ލިވަޕޫލް (ސެޕްޓެމްބަރު 26) - އިނގިރޭސި ލީގު ކަޕްގައި ރޭ ލިވަޕޫލާއި އާސެނަލް ކުޅުނު މެޗުތަކުން މޮޅުވެ މުބާރާތުގެ ގަދަ 16 ބުރުުން ފުރުސަތު ހޯދައިފި އެވެ.
އަމިއްލަ ދަނޑުގައި ކުޅުނު ލިވަޕޫލުން ވަނީ ފަަހަތުން އަރައި 5-1 އިން ވެސްޓް ހޭމް ޔުނައިޓެޑް ބަލިކޮށްފަ އެވެ. އަދި އާސެނަލުން އަމިއްލަ ދަނޑުގައި ކުޅުނު މެޗުން ބޯލްޓަން ވެންޑަރާސް އަތުން މޮޅުވީ 5-1 އިންނެވެ.
ލިވަޕޫލްގެ އެންފީލްޑް ސްޓޭޑިއަމްގައި ރޭ ވެސްޓް ހޭމް އިން ލީޑުނެގީ، 21 ވަަނަ މިނިޓްގައި ލިވަޕޫލްގެ ޑިފެންޑަރު، ޖަރެލް ކުއަންސާ އަތުން ބައިކޮޅަށް ވަން ގޯލުންނެވެ. އޭގެ ހަތަރު މިނިޓް ފަހުން، ޑިއޯގޯ ޖޮޓާ ވަނީ ލަނޑެއް ޖަހައި، ލިވަޕޫލަށް އެއްވަރުކޮށްދީފަ އެވެ. މިއީ، ފެޑެރީކޯ ކިއޭސާ ޖެހި އެކްރަބެޓިކް ކިކަކުން ޖޮޓާ އަށް ލިބުނު ބޯޅައިގައި ބޮލުން ޖެހި ގޯލެކެވެ.
ދެ ވަނަ ހާފް ފެށިގެން ހަތަރު މިނިޓް ތެރޭ ލިވަޕޫލުން ވަނީ ލީޑުނަގައިފަ އެވެ. މިއީ، އެ ޓީމުގެ ކާޓިން ޖޯންސް ދިން ބޯޅައަކުން ޖޮޓާ ޖެހި ގޯލެކެވެ. އޭގެ ފަހުން، ވެސްޓް ހޭމް އިން ޕެނަލްޓީ އަކަށް ގިނަ ފަހަރުތަކެއްގެ މަތިން އެޕީލްކޮށްފަ އެވެ. އެކަމަކު، ރެފްރީ ނިންމީ ޕެނަލްޓީއެއް ނޫން ކަމަށެވެ.
ލިވަޕޫލްގެ ތިން ވަނަ ގޯލު ޖެހީ ބަދަލަކަށް ކުޅެން އެރި، މުހައްމަދު ސަލާހު އެވެ. މިއީ، އަލެކްސިސް މެކް އަލިސްޓާ ޖެހި ޝޮޓެއް ވެސްޓް ހޭމްގެ ކީޕަރު، ލޫކަޒް ފަބިއަންސްކީ ފައިގައި ޖެހިފައި އައި ވަގުތު ރީބައުންސަކުން ސަލާހު ޖެހި ލަނޑެކެވެ. އޭގެ ފަހުން، ވެސްޓް ހޭމްގެ އެޑްސަން އަލްވަރޭޒަށް ވަނީ ދެ ވަަނަ ރީނދޫ ކާޑާ އެކު ރަތް ކާޑެއް ދައްކައިފަ އެވެ. ދެ ވަނަ ރީނދޫ ކާޑު ދެއްކީ ސަލާހަށް ކުރި ފައުލަކަށެެވެ.
މެޗުގައި ލިވަޕޫލުން ޖެހި ފަހު ދެ ގޯލު ކާމިޔާބުކުރީ، ކޯޑީ ގަކްޕޯ އެވެ. މިއީ މި ސީޒަނުގައި ގަކްޕޯގެ ފުރަތަމަ ގޯލުތަކެވެ.
އާސެނަލުން ލީޑުނެގީ ޑެކްލަން ރައިސް ޖެހި ގޯލުންނެވެ. އެ ޓީމުގެ ޒުވާން ކުޅުންތެރިޔާ، 17 އަހަރުގެ ނޭތަން އެންވަނޭރީ ދެ ގޯލު ޖެހިއިރު، އަނެއް ދެ ލަނޑު ޖެހީ، ކައި ހަވާޓްޒް އާއި ރަހީމް ސްޓާލިން އެވެ. ބޯލްޓަންގެ ހަމައެކަނި ލަނޑު ޖެހި، އާރޮން ކޮލިންސް އެވެ.
ގަދަ 16 ބުރުގައި ލިވަޕޫލުން ކުޅެން ޖެހޭނީ ބްރައިޓަންއާ އެވެ. އަދި އާސެނަލުން ބައްދަލުކުރާނީ ޕްރެސްޓަންއާ އެވެ. މެންޗެސްޓާ ޔުނައިޓެޑުން ލެސްޓާ ސިޓީއާ ކުޅޭއިރު، ޗެލްސީން ބައްދަލުކުރާނީ އޭއެފްސީ ވިމްބަލްޑަން ނޫނީ ނިއުކާސަލް ޔުނައިޓެޑާ އެވެ. ގަދަ 16 ގެ އެންމެ ވަރުގަދަ މެޗަކީ، ޓޮޓެންހަމް އާއި މެންޗެސްޓާ ސިޓީގެ މެޗެވެ.
