މާލޭ ޓީޓީ ހޯލުގައި މިހާރު ކުރިއަށްދާ އިންޓަ ސްކޫލް ޓޭބަލް ޓެނިސް މުބާރާތުގެ ސިންގަލްސްގެ ފައިނަލް ބައެއް މެޗުތައް ރޭ ކުރިއަށްދިޔައިރު، 17 އަހަރުން ދަށުގެ ޗެމްޕިއަންކަން، ޒީކް ހަަސަން ލަތީފް އާއި މިޝްކާ މުހައްމަދު އިބްރާހިމް ހޯދައިފި އެވެ.
ރޭ ކުޅުނު 17 އަހަރުން ދަށުގެ ފިރިހެން ފައިނަލުގައި، ޒީކް ވަނީ އުމީރު މުހައްމަދު މުއިއްޒު އަތުން 3-2 އިން މޮޅުވެފަ އެވެ. ޒީކް، ފުރަތަމަ ދެ ސެޓު، 11-08، 14-12 އިން ގެންގޮސްފައިވަނިކޮށް އުމީރު ވަނީ ދެން ކުޅުނު ދެ ސެޓު، 06-11، 09-11 އިން ގެންގޮސް އެއްވަރުކޮށްފަ އެވެ. ދެން ކުޅުނު، ސެޓު، 11-09 އިން ގެންގޮސް ޒީކް މޮޅުވީ އެވެ.
ސަތާރަ އަހަރުން ދަށުގެ އަންހެން ފައިނަލުގައި މިޝްކާ ވަނީ 3-1 އިން މަލާކް ބިންތި މުއިއްޒު އަތުން މޮޅުވެފަ އެވެ. މެޗުގެ ސެޓުތައް ދިޔައީ، 11-06، 08-11، 11-05 އަދި 11-08 އިންނެވެ.
ރޭ ކުޅުނު އިންޓަ ސްކޫލް ޓީޓީ މުބާރާތުގެ ފައިނަލް މެޗުތަކުގެ ތެރެއިން.--- ފޮޓޯ: އަތޫފް އާތިފް / އަދަދު
ފަނަރަ އަހަރުން ދަށުގެ ފިރިހެން ސިންގަލްސް ޗެމްޕިއަނަކީ، އުމީރު އެވެ. ފައިނަލުގައި އުމީރު ވަނީ 3-0 އިން މުހައްމަދު ޒާއިމް އަހުމަދު ބަލިކޮށްފަ އެވެ. ސެޓުތައް ދިޔައީ، 11-08، 11-08 އަދި 11-09 އިންނެވެ. މި އުމުރުފުރާގެ އަންހެން ޗެމްޕިއަންކަން ހޯދީ އައިޝަތު އަލްސާ ނާފިޒް އެވެ. އަލްސާ ވަނީ ފައިނަލުގައި، އައިޝަތު މަލަަކް ތާސީން އަތުން 11-04، 11-01 އަދި 11-05 އިން މޮޅުވެފަ އެވެ.
ރޭ ކުޅުނު 13 އަހަރުން ދަށުގެ ފިރިހެން ސިންގަލްސް ފައިނަލުގައި، މުހައްމަދު ހަލަފް ރާފިއު ވަނީ ފަހަތުން އަރައި 3-2 އިން އަލްޔާން އަލީ ނިޝާމް ބަލިކޮށްފަ އެވެ. އަލްޔާން ފުރަތަމަ ދެ ސެޓު، 08-11، 07-11 އިން ގެންގޮސްފައިވަނިކޮށް، ހަލަފް މޮޅުވީ ދެން ކުޅުނު ތިން ސެޓު، 11-03، 11-04 އަދި 11-08 އިން ކާމިޔާބު ކޮށްގެންނެވެ. މި އުމުރުފުރާގެ އަންހެން ޗެމްޕިއަންކަން ހޯދީ އަލްސާ އެވެ. މިއީ، ހަމަ 15 އަހަރުން ދަށުގެ އަންހެން ސިންގަލްސްގައި ވާދަކުރި ދެ ކުޅުންތެރިންނެވެ. ތޭރަ އަހަރުން ދަށުގެ ފައިނަލުގައި އަލްސާ ކުރިހޯދީ 11-08، 11-08 އަދި 13-11 އިންނެވެ.
ރޭ ކުޅުނު އިންޓަ ސްކޫލް ޓީޓީ މުބާރާތުގެ ފައިނަލް މެޗުތަކުގެ ތެރެއިން.--- ފޮޓޯ: އަތޫފް އާތިފް / އަދަދު
އެގާރަ އަހަރުން ދަށުގެ އަންހެން ސިންގަލްސްގައި، ސާރާ މޫސާ ޖަމީލް ވަނީ 11-06، 13-11 އަދި 11-04 އިން، އައިރާ އަބްދުﷲ ރިފާއު ބަލިކޮށް ޗެމްޕިއަންކަން ހޯދައިފަ އެވެ.
ހ. މުނިއުފާގައި ހުންނަ މާލޭ ޓީޓީ ހޯލުގައި ކުރިއަށްދާ މި މުބާރާތް އަންނަ ހޮނިހިރު ދުވަހުގެ ނިޔަލަށް ވަނީ ޝެޑިއުލްކޮށްފަ އެވެ.
މި ފަަހަރުގެ އިންޓަ ސްކޫލް ޓީޓީ މުބާރާތުގައި ބައިވެރިވެފައިވާ ސްކޫލްތަކަކީ، އަހުމަދިއްޔާ އިންޓަނޭޝަނަލް ސްކޫލް، އަމީނިއްޔާ ސްކޫލް، ބިލަބޮން ހައި އިންޓަނޭޝަނަލް ސްކޫލް، ބްރައިޓްވޭ އިންޓަނޭޝަނަލް ސްކޫލް، ފުވައްމުލަކު ސްކޫލް، ގާޒީ ސްކޫލް، ގިޔާސުއްދީން އިންޓަނޭޝަނަލް ސްކޫލް، ހާފިޒް އަހުމަދު ސްކޫލް، ހިރިޔާ ސްކޫލް، ހުރަވީ ސްކޫލް، އިމާދުއްދީން ސްކޫލް، އިސްކަންދަރު ސްކޫލް، ޖަމާލުއްދީން ސްކޫލް، މަޖީދިއްޔާ ސްކޫލް، ރެހެންދި ސްކޫލް އަދި ތާޖުއްދީން ސްކޫލް އެވެ.
