ލޮސް އެންޖެލްސް، ޔުނައިޓެޑް ސްޓޭޓްސް (ސެޕްޓެމްބަރު 6) - އަންހެން ފުޓްބޯޅަ ލެޖެންޑް، އެމެރިކާގެ އަލެކްސް މޯގަން، ޕްރޮފެޝަނަލް ފުޓްބޯޅައިން ރިޓަޔާކޮށްފި އެވެ.
އުމުރުން 35 އަހަރުގެ އަލެކްސް މޯގަން، ރިޓަޔާކުރިކަން އިއުލާނުކޮށްފައިވަނީ، ސޯޝަލް މީޑިއާގައި ޕޯސްޓްކުރި ވީޑިއޯއެއްގަ އެވެ. އޭނާ ބުނެފައިވަނީ، ދެ ވަނަ ދަރިއަކަށް ބަލިވެއިން ކަމަށާއި މިއީ ފުޓްބޯޅަ ކެރިއަރަށް ނިމުން ގެންނަން އެންމެ ރަނގަޅު ވަގުތު ކަމަށެވެ.
އެމެރިކާ ގައުމީ ފުޓްބޯޅަ ޓީމާ އެކު ދެ ފީފާ ވިމެންސް ވޯލްޑް ކަޕް (2015 އާއި 2019)، އޮލިމްޕިކް އަންހެން ފުޓްބޯޅަ އިވެންޓުން ދެ ފަހަރު ރަން މެޑަލް (2012 އާއި 2024) ހޯދި، އަލެކްސް މޯގަން ވަނީ އެމެރިކާ ޓީމަށް ކުޅުނު 224 މެޗުން 123 ގޯލު ޖަހައި، 54 ލަނޑު ޖަހަން ފުރުސަތު ތަނަވަސްކޮށްދީފަ އެވެ.
"ފުޓްބޯޅައިގައި އަހަންނަށް 30 އަށް ވުރެ ގިނަ އަހަރު އުޅެވިއްޖެ. އަހަރެން އެންމެ ފުރަތަމަ ލޯބިވީ ފުޓްބޯޅަ އަށް، އަހަންނަށް ފުޓްބޯޅައިން އުންމީދުކުރި ކަންކަމަށް ވުރެ ވެސް ގިނަ ކަންތައްތައް ހާސިލްްކުރެވިއްޖެ، އެހެންވީމަ، ވަރަށް ވިސްނާފައި މި ނިންމީ، މިއީ އެންމެ ރަނގަޅު ވަގުތުކަން ދުރަށް ޖެހިލަން،" އަލެކްސް މޯގަން ބުންޏެވެ.
އެމެރިކާގެ އަންހެން ފުޓްބޯޅަ ޓީމާއި ފިރިހެން ފުޓްބޯޅަ ޓީމަށް އެއް ހަމައެއްގައި މުސާރަ ހޯދުމަށް، ކޯޓު މެދުވެރިކޮށް، 2022 ވަނަ އަހަރު ކާމިޔާބު ހޯދުމުގައި، އަލެކްސް މޯގަން އަކީ އެންމެ އިސް ސަފުގައި މަސައްކަތް ކުރި ކުޅުންތެރިއެކެވެ.
އިންޑިވިޖުއަލް ގިނަ އެވޯޑްތަކެއް ހޯދާފައިވާ އަލެކްސް މޯހަން، އަށް 2020 ވަނަ އަހަރުގެ މެއި މަހު އަލަތު ދަރިއަކު ލިބުނުއިރު، އަލުން ފިޓްވެގެން އައިސް ކުޅުނީ އިނގިރޭސި ކްލަބް ޓޮޓެންހަމް ހޮޓްސްޕާސް އަށެވެ.
