މިއުނިކް (ޖުލައި 7) - ޕޯޗުގަލާ ދެކޮޅަށް ފްރާންސްގެ ފޯވާޑް، އޮސްމާން ޑެމްބެލޭ ޕެނަލްޓީ ޖެހީ އޭނާގެ "ބަލިފައިން" ކަމަށް ހާމަކޮށްފި އެވެ.
ޑެމްބެލޭ އަކީ ދެ ފައިން އެއްވަރަކަށް ކުޅޭ ކުޅުންތެރިއެކެވެ. ބްރެޒިލްގެ ތަރި ނޭމާ އެކޭ އެއްގޮތައް ޑެމްބެލޭ ވެސް އަންނަނީ ޝޮޓު ޖެހުމުގައި ދެ ފައިބޭނުން ކުރަމުންނެވެ.
މި ފަހަރުގެ ޔޫރޯ ފުޓްބޯޅަ މުބާރާތުގެ ކުއާޓާ ފައިނަލުގައި، ޕެނަލްޓީ ޖަހައިގެން ޕޯޗުގަލް އަތުން ފްރާންސް މޮޅުވި މެޗުގައި، ޑެމްބެލޭ، 27, ވަނީ ތަފާތު މޮޅަށް ކުޅެފަ އެވެ. އެ މެޗުގެ އެންމެ މޮޅު ކުޅުންތެރިއާގެ ޓްރޮފީ ދިނީ ވެސް ވީ ޑެމްބެލޭ އެވެ.
މީގެ ކުރިން ޑެމްބެލޭ ދިން އިންޓަވިއުއެއްގައި ވަނީ ބޯޅަ ހިފައިގެން ކުޅުންތެރިން ކައިރިން ކޮށްޓުމާއި ނެއްޓުމަށް، ވާތުފައި ބޭނުންކުރި ނަމަވެސް ކަނާތު ފައިން ޕެނަލްޓީ ޖަހަނީ، އެއީ، "ބަލިފައި" ކަން އެނގިހުރެ ވެސް ޝޮޓް ޖެހުމަށް ޔަގީންކަން އޮތުުމުން ކަމަށެވެ.
އެ މެޗުގެ ޕެނަލްޓީގަިއ ޑެމްބެލޭ ތިން ފިޔަވަޅު ވާތަށް ފިޔަވަޅު އެޅުމަށް ފަހު ޕެނަލްޓީ ފޮނުވާލީ އޭނާގެ ކަނާތު ފައިންނެވެ. ޕެނަލްޓީ މަތަކުރަން ޕޯޗުގަލްގެ ކީޕަރު ޑިއޯގޯ ކޮސްޓާ ޑައިވް އެޅީ ވާތު ފަޅި އަށެވެ.
މެޗަށް ފަހު ވާހަކަ ދައްކަމުން ފްރާންސްގެ ކޯޗު ޑިޑިއޭ ޑެޝޯމްޕްްސް ބުނީ ބަލިފައި ބޭނުންކޮށް ޕެނަލްޓީ ކާމިޔާބުކުރި ޑެމްބެލޭ އަށް އޮތީ ލޯތްބާ އިހުތިރާމު ކަމަށެވެ. އަދި މިއީ އޭނާ އަށް ބަލި ފައި ބޭނުންކޮށް ޕެނަލްޓީ ކުޅުންތެރިއަކު ކާމިޔާބުކުރިތަން ފެނުނު ފުރަތަމަ ފަހަރު ކަމަށެވެ.
