ގެލްސެންކާޗެން (ޖޫން 30) - ޔޫރޯ ފުޓްބޯޅަ މުބާރާތުގެ ގަދަ 16 ޓީމު ވާދަކުރާ ބުުރުގައި މިރޭ ސްލޮވާކިއާއާ ދެކޮޅަށް އިންގްލެންޑް ނުކުންނައިރު، އެ ޓީމުން ދައްކަމުން އަންނަނީ ގިނަ ބަޔަކު ހީކުރާހާ ދަށް ކުޅުމެއް ނޫން ކަމަށް އިންގްލެންޑްގެ ކޯޗު ގަރެތު ސައުތުގޭޓް ބުނެފި އެވެ.
އިންގްލެންޑުން ގްރޫޕް ސްޓޭޖުގައި ކުޅުނު ތިން މެޗަށް ބަލާއިރު، މޮޅުވީ ފުރަތަމަ މެޗުން ސާބިއާ އަތުން 1-0 އިންނެވެ. ދެ ވަނަ މެޗުން ޑެންމާކާ 1-1 އިން އެއްވަރުވިއިރު، ތިން ވަނަ މެޗުން ސްލޮވީނިއާއާ އެއްވަރުވީ 0-0 އިންނެވެ. މި ތިން މެޗުގައި އިންގްލެންޑުން ނެރުނު ފުރަތަމަ އެގާރަ އާއި ދެއްކި ކުޅުމަށް އަންނަނީ ގިނަ ބަޔެއްގެ ފާޑުކިޔުން އަމާޒުވަމުންނެވެ.
ގަދަ 16 ބުރުގައި ސްލޮވާކިއާއާ ދެކޮަޅަށް ކުޅޭ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ސައުތުގޭޓް ބުނީ ސްލޮވީނިއާ މެޗުގައި މޮޅެއް ނުހޯދުނަސް ކަންކަން ރަނގަޅު މިސްރާބުން ދާން ފެށި މަންޒަރު ފެނުނު ކަމަށެވެ.
"ޓީމެއް ދުވަހަކު ވެސް މީހުން ހީކުރާހާ ދަށެއް ނުވާނެ. އަނެއްކޮޅުން ޓީމެއް ދުވަަހަކު ވެސް މީހުން ހީކުރާހާ މޮޅެއް ވެސް ނުވެދާނެ. އަަހަންނަށް ފެންނަ ފެނުމުގައި އިންގްލެންޑް ދަށެއް ނޫން. ކަންކަން ރަނގަޅުވަމުން މި އަންނަނީ،" ސައުތުގޭޓް ބުންޏެވެ.
އިންގްލެންޑްގެ ކޯޗުގެ މަގާމުގައި ހޭދަކުރާ އަށް ވަނަ އަހަރު އޭނާ އަށް ދަސްވެފައި އޮތް ކަމަކީ، މުބާރާތެއްގެ ތެރޭގައި ޖަވާބު ދޭން ޖެހޭ ކަންކަމަށް އިޝާރާތްކޮށް ބުނަން ޖެހޭ އެއްޗެއް ބުނުން ކަމަށެވެ. އަދި ދައްކާ ކޮންމެ ވާހަކަ އަކަށް ރައްދު ދިނުމަކީ މީގެ މޮޅު ގޮތެއް ނޫން ކަމަށް ސައުތުގޭޓް ވަނީ ބުނެފަ އެވެ.
ޓީމު ނެގުމުގައި ގްރޫޕް ސްޓޭޖުގައި ކަންކަން ކުރި ގޮތާއި ނޮކައުޓް ބުރުގައި ކުރާގޮތް ތަފާތުވާނެ ކަމަށް ވެސް ސައުތުގޭޓް ވަނީ ބުނެފަ އެވެ.
"އަތުގައި ހުރި ހުރިހާ ހަތިޔާރެއް ފަށާތަނުން ބޭނުންކުރާނެ މީހެއް ނުހުންނާނެ،" ސައުތުގޭޓް ބުންޏެވެ.
ސްލޮވާކިއާއާ ދެކޮޅަށް އިންގްލެންޑުން ވަނީ ކުޅުނު ހަ މެޗުގެ ތެރެއިން ފަސް މެޗުން މޮޅުވެފަ އެވެ. އިންގްލެންޑަށް މޮޅުނުވެވުނީ 2016 ވަނަ އަހަރުގެ ޔޫރޯގައި މި ދެ ޓީމު ބައްދަލުކުރި މެޗުގަ އެވެ. އެ މެޗު ވަނީ ލަނޑެއް ނުޖެހި އެއްވަރުވެފަ އެވެ.
ސައުތުގޭޓް ބުނީ މިހާރު ފެންނަ ސްލޮވާކިއާ ޓީމުގައި ތަފާތުތަކެއް އެބަހުރި ކަމަށާއި ތަޖުރިބާ އާއި ހުނަރަށް ބަލާއިރު މިހާރު އޮތް ޓީމު މާ ރަނގަޅު ކަމަށެވެ.
މިދިޔަ ދެ ޔޫރޯ އަށް ބަލާއިރު، އެންމެ ރަނގަޅު ޑިފެންސިވް ރެކޯޑެއް އޮތީ އިންގްލެންޑްގެ އެވެ. އިންގްލެންޑުން ވަނީ ޔޫރޯގައި އެންމެ ފަހުން ކުޅުނު 10 މެޗުގެ ތެރެއިން ހަތް މެޗު ކޮޅަށް ގޯލެއް ވަނަނުދީ ނިންމައިލައިފަ އެވެ.
އިންގްލެންޑާއި ސްލޮވާކިއާ ކުޅޭ މެޗު ފަށާނީ މިރޭ 9 ޖަހާއިރު އެވެ.
