ޕެރިސް (އޮގަސްޓް 5) - އޮލިމްޕިކްސް އިން ރަން މެޑަލެއް ހޯދައިފިނަމަ، އެކި ގައުމުތަކުން އެކި މިންވަރަށް ފައިސާގެ އިނާމު ދޭއިރު، އެންމެ ބޮޑު ފައިސާގެ އިނާމެއް ދެނީ، ހޮންގް ކޮންގުންނެވެ. އެ ގޮތުން، ހޮންގް ކޮންގްގެ އެތުލީޓަކު، އޮލިމްޕިކްސް އިން ރަން މެޑަލް ހޯދައިފިނަަމަ، 768،000 ޑޮލަރު ލިބެ އެވެ.
ރަން މެޑަލަކަށް ދެ ވަނަ އަށް އެންމެ ގިނަ ފައިސާ ދެނީ ސިންގަޕޫރުންނެވެ. އެ ގޮތުން، ސިންގަޕޫރުގެ އެތުލީޓަކު، އޮލިމްޕިކްސް އިން ރަން މެޑަލް ހޯދައިފިނަަމަ، ފައިސާގެ އިނާމުގެ ގޮތުގައި، 737،000 ޑޮލަރު ދެ އެވެ. އެ ގޮތުން، 2016 ވަނަ އަހަރުގެ ރިއޯ އޮލިމްޕިކްސްގެ 100 މީޓަރު ބަޓަފްލައި އިވެންޓުން ރަން މެޑަލް ހޯދި ސިންގަޕޫރުގެ ފެތުންތެރިޔާ، ޖޯސެފް ސްކޫލިން އަށް ވަނީ، 737،000 ޑޮލަރު (އެއް މިލިއަން ސިންގަޕޫރު ޑޮލަރު) ދީފަ އެވެ.
ތިން ވަނަ އަށް އެންމެ ބޮޑު ފައިސާގެ އިނާމެއް، އޮލިމްޕިކްސްގެ ރަން މެޑަލަކަށް ދެނީ ޓައިވާނުންނެވެ. އެ ގޮތުން، ޓައިވާނުން އޮލިމްޕިކްސްގައި ރަން މެޑަލް ހޯދާ އެތުލީޓަކަށް، 720،000 ޑޮލަރު ދެ އެވެ.
ހޮންގް ކޮންްގް އިން ރިހި މެޑަލް އަކަށް ދެނީ، 384،000 ޑޮލަރެވެ. އަދި ލޯ މެޑަލަކަށް ހޮންގް ކޮންގުން 192،000 ޑޮލަރު ދެ އެވެ. އޭގެ އިތުރުން، ޓީމު ކުޅިވަރަކުން ރަން މެޑަލް ހޯދައިފިނަަމަ ހޮންގް ކޮންގްގައި 1.5 މިލިއަން ޑޮލަރު ދެ އެވެ.
ސިންގަޕޫރަށް ބަލާއިރު، ރިހި މެޑަލަކަށް ދެނީ، 373،000 ޑޮލަރެެވެ. އަދި ލޯ މެޑަލަކަށް، 186،000 ޑޮލަރެވެ. ހޮންގް ކޮންގް އެކޭ އެއް ގޮތަށް ޓީމު ސްޕޯޓްސް ރަން މެޑަލަށް ސިންގަޕޫރުން 1.5 މިލިއަން ޑޮލަރު ދެ އެވެ. ޗައިނީސް ޓައިޕޭގެ ނަމުގައި ވާދަކުރާ ޓައިވާނުން، ރިހި މެޑަލް އަކަށް 252،000 ޑޮލަރު އަދި ލޯ މެޑަލަކަށް 180،000 ޑޮލަރު ދެ އެވެ.
ނިސްބަތުން ބަލާއިރު، އެންމެ ފަހުން އޮލިމްޕިކްސް އަށް ވުރެ މި ފަހަރުގެ އޮލިމްޕިކްސްގައި ގިނަ ގައުމުތަކުން ވަނީ ފައިސާގެ އިނާމު ބޮޑުކޮށްފަ އެވެ.
