މެންޗެސްޓާ (ސެޕްޓެމްބަރު 30) - އިނގިރޭސި ޕްރިމިއާ ލީގުގައި ރޭ މެންޗެސްޓާ ޔުނައިޓެޑް ދަނޑުގައި އެ ޓީމު އަތުން 3-0 އިން ޓޮޓެންހަމް ހޮޓްސްޕާސް މޮޅުވެއްޖެ އެވެ.
މި މެޗު ފަށައިގެން، ތިން ވަނަ މިނިޓްގައި ޓޮޓެންހަމް އިން ލީޑުނެގި އެވެ. މި ލަނޑު ޖެހީ، ޓޮޓެންހަމްގެ ޑިފެންޑަރު، މިކީ ވެން ޑަ ވެން، އަމިއްލަ ހާުފުގެ ތެރެއިން ބޯޅަ ހިފައިގެން ގޮސް ޔުނައިޓެޑް އޭރިއާތެރަށް ވަދެ، ހުސްކޮށްލާފައި ނަގައިދިން ބޯޅަ ބްރެނަން ޖޯންސަން ވަނީ ގޯލަށް ފޮނުވާލައިފަ އެެވެ.
ޓޮޓެންހަމް އަށް ލީޑުފުޅާކޮށްދޭން ޖޯންސަން ޖެހި ބޯޅަ އަމާޒުވީ ގޯލުގެ ދަނޑިއަށެވެ. އަދި ޓީމޯ ވާނާ އަށް މުޅިން ހުސްކޮށް ލިބުނު ފުރުސަތުގައި ގޯލަށް ބޯޅަ ފޮނުވައިނުލެވުނެވެ.
ޔުނައިޓެޑުން ފުރަތަމަ ހާފުގައި ފޮނުވާލި އެންމެ ނުރައްކާތެރި ހަމަލާ އަކީ އޭރިއާތެރެއިން އަލެހަންދްރޯ ގާނާޗޯ ޖެހި ޝޮޓެވެ. އޭނާ ވޮލީ އަކުން ފޮނުވާލި ބޯޅަ އަމާޒުވީ ގޯލުގެ އަރިމަތީ ދަނޑިއަށެވެ.މެޗުގައި ޔުނައިޓެޑަށް މައްސަލަ ދިމާވީ 42 ވަނަ މިނިޓްގައި އެ ޓީމުގެ ކެޕްޓަން، ބްރޫނޯ ފެނާންޑޭސް އަށް ސީދާ ރަތް ކާޑެއް ދެއްކުމުންނެވެ. ފެނާންޑޭސް އަށް ރަތެއް ދެއްކީ، ޖޭމްސް މެޑިސަން އަށް ނުރައްކާތެރި ފައުލެއް ކުރުމުންނެވެ.
ކެޕްޓަން ސޮން ހެއުން މިން އަށް ދިމާވި އަނިޔާގެ މައްސަލައެއްގެ ސަބަބުން އޭނާ ނުލައި ކުޅެން ޖެހުނު ޓޮޓެންހަމް އިން ވަނީ ދެ ވަނަ ހާފު ފެށިގެން ދެ ވަނަ މިނިޓްގައި ލީޑުފުޅާކޮށްފަ އެވެ. އޭރިއާތެރެއިން ޓޮޓެންހަމްގެ ޑޭޖާން ކުލުސެވްސްކީ އަށް ލިބުނު ބޯޅަ އޭނާ ވަނީ ޔުނައިޓެޑްގެ ކީޕަރު، އަންދްރޭ އޮނާނާ އަތްމަތިން ގޯލަށް ފޮނުވާލައިފަ އެވެ.
ޓޮޓެންހަމް އިން ތިން ވަަނަ ގޯލު ޖެހީ މެޗުގެ 77 ވަނަ މިނިޓްގަ އެވެ. މިއީ ކޯނަރެއްގައި ޓޮޓެންހަމްގެ ޕަޕޭ ސާ ޖައްސާލި ބޯޅައެއް ގޯލަށް ފޮނުވާލައިގެން، ޑޮމިނިކް ސޮލާންކޭ ޖެހި ލަނޑެކެވެ.
މެޗަށް ފަހު، ޔުނައިޓެޑްގެ ކޯޗު އެރިކް ޓެން ހާގް ވަނީ ފެނާންޑޭސް އަށް ރަތް ކާޑު ދެއްކި ހިސާބަކީ މެޗުގެ ކަންކަން ބަދަލުވި ސަބަބު ކަމަށް ބުނެފަ އެވެ. އަދި މި ނަތީޖާ އަކީ ބަަލައިގަންނަން އުނދަގޫ ކަމެއް ކަމަށް ވެސް ވަނީ ބުނެފަ އެވެ.
ކުޅުނު ހަ މެޗުން ހަތް ޕޮއިންޓާ އެކު، ޔުނައިޓެޑް އޮތީ ލީގުގެ 12 ވަނައިގަ އެވެ. މި މޮޅާ އެކު، ޓޮޓެންހަމް ވަނީ، ހަ މެޗުން 10 ޕޮއިންޓާ އެކު އަށް ވަނަ އަށް ޖެހިލައިފަ އެވެ.
