ރައްޔިތުންގެ މަޖިލީހުގައި ސަރުކާރުގެ މައި ޕާޓީ ޕީޕަލްސް ނޭޝަނަލް ކޮންގްރެސް (ޕީއެންސީ) ތަމްސީލުކުރަމުންދާ މެންބަރުންނަށް ރިޔާސީ ގަނޑުވަރު, މުލީއާގެއިން 50,000ރ. ގެ އެލަވަންސެއް ނުދޭ ކަމަށް ސަރުކާރުން ބުނެފި އެވެ.
މިފަދަ އަޑުތަކެއް ފެތުރިފައި ވަނިކޮށް އޮންލައިން ނޫހަކުން ވަނީ އެކަން ރިޕޯޓުކޮށްފަ އެވެ. އެ ހަބަރަށް ސަރުކާރުގެ ބަހެއް ހޯދުމަށް ތަރުޖަމާނު ހީނާ ވަލީދަށް ގުޅުމުން އެކަން ދޮގު ނުކުރައްވައި ހަބަރު ޝާއިއު ކުރުމުން އޭނާ ވަނީ އެއީ ދޮގެއް ކަމަށް އެކްސްގައި ވިދާޅުވެފަ އެވެ.
"ޕީއެންސީގެ މަޖިލިސް މެންބަރުންނަށް މުލިއާގެއިން މަހަކު 50،000ރ. ދޭކަމަށް އެމްޑީޕީގެ ޗެއާޕާސަން ފައްޔާޒް އިސްމާޢީލް ދެއްކެވި ވާހަކައަކީ ކަނޑައެޅިގެން ބުހުތާނު ދޮގެއް," އެކްސްގައި ހީނާ ވިދާޅުވި އެވެ.
ޕީއެންސީގެ 75 މެންބަރުން މަޖިލީހުގައި ތިއްބަވާއިރު އެ މެންބަރުންނަށް އެ ވަރަށް ފައިސާ ދޭނަމަ މަހެއްގެ މައްޗަށް 3.75 މިލިއަން ރުފިޔާ ހޭދަވާނެ އެވެ.
ރައްޔިތުންގެ މަޖިލީހުގެ ގިނަ ކަންކަން ނިންމީ މުލީއާގެއިންނެވެ. އެގޮތުން, މަޖިލީހުގެ ރައީސާއި ނައިބު ރައީސް ވެސް ކަނޑައެޅީ މުލީއާގޭގައި ބޭއްވި ބައްދަލުވުމެއްގައި ސީދާ ރައީސް ޑރ. މުހައްމަދު މުއިއްޒު އެވެ. މެންބަރުންނަށް ކަންކަން އަންގަވާނީ ސީދާ ރައީސުލްޖުމްހޫރިއްޔާ ކަމަށް ވެސް އޮތީ އަންގާފަ އެވެ.
ޕީއެންސީގެ ސުޕަ މެޖޯރިޓީއެއް މިވަގުތު މަޖިލީހުގައި އޮތްއިރު އަށާވަރަވަނަ މަޖިލީހުގައި ވެސް އެ އޮތީ މިވަގުތު ޕީއެންސީގައި ތިއްބެވި ނަމަވެސް ޕީޕީއެމަށް އޭރު ނިސްބަތްވި މެންބަރުންގެ މެޖޯރިޓީއެކެވެ. އޭރު ވެސް މަޖިލީހުގެ ގިނަ ނިންމުންތައް މުލީއާގެއިން ނިންމި މަންޒަރު ފެނުނެވެ.
