮށްފަ އެވެ.
އެ ފަހުން މި މަހު ދިން ފީފާ ބެސްޓް އެވޯޑް ވިނީޝިއުސް ވަނީ ކާމިޔާބު ކޮށްފަ އެވެ.
މި ހަފްލާގައި ވާހަކަ ދައްކަމުން ވިނީޝިއުސް ވަނީ ރޮނާލްޑޯ އޭނާ އަކީ އެންމެ މޮޅު ކުޅުންތެރިޔާ ކަމަށް ބުނާކަމަށްވަނީނަމަ އެނާ އަކީ މިވަގުތު ދުނިޔޭގައި ހުރި އެންމެ މޮޅު ކުޅުންތެރިޔާ ކަމަށް ގަބޫލުކުރާ ކަމަށެވެ.
