ރިއޯ ޑި ޖަނެއިރޯ، ބްރެޒިލް (ނޮވެމްބަރު 12) - މެންޗެސްޓާ ސިޓީގެ ކޯޗު ޕެޕް ގާޑިއޯލާ އަށް ބްރެެޒިލް ގައުމީ ފުޓްބޯޅަ ޓީމުގެ ކޯޗުކަން އޮފާކުރި ވާހަކަ ބްރެޒިލްގެ ފުޓްބޯޅަ ފެޑެރޭޝަނުން ދޮގުކޮށްފި އެވެ.
މި ސީޒަނުގެ ނިޔަލަށް ސިޓީގެ ކޮންޓްރެކްޓްގައި ހުރި ގާޑިއޯލާ އަށް އިންގްލެންޑް ކޯޗުކަން އޮފާކުރި ވާހަކަ ވެސް މީޑިއާގައި ދެކެވުނެވެ. އެކަމަކު، ޖެނުއަރީ އެއް ވަނަ ދުވަހު އެ މަގާމާ ހަވާލުވާ ގޮތަށް ޖަރުމަނުގެ ކޯޗު ތޯމަސް ޓުޗެލްއާ އެކު، އިނގިރޭސި އެފްއޭ އިން ވަނީ އެއްބަސްވުން ހަދައިފަ އެވެ.
ބްރެޒިލާއި ސްޕެއިނުގެ މީޑިއާތަކުގައި، ގާޑިއޯލާ އަށް ބްރެޒިލްގެ ކޯޗުކަން ހުށަހަޅާފައިވާ ކަމަށް ވަނީ ރިޕޯޓްކޮށްފަ އެވެ. އެކަމަކު، ބްރެޒިލް ފުޓްބޯޅަ ފެޑެރޭޝަނުގެ ރައީސް، އެޑްނާލްޑޯ ރޮޑްރިގޭޒް ވަނީ އެ ވާހަކަތަކުގައި ހަގީގަތެއް ނެތް ކަމަށް ވިދާޅުވެފަ އެވެ.
"ގާޑިއޯލާ އަކީ ދުނިޔޭގެ އެންމެ މޮޅު އެއް ކޯޗު، އެކަމަކު، އަހަރެމެން އޭނާ ގެންނަން އެއްވެސް މަޝްވަރާއެއް ކޮށްފައިނުވާނެ،" އީއެސްޕީއެން ބްރެޒިލް އަށް އެޑްނާލްޑޯ ދިން އިންޓަވިއުއެއްގައި ބުނެފައިވެ އެވެ.
ބްރެޒިލުން އެންމެ ބޮޑަށް ގެންނަން މަސައްކަތްކުރި ކޯޗު، ކާލޯ އަންޗެލޮޓީ މިދިޔަ އަހަރު ނިންމީ ރެއާލް މެޑްރިޑްގެ ކޮންޓްރެކްޓް އާ ކުރުމަށެވެ. ބްރެޒިލުން މި އަހަރު ޖެނުއަރީ މަހު ހަމަޖެއްސި ކޯޗު ޑޮރިވާލް ޖޫނިއާގެ ކޯޗުކަމުގައި ދަށްކޮށް ފަށަން ޖެހުނުއިރު، މަޑުމަޑުން ރަނގަޅު މިސްރާބަށް ދާ ކަމަށް އެޑްނާލްޑޯ ވަނީ ވިދާޅުވެފަ އެވެ.
"ޑޮރިވާލް އާއި އޭނާގެ ކޯޗިން ސްޓާފުންނާ އެކު އަހަރެމެން މި މަސައްކަތް ކުރަނީ. އަހަރެމެން އޭނާއާ އެކު ކޮންޓްރެކްޓެއް އެބައޮތް 2026 ވަނަ އަހަރުގެ ވޯލްޑް ކަޕާ ހަމައަށް. ދެން، އެ ހިސާބަށް ޓީމުގައި އޭނާ ހުންނާނެތޯ އޭގެ ޖަވާބު ދެވޭނީ ވެސް އޭނަ އަށް،" އެޑްނާލްޑޯ ވިދާޅުވި އެވެ.
ވޯލްްޑް ކަޕް ކޮލިފައިން ދެކުނު އެމެރިކާގެ ބުރުގައި، ބްރެޒިލް އޮތީ ހަތަރު ވަނައިގަ އެވެ. ކޮލިފައިންގައި ކުޅުނު 10 މެޗުގެ ތެރެއިން ހަތަރު މެޗުން އެ ޓީމު ބަލިވެފައިވާއިރު، މިއީ ކޮލިފިކޭޝަނަކަށް ބަލާއިރު، ބްރެޒިލަށް އެންމެ ގޮންޖެހުން ބޮޑު ފަހަރެވެ.
