ލަންޑަން (ޑިސެމްބަރު 7) - ސައުދީ އަރަބިއްޔާ އިން 2034 ވަަނަ އަހަރު ފީފާ ވޯލްޑް ކަޕް ހޯސްޓްކުރަން ބިޑްކޮށްފައިވާއިރު، އެ އަށް ތާއީދުކުރުމާ މެދު އިނގިރޭސި އެފްއޭ އިން އަދިވެސް ގޮތެއް ނުނިންމާ ކަމަށް ބުނެފި އެވެ.
ފީފާ ވޯލްޑް ކަޕް 2034 ވަނަ އަހަރު ހޯސްޓްކުރުމަށް ބިޑްކޮށްފައިވާ ހަމައެކަނި ގައުމަކީ ސައުދީ އަރަބިއްޔާ އެވެ. އަދި 2030 ވަަނަ އަހަރުގެ ވޯލްޑް ކަޕްގެ ބޮޑުބައި، ސްޕެއިން، މޮރޮކޯ އަދ ޕޯޗުގަލްގައި ކުޅޭއިރު، ފުރަތަަމަ މެޗުތައް، އުރުގުއޭ، އާޖެންޓީނާ އަދި ޕެރަގުއޭގައި ކުޅޭ ބިޑެއް ވަނީ ހުށަހަޅައިފަ އެވެ.
ޖަރުމަނުން ވަނީ މި ދެ ވޯލްޑް ކަޕްގެ ބިޑަށް ވެސް ތާއީދުކުރާނެކަން އިއުލާނުކޮށްފަ އެވެ. އެކަމަކު، އިނގިރޭސި އެފްއޭ އިން އަދިވެސް ގޮތެއް ނުނިންމަ އެވެ. އިނގިރޭސި މީޑިއާ ރިޕޯޓްތައް ބުނާގޮތުން، އެފްއޭ އިން ނިންމާފައިވަނީ، ވަރަށް ފުޅާދާއިރާއެއްގައި ވިސްނުމަށް ފަހު މި ކަމަށް ގޮތެއް ނިންމުމަށެެވެ.
އެ ގޮތުން، ސައުދީ އަރަބިއްޔާއާ ގުޅޭގޮތުން ކުރެވޭ އިންސާނީ ހައްގުތައް ކަށަވަރުނުވާ ކަމުގެ ގިނަ ތުހުމަތުތަކާ ގުޅޭގޮތުން ވެސް މަޝްވަރާކުރާނެ އެވެ.
މިދިޔަ ހަފްތާގައި ފީފާ އިން ވަނީ ސައުދީ އަރަބިއްޔާގެ ވޯލްޑް ކަޕް ބިޑްގެ އިވެލުއޭޝަން ރިޕޯޓް އާންމުކޮށްފަ އެވެ. އެ ގޮތުން، އެ އިވެލުއޭޝަނުގައި ސައުދީ އަށް ވަނީ 5 އަކުން، 4.2 ލިބިފަ އެވެ. މިއީ މިހާތަނަށް ވޯލްޑް ކަޕް ބިޑަކަށް ލިބުނު އެންމެ ބޮޑު ސްކޯ އެވެ. އެ އިވެލުއޭޝަން ރިޕޯޓްގައި ސައުދީގެ ހިއުމަން ރައިޓްސް ކަަށަވަރުވާ މިންގަނޑަށް ވަނީ އެކަށީގެންވާ މާކުހެއް ލިބިފަ އެވެ.
ފީފާ އިން 2030 އާއި 2034 ގެ ވޯލްޑް ކަޕް ބާއްވާނެ ގައުމެއްގެ ވޯޓަށް އަހާނީ އެކުއެކީގަ އެވެ.
