ކޮލަމްބޯ، ސްރީ ލަންކާ (އޮކްޓޫބަރު 4) - ސްރީ ލަންކާގެ ގައުމީ ކްރިކެޓް ޓީމުގެ ސްޕިނަރު، ޕްރަވީން ޖަޔަވިކްރަަމަ، މެޗު ފިކްސް ކުރި ކަމަށް އެއްބަސްވުމުން އޭނާ އެއް އަހަރު ދުވަހަށް ސަސްޕެންޑްކުރަން ނިންމައިފި އެވެ.
ޖަޔަވިކްރަމަ އަށް ފިޔަވަޅު އަޅަން އިންޓަނޭޝަނަލް ކްރިކެޓް ކައުންސިލް (އައިސީސީ) އިން ނިންމީ އެންޓި ކޮރަޕްޝަން ކޯޑާ ހިލާފުވެ، ތިން މައްސަލައެއް ފާހަގަކުރެވުމުންނެވެ. އެ ގޮތުން، ޖަޔަވިކްރަމަ، 26، އަށް މެޗު ފިކްސް ކުރަން ހުށަހެޅުމުން އެ ވާހަކަ ހިއްސާ ނުކުރި މައްސަލަ އާއި ތަހުގީގުގައި ފުރަތަމަ އެއްބާރުލުން ނުދިނުމާއި މި ކަމުގައި ބައިވެރިވެފައިވާތީވެ، ފިޔަވަޅު އަޅަން އައިސީސީން ނިންމީ އެވެ.
ތަހުގީގުގެ ވަކި ހިސާބަކުން އެއްބާރުލުން ދީ ޖަޔަވިކްރަމަ ކުރެވުނު ކުށަށް އިއުތިރާފުވުމުން، އޮންނަ އުސޫލުގެ ތެރެއިން، އައިސީސީން ވަނީ، އޭނާގެ އަދަބު ލުއި ކޮށްދީފަ އެވެ. އެ ގޮތުން، އެއް އަހަރަށް ކުރި ސަސްޕެންޝަންގައި އޭނާ ތަންފީޒުކުރަން ޖެހޭނީ ހަ މަސް ދުވަހުގެ ސަސްޕެންޝަނެވެ. ބާކީ ހަ މަސް ދުވަހުގެ އެ ސަސްޕެންޝަން ތަންފީޒުކުރަން ޖެހޭނީ އެ ފަދަ މައްސަލައެއް ތަކުރާރުވެއްޖެނަމަ އެެވެ.
ޖަޔަވިކްރަމަ، މެޗު ފިކްސްކޮށްފައިވަނީ، ލަންކާ ޕްރިމިއާ ލީގުގެ މެޗެއްގައި 2021 ވަނަ އަހަރު އެވެ. އެ އަހަރު ލަންކާ ގައުމީ ޓީމަށް އޭނާ ކުޅެން ފެށިއިރު، ފުރަތަމަ ޓެސްޓް މެޗުގައި ބަންގްލަދޭޝާ ދެކޮޅަށް 11 ވިކެޓް ނެގި އެވެ.
އެ ފަހުން، ޖަޔަވިކްރަމަ ވަނީ ލަންކާ ޓީމަށް ފަސް ޓެސްޓް މެޗާއި ފަސް ވަން ޑޭ އިންޓަނޭޝަނަލް (އޯޑީއައި) މެޗާއި ފަސް ޓީ20 އިންޓަނޭޝަނަލް މެޗު ކުޅެފަ އެވެ. އެންމެ ފަހުން، އޭނާ ލަންކާ އަށް މެޗެއް ކުޅުނީ 2022 ވަނަ އަހަރުގެ ޖޫން މަހުގަ އެވެ. އޭނާ އަށް މެޗުތަކުން ފުރުސަތު ގެއްލުނީ މި މެޗު ފިކްސިންގެ މައްސަލައިގެ ތުހުމަތު އަމާޒުވި ހިސާބުންނެވެ.
