ކަޒަކްސްތާންގެ އަސްތާނާގައި މާދަމާ ފަށާ 27 ވަނަ އިންޓަނޭޝަނަލް ޓޭބަލް ޓެނިސް ފެޑެރޭޝަން (އައިޓީޓީއެފް)، އޭޝިއަން ޗެމްޕިއަންޝިޕްގައި ވާދަކުރަން ގައުމީ ޓޭނަލް ޓެނިސް ޓީމު ތައްޔާރުވެއްޖެ އެވެ.
އެ ގޮތުން، މާދަމާ އިން ފެށިގެން މި މަހުގެ 13 ވަނަ ދުވަހުގެ ނިޔަލަށް ކުރިއަށްދާ މި މުބާރާތުގައި ވާދަކުރާ ގައުމީ ޓީޓީ ޓީމުގައި ހިމެނެނީ، އަށް ކުޅުންތެރިންނެވެ. އެއީ، ހަަތަރު އަންހެން ކުޅުންތެރިންނާއި ހަތަރު ފިރިހެން ކުޅުންތެރިންނެވެ.
އޭޝިއާ މުބާރާތުގައި ވާދަކުރާ ޓީޓީ ޓީމުގައި ހިމެނޭ ކުޅުންތެރިންނަށް ބަލާއިރު، އަންހެން ސްކޮޑުގައި ހިމެނެނީ، ފާތިމަތު ދީމާ އަލީ، އައިޝަތު ރަފާ ނާޒިމް، މިޝްކާ މުހައްމަދު އިބްރާހިމް އަދި ލައިސާ ފަތުހުﷲ އިސްމާއިލް އެވެ.
އޭޝިއާ މުބާރާތުގައި ވާދަކުރާ ގައުމީ ޓީޓީ ޓީމު.
ފިރިހެން ސްކޮޑުގައި ހިމެނެނީ، އެންމެ ފަހުގެ ގައުމީ ޗެމްޕިއަންކަން ހޯދި، އަހްޔާރު އަހުމަދު ހާލިދުގެ އިތުރުން، ތަޖުރިބާކާރު ކުޅުންތެރިޔާ، މުންސިފް އަހުމަދު، މުހައްމަދު ޝައްފާން އިސްމާއިލް އަދި ޒީކް ހަސަން ލަތީފް އެވެ.
އަސްތާނާގެ ދައުލަތު ސްޕޯޓްސް ކޮމްޕްލެކްސްގައި ކުރިއަށްދާ އޭޝިއާގެ މި މުބާރާތަކީ އަންނަ އަހަރު ބާއްވާ ދުނިޔޭގެ ޓޭބަލް ޓެނިސް މުބާރާތުގެ ކޮލިފިކޭޝަން އިވެންޓެއްގެ ގޮތުގައި ކުރިއަށްދާ މުބާރާތެކެވެ. މި މުބާރާތުގައި ފިރިހެން 24 ޓީމާއި އަންހެން 20 ޓީމު ވާދަކުރާ ކަމަށް އޭޝިއާގެ މައި ޓީޓީ ޖަމިއްޔާ އިން މީޑިއާ އަށް ވަނީ މައުލޫމާތުދީފަ އެވެ.
