ލަންޑަން (ސެޕްޓެމްބަރު 30) - މެންޗެސްޓާ ސިޓީގެ ކޯޗު ޕެޕް ގާޑިއޯލާ އަށް އަބަދުވެސް އިހުތިރާމްކުރާ ކަމަށާއި އޭނާ އާއި ދެމެދު ފިތުނަ އުފެދޭ ގޮތަށް ވާހަކަ ފެތުރުމަކީ އެހެން ބަޔަކު ކުރާ ކަމެއް ކަމަށް އާސެނަލްގެ ކޯޗު މިކޭލް އާޓެޓާ ބުނެފި އެވެ.
މިދިޔަ ހަފްތާގައި އިނގިރޭސި ޕްރިމިއާ ލީގުގައި އާސެނަލާއި މެންޗެސްޓާ ސިޓީ ކުޅުނު މެޗު 2-2 އިން އެއްވަރުވިއިރު، އެ މެޗަށް ފަހު ދެ ޓީމުގެ ދެމެދުގައި އަންނަނީ ބަހުގެ ހަމަލާތައް ބަދަލުކުރަމުންނެވެ.
އެ ގޮތުން، އޭރު އާޓެޓާ ވަނީ ސިޓީގައި އޭނާ ހަތަރު އަހަރު ހޭދަކުރި ކަމަށާއި އެ ތަނުގައި ހިނގާ ކަންތައްތައް އޭނާ އަށް އެނގޭ ކަމަށް ބުނެފަ އެވެ. އެއީ، އޭނާ ގާޑިއޯލާގެ އެސިސްޓަންޓް ކޯޗެއްގެ ގޮތުގައި މަސަައްކަތްކުރިއިރު، ފެނިފައިވާ ކަންކަމަށް ބަލައިފަ އެވެ. އެ އަށް ދިން ރައްދުގައި ގާޑިއޯލާ ބުނީ، މީޑިއާގައި ވާހަކަ ދައްކާއިރު ބުނާ އެއްޗެއް ފުރިހަމަ އަށް އޮޅުންފިލާނެ ގޮތަށް ވާހަކަ ދެއްކުމަށެވެ.
ގާޑިއޯލާގެ އެ ރައްދާ ބެހޭގޮތުން، އާޓެޓާއާ ސުވާލުކުރުމުން، އޭނާ ބުނީ، ސިޓީގެ ކަންކަން އެނގޭ ކަމަށް އޭނާ ބުނީ، އެ ކްލަބުން ކާމިޔާބު ހޯދުމަށް ކުރާ މަސައްކަތް އެނގޭ ކަމަށެވެ. އަދި ގާޑިއޯލާ ޓީމުގެ ކަންކަން ރަނގަޅު ކުރަން ކުރާ މަސައްކަތް އެންމެ ރަނގަޅަށް އެނގޭނެ ފަރާތަކީ އޭނާ ކަމަށް ވެސް އާޓެޓާ ވަނީ ބުނެފަ އެވެ.
"ގާޑިއޯލާ ބަލައިގަންނަން އަހަރެންގެ އުމުރުން 10 އަހަރުން ފެށިގެން. އަހަންނަށްޓަކައި އޭނާ ކޮށްދިން ކަންތަކަށް އަދި ކޮށްދެމުން އަންނަ ކަންތަކަށް އަބަދުވެސް ޝުކުރުވެރިވާނަން،" އާޓެޓާ ބުންޏެވެ.
"ފިތުނަ އުފައްދައިގެން އަހަރެމެންގެ މި ގުޅުން ހަލާކުކޮށްލަން ބަޔަކު މަސައްކަތް ކުރުމަކީ އަހަރެމެން އަތުގައި އޮތް ކަމެއް ނޫން، ސިޓީއާ މެދު އަހަރެންގެ އެއްވެސް ހިތްބުރަކަމެއް ނެތް. ސިޓީގެ ސްޓާފުންނާއި ވެރިންނާ މިހާރު ވެސް އަހަންނަށް އެންމެ ރަނގަޅަށް ވާހަކަ ދެއްކޭނެ،"
ގާޑިއޯލާ ބުނީ، އާސެނަލުން ބޭނުންވަނީ ސިޓީ ރުޅިއަރުވާލައިގެން މިއީ ހަނގުރާމައެއް ފަދަ ވާދަވެރިކަމަކަށް ހެދުން ކަމަށްވާނަމަ އެ ކަމަށް އެ ޓީމުން ވެސް ތައްޔާރު ކަމަށެވެ.
