މެންޗެސްޓާ (ސެޕްޓެމްބަރު 23) - އިނގިރޭސި ޕްރިމިއާ ލީގުގައި މެންޗެސްޓާ ސިޓީ އާއި އާސެނަލް ބައްދަލުކުރި މެޗުގައި އާސެނަލުން ސިހުރު ހެދިކަމަށް ސިޓީ ކުޅުންތެރިން ތުހުމަތު ކޮށްފި އެވެ.
ސިޓީގެ ދަނޑުގައި، ރޭ ކުޅުނު މި މެޗު ނިމުނީ 2-2 ގެ ނަތީޖާ އަކުން އެއްވަރުވެގެންނެވެ. މި މެޗަށް ފަހު އާސެނަލް ކޯޗު މިކޭލް އާޓެޓާ ވަނީ، މިއީ ޖާދުލަކުން ލިބުނު ނަތީޖާއެއް ކަމަށް ސިފަ ކޮށްފަ އެވެ.
އެކަމަށް ރައްދު ދިނުމުގެ ގޮތުން، ސިޓީގެ ޕޯޗުގީސް މިޑްފީލްޑަރު، ބެނާޑޯ ސިލްވާ ބުނީ މި މެޗުގައި ކުޅުނީ ފުޓުބޯޅަ ނޫން ކަމަށް ސިފަކޮށްފަ އެވެ.
އަދި މި މެޗުގައި ފުޓުބޯޅަ ކުޅެން މަސައްކަތް ކުރީ ހަމައެކަނި ސިޓީ އިން ކަމަށާއި އަދި އާސެނަލުން ރެފްރީގެ އެހީތެރިކަމާ އެކު، މަސައްކަތް ކުރީ އެހެން ކަމަކަށް ކަމަށް ބެނާޑޯ ސިލްވާ ވަނީ ބުނެފަ އެވެ.
ބެނާޑޯ ސިލްވާ އިތުރަށް ބުނީ، މި މެޗުގައި އާސެނަލުން ސިޓީއާ އެއްވަރުކުރީ "ބްލެކް މެޖިކް" (ސިިހުރު) ހަދައިގެން ކަމަށް ބުނެފަ އެވެ.
އާސެނަލްގެ ކޯޗު އާޓެޓާ ބުނީ މެންޗެސްޓާ ސިޓީގެ ދަނޑު އިއްތިހާދުގައި 10 ކުޅުންތެރިންނާ އެކު އެ ޓީމާ އެއްވަރު ކުރުމަކީ ޖާދުލެއް ކަމަށެވެ. އަދި މި މެޗުގައި އާސެނަލް ޓީމުގެ ކުޅުންތެރިން ކުރި މަސައްކަތައް އާޓެޓާ ވަނީ ތައުރީފުކޮށްފަ އެވެ.
"އިއްތިހާދުގައި 10 ކުޅުންތެރިންނާއެކު ސިޓީއާ އެއްވަރުކުރުމަކީ ފަސޭހަކަމެއް ނޫން. މިއީ މިރަކަލް (އަަޖައިބެއް) އެއް. އަހަރެންގެ ކުޅުންތެރިންނާ މެދު ފަހުރުވެރިވަން" އާޓެޓާ ބުންޏެވެ.
ރޭގެ މެޗުގައި ސިޓީން އާލިން ބްރައުޓް ހާލަންޑްގެ ގޯލުން ލީޑުނަގާފައިވަނިކޮށް، އާސެނަލުން ވަނީ ފުރަތަމަ ހާފުގައި ނަތީޖާ އަނބުރާލައިފަ އެވެ. ރިކާޑޯ ކަލަފިއޯރީގެ ގޯލުން އާސެނަލުން އެއްވަރުކުރިއިރު، ގަބްރިއެލް މަގާޅައެސްގެ ގޯލުން ލީޑުނެގި އެވެ. އާސެނަލްގެ ލެއަންޑްރޯ ޓްރޮސާޑަށް ފުރަތަމަ ހާފުގެ އިތުރު ވަގުތުގައި ވަނީ ދެ ވަނަ ރީނދޫ ކާޑާ އެކު ރަތް ކާޑެއް ދައްކައިފަ އެވެ.
އެއް ކުޅުންތެރިއަކު މަދުކޮށް، ދެ ވަނަ ހާފުގައި ކުޅުނު އާސެނަލް ކޮޅަށް ސިޓީން އެއްވަރުކުރި ގޯލު ޖެހީ އިތުރު ވަގުުތުގެ ފަހު މިނިޓްގަ އެެވެ. މިއީ އޭރިއާތެރެއިން ލިބުނު ފުރުސަތެއްގައި، ޖޯން ސްޓޯންސް ޖެހި ގޯލެކެވެ.
