މެޑްރިޑް (ސެޕްޓެމްބަރު 30) - ސްޕެނިޝް ލީގުގެ އެންމެ ފަހުގެ ޗެމްޕިއަން، ރެއާލް މެޑްރިޑާ ދެކޮޅަށް އެތުލެޓިކޯ މެޑްރިޑުން ކުޅުނު މެޗުގައި ފަހު ވަގުތު ލަނޑު ޖަހައި ވަނީ 1-1 އިން އެއްވަރުކޮށްފި އެވެ.
މި ނަތީޖާއާ އެކު، ސްޕެނިޝް ލީގުގައި މި ފަހަރު ކޮންމެ ޓީމަކުން އަށް މެޗު ކުޅުނުއިރު، ބަލިނުވެ އޮތް ހަމައެކަނި ދެ ޓީމަކީ ރެއާލާއި އެތުލެޓިކޯ އެވެ.
ލީގުގެ އެއް ވަނައިގައި އޮތް ބާސެލޯނާ މި ހަފްތާގައި ބަލިވުމުން، ރޭގެ މެޗުން މޮޅުވެގެން، ރެއާލަށް އެއް ވަނަ މަގާމާ އެއް ޕޮއިންޓަށް ގާތަށް ޖެހިލެވެން އޮތެވެ. އެކަމަކު، އެއްވަރުވުމުން، ފަރަގަކީ ތިން ޕޮއިންޓެވެ. ބާސެލޯނާ އަށް އަށް މެޗުން 21 ޕޮއިންޓް ލިބިފައިވާއިރު، ރެއާލަށް އަށް މެޗުން ވަނީ 18 ޕޮއިންޓް ލިބިފަ އެވެ. އަދި ތިން ވަނައިގައި އޮތް އެތުލެޓިކޯ އަށް ވަނީ އަށް މެޗުން 16 ޕޮއިންޓް ލިބިފަ އެވެ.
އެތުލެޓިކޯގެ ވަންޑާ މެޓްރޮޕޮޮލިޓާނޯ ސްޓޭޑިއަމްގައި ކުޅުނު މެޗު ފަށައިގެން އެ ޓީމުގެ ޖޫލިއަން އަލްވަރޭޒް ޖެހި ޝޮޓެއް ރެއާލްގެ ކީޕަރު ތިބޯ ކޯޓުއާ ވަނީ މަތަކޮށްފަ އެވެ. ރެއާލްގެ ފެޑެރީކޯ ވަލްވޭޑޭ ޖެހި ބޯޅަ އެތުލެޓިކޯގެ ކީޕަރު ޖެން އޮބްލަކް ވަނީ ހުއްޓުވައިފަ އެވެ.
ލަނޑެއް ޖަަހަން ރެއާލުން ކުރި މަސައްކަތް ކާމިޔާބުވީ، 64 ވަނަ މިނިޓްގަ އެވެ. ރެއާލްގެ ވިނީޝިއުސް ޖޫނިއާ ނެގި ބޯޅައެއް އޭރިއާތެރެއިން ކޮންޓްރޯލް ކުރުމަށް ފަހު، އެޑާ މިލިޓާއޯ ޖެހި ޝޮޓް ވަނީ ގޯލަށެވެ. އެ ބޯޅަ ގޯލަށް ވަނީ، އެތުލެޓިކޯގެ މާކޯސް ލޮރެންޓޭ ފައިގައި ޖެހިފަ އެވެ.
ރެއާލުން ލީޑުނެގިތަނާ އެތުލެޓިކޯގެ ސަޕޯޓަރުން ދަނޑަށް އެއްޗެހި އުކަން ފެށުމުން މެޗު ވަގުތީ ގޮތުން މެދުކަނޑާލި އެވެ. މެޗު އަލުން ފެށުނީ އެތުލެޓިކޯގެ ކުޅުންތެރިންނާއި ކޯޗު ޑިއޭގޯ ސިމިއޯނީގެ ޓީމުގެ ސަޕޯޓަރުންނާ ވާހަަކަ ދައްކައިގެން ހާލަތު ބަދަލުކުރުމުންނެވެ.
އަނިޔާގެ ސަބަބުން ރެއާލްގެ ތަރި، ކީލިއަން އެމްބާޕޭ ނުލައި، ކުޅުނު މި މެޗުގައި ރެއާލުން ދެ ވަނަ ލަނޑެއް ޖަހަން ވިނީޝިއުސް ޖެހި ބޯޅަ ކީޕަރު އޮބްލަކް ވަނީ މަތަކޮށްފަ އެވެ. އޭގެ ފަހުން، ބަދަލަކަށް ކުޅެން އަރައި، އެންޑްރިކް އޭރިއާބޭރުން ޖެހި ޝޮޓް ދިޔައީ ދަނޑިކައިިރިން ބޭރުންނެވެ.
އެތުލެޓިކޯ އިން އެއްވަރުކުރީ މެޗުގެ އިތުރު ވަގުތުގެ ފަސް ވަނަ މިނިޓްގައި އެންހެލް ކޮރޭއާ ޖެހި ގޯލުންނެވެ. މި ލަނޑު ފުރަތަމަ އޮފްސައިޑް ކަމަށް ނިންމި ނަމަވެސް، ވީޑިއޯ އެސިސްޓަންޓް ރެފްރީ (ވީއޭއާރް) އިން ބެލުމަށް ފަހު ނިންމީ، ރަނގަޅު ގޯލެއް ކަމަށެވެ.
އިތުރު ވަގުތުގެ ނުވަ ވަަނަ މިނިޓްގައި އެތުލެޓިކޯގެ ލޮރެންޓޭ އަށް ވަނީ ރަތް ކާޑެއް ދައްކައިފަ އެވެ. އެ ގޮތުން، ރެއާލްގެ ފްރާން ގާސިއާ އަށް ކުރި ފައުލަކަށް ފުރަތަމަ ލޮރެންޓޭ އަށް ރީނދޫ ކާޑެއް ދެއްކިއިރު، ވީއޭއާރް އިން ބެލުމަށް ފަހު، ނިންމީ ރަތެއް ކަމަށެވެ.
ރެއާލުން ލީގުގައި ބަލިނުވެ މި ވަނީ 40 މެޗު ހަމަކޮށްފަ އެވެ. އެންމެ ފަހުން ރެއާލް ލީގުގައި ބަލިވީ، 2023 ވަނަ އަހަރު ސެޕްޓެމްބަރު މަހު، އެތުލެޓިކޯ އަތުންނެވެ.
