ފުޅާދާއިރާއެއްގައި މަސައްކަތް ކުރުމުގެ އަމާޒުގައި ކުރިއަށްދަމުން އަންނަ އެސްޕަޔާ ފުޓްބޯލް އެކެޑަމީގެ ސްޕޯޓްސް ޕާޓްނަރަކަށް މާކުއީ އެމްވީ ހަމަޖައްސައިފި އެވެ.
މީގެ އަށް ވަރަކަށް މަސް ކުރިން ފެށި އެސްޕަޔާ އެެކެޑަމީ މިހާތަނަށް ވެސް ވަނީ ގިނަ ކުރިއެރުންތަކެއް ހޯދައިފަ އެވެ.
އެ ގޮތުން، ކުޅިވަރު ސާމާނު ރާއްޖެ ގެނައުމުގައި، ގިނަ ބަޔެއްގެ މަގުބޫލުކަން ހޯދައިފައިވާ، މާކުއީ އެމްވީއާ އެކު، ސްޕޯޓްސް ޕާޓްނަރަކަށް ސޮއިކުރުމަކީ އެސްޕަޔާ އިން ދެކޭގޮތުގައި، އެކެޑަމީގެ ކަންކަން ކުރިއަށްގެންދަން ލިބިގެންދާނެ ބޮޑު ކުރިއެރުމެވެ.
އެސްޕަޔާ އިން އެއްބަސްވުމުގައި ސޮއިކޮށްފައިވަނީ، އެސްޕަޔާގެ ވައިސް ޕްރެޒިޑެންޓް، އަހުމަދު ފައްރާހު (ފައްރަ) އެވެ. އަދި މާކުއީ އެމްވީގެ ފަރާތުން ސޮއިކޮށްފައިވަނީ، ކޯ ފައުންޑަރު، ހުސެއިން ގައްސާން ލަބީބް (ހުސީ) އެވެ.
މިދިޔަ އަހަރުގެ ޑިސެމްބަރު މަހު، ފެށި އެސްޕަޔާ އެކެޑަމީން ދާދި ފަހުން ވަނީ ރާއްޖޭގެ އެންމެ ކާމިޔާބު ޔޫތު ފުޓްބޯޅަ ޓީމު، ކްލަބް އީގަލްސްގެ ޔޫތު ލެވަލްގެ ކަންކަމާ ހަވާލުވެފަ އެވެ. އަދި ގިނަ ސްކޫލްތަކެއްގެ ޔޫތު ޓީމުތަކުގެ ސެޓަޕް ހަދައިދިނުމުގައި، އެސްޕަޔާ ވަނީ އެހީތެރިކަން ފޯރުކޮށްދީފަ އެވެ. އެކެޑަމީގެ މި މުހިންމު، ޕްރޮޖެކްޓްތައް، އެސްޕަޔާ އެކެޑަމީ އިން ގެންދަނީ ރާއްޖޭގެ ލެވަލްގެ ތަޖުރިބާ ބޮޑު ކޯޗުންނާ އެކު އެވެ.ދާދި ފަހުން، އެސްޕަޔާ އިން ވަނީ، އެ އެކެޑަމީ އަށް އާ ކޯޗުން ހަމަޖައްސައި، އެކެޑަމީގެ ޕްރޮގްރާމްތައް ކުރިއަށް ވުރެން ފުޅާކުރަން ނިންމައިފަ އެވެ.
އެސްޕަޔާގެ ޕްލޭން ހެދުމުގައި މަސައްކަތް ކުރަނީ، ޓެކްނިކަލް ޑިރެކްޓަރެއްގެ ރޯލުގައި ހުރި ޕްރޯ ލައިސަންސް ކޯޗު މުހައްމަދު ޝިޔާޒް (މޯހަން) އާއި އެޑްމިނިސްޓްރޭޓިވް ކަންކަމާ ހަވާލުވެހުރި، އެފްއޭއެމްގެ ކުރީގެ ޖެނެރަލް ސެކްރެޓަރީ، ހުސެއިން ޖަވާޒް (ޖަވާ) އެވެ. އެ ގޮތުން، އެކެޑަމީގެ ޓެކްނިކަލް އަދި އެޑްމިނިސްޓްރޭޓިވް ކަންކަން، ރަނގަޅަށް ހިންގުމުގައި، ޖަވާ އާއި މޯހަން ހަރަކާތްތެރިވުމަކީ، އެ އެކެޑަމީ އަށް ލިބޭ ބޮޑު ކުރިއެރުމެއްގެ ގޮތުގައި އެ އެކެޑަމީން ދެކެ އެވެ.
