މެންޗެސްޓާ (ނޮވެމްބަރު 20) - މެންޗެސްޓާ ސިޓީގައި އިތުރު އެއް ސީޒަނަށް މަޑުކުރަން އެ ޓީމުގެ ކޯޗު ޕެޕް ގާޑިއޯލާ ނިންމައިފި އެވެ.
ގާޑިއޯލާ، 53، އެންމެ ފަހުން ސިޓީއާ އެކު ހަދާފައިވާ އެއްބަސްވުން މި ސީޒަނުގެ ނިޔަލަށް އޮތީ ހަމަވާގޮތަށެވެ. ގިނަ މަޝްވަރާތަކަށް ފަހު، ސިޓީން ދިން އާ ކޮންޓްރެކްޓްގައި ގާޑިއޯލާ ސޮއިކުރަން ނިންމިއިރު، އެއެއްބަސްވުމުގައިވާ ގޮތުން، އަދިވެސް އިތުރު އެއް އަހަރަށް ސިޓީގައި ގާޑިއޯލާ މަޑުކުރެވޭނެ އެވެ.
ބަޔާން މިއުނިކާއި ބާސެލޯނާ އަށް ކުރިން ކޯޗުކޮށްދިން ގާޑިއޯލާ، ސިޓީއާ އެކު މި ސޮއިކުރާ އެއްބަސްވުމާ އެކު، އެ ކްލަބްގަައި އޭނާ 10 އަހަރުވާނެ އެވެ. މިއީ، ގާޑިއޯލާގެ ކެރިއަރުގައި އެންމެ ގިނަ އަހަރު އެއް ކްލަބެއްގައި މަޑުކުރާ ފަހަރެވެ.
ސިޓީގެ ކޯޗުކަމާ 2016 ވަނަ އަހަރު ހަވާލުވި ގާޑިއޯލާ ވަނީ އެ ޓީމަށް 18 ޓްރޮފީ ހޯދައިދީފަ އެވެ. އޭގެ ތެރޭގައި ހަ ޕްރިމިއާ ލީގު ތަށްޓާއި ޗެމްޕިއަންސް ލީގުގެ އިތުރުން، ފީފާ ކްލަބް ވޯލްޑް ކަޕް ހިމެނެ އެވެ. ގާޑިއޯލާ ވަނީ ސިޓީ އަށް ޖެހިޖެހިގެން ހަތަރު ޕްރިމިއާ ލީގު ތަށި ހޯދައިދީ، އެ ކާމިޔާބީ ހާސިލްކުރި ފުރަތަމަ ޓީމުގެ ޝަރަފް ވެސް ހޯދައިދީފަ އެވެ.
މިއީ ސިޓީއާ ގުޅުނު ފަހުން ގާޑިއޯލާ ކޮންޓްރެކްޓް އާ ކުރާ ހަަތަރު ވަނަ ފަހަރެވެ. އެންމެ ފުރަތަމަ ސިޓީގެ ކޮންޓްރެކްޓް އާ ކުރީ 2018 ވަނަ އަހަރު މެއި މަހު އެވެ. އޭގެ ފަހުން، 2020 ވަނަ އަހަރު ނޮވެމްބަރު މަހު އަދި 2022 ވަނަ އަހަރު ނޮވެމްބަރު މަަހު ސިޓީގެ ކޮންޓްރެކްޓް އާ ކުރި އެވެ.
ޕްރިމިއާ ލީގުގެ ކްލަބްތަކުގައި މި ވަގުތު ތިބި ކޯޗުންނަށް ބަލާއިރު، އެއް ކްލަބެއްގައި އެންމެ ގިނަ ދުވަސްވި ކޯޗަކީ ގާޑިއޯލާ އެވެ. ސިޓީ، އެންމެ ފަހުން ކުޅުނު ހަތަރު މެޗުން ބަލިވެފައިވާއިރު، މިއީ ގާޑިއޯލާގެ ކެރިއަރުގައި މި ފަދަ ކަމަކާ ކުރިމަތިލާން ޖެހުނު ފުރަތަމަ ފަހަރެވެ.
ބްރެޒިލްގެ ގައުމީ ޓީމުގެ ކޯޗަކަށް ގާޑިއޯލާ ގެންދަން މަސައްކަތްކުރަމުން އަންނަ ވާހަކަ އޭނާ ވަނީ ދޮގުކޮށްފަ އެވެ.
