ރާއްޖޭގައި 2018-2023 އަށް ވެރިކަން ކުރި މިހާރުގެ މައި އިދިކޮޅު ޕާޓީ, މޯލްޑިވިއަން ޑިމޮކްރަޓިކް ޕާޓީ (އެމްޑީޕީ)ގެ ވެރިކަމުގައި ހިނގާފައިވާ ކަންކަން ބަލައި ފިޔަވަޅު އަޅަން ޖެހޭނަމަ މޫނަށް ކަނދުރާއަށް ބެލުމެއް ނެތި ފިޔަވަޅު އަޅާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
އާޓިފިޝަލް ބީޗު ކުރިމަތީގައި މީގެކުރިން އެމްޑީޕީ އަދި ދަ ޑިމޮކްރެޓްސްއިން ހަރުގެ ހިންގި ތަނުގައި ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ހަރުގެ ގާއިމުކޮށް ރޭ ވަނީ ހުޅުވާފަ އެވެ. އެ ޖަލްސާގައި ރައީސް ވަނީ ރާއްޖޭން ބަދަލުހިފުމުގެ ރޫހު ނައްތާލި ކަމަށް ވިދާޅުވެފަ އެވެ.
"ކުރީގެ ސަރުކާރުން އެކި އެކި ކުންފުނިތަކުން ވިޔަސް އެހެން ފަރާތްތަކުން ވިޔަސް ހިންގާފައި ހުރި ކަންތައްތައް ނިޒާމުގެ ތެރެއިން ބައްލަވާފަ, އަޅުއްވަން ޖެހޭ ފިޔަވަޅެއް އޮތިއްޔާ މޫނެއް ކަނދުރާއެއް ނުބައްލަވާ, ފިޔަވަޅު އަޅާނަން," ރައީސް ވިދާޅުވި އެވެ.
ކޮރަޕްޝަނާއި, ވައްކަން އަދި ނާޖާއިޒު ގޮތެއްގައި ގަވައިދާ ހިލާފަށް ކަންކަން ކުރުމުގެ ފުރުސަތު ނުދެއްވާނެ ކަމަށް ވެސް އެމަނިކުފާނު ވިދާޅުވި އެވެ.
"ނަމަވެސް އަދުލު އިންސާފު ގާއިމުކުރާނަން. ވައްކަމަކަށް ފުރުސަތެއް ނޯންނާނެ. އެކަން ކުރާ މީހަކު ހެއްކާއެކު އަޅުގަނޑު ކުރިމައްޗަށް މިހާރު ގެނަޔަސް އިސްވެ ފިޔަވަޅު އަޅާނަން އަޅުގަނޑު އެ މީހަކާ ދެކޮޅަށް," ރައީސް ވިދާޅުވި އެވެ.
"އެހެންވީމާ ކޮރަޕްޝަނަކަށް, ވައްކަމަކަށް, ނާޖާއިޒު ގޮތެއްގައި ގަވާއިދާ ހިލާފަށް ކަންކަން ކުރުމަށް އެ ފުރުސަތެއް ނޯންނާނެ. އެއީކީ ބަދަލުހިފުމެއް ނޫން."
އެއީ އެމަނިކުފާނު އަދުލުވެރިވުމުގެ ގޮތުން ކުރައްވާނެ ކަމެއް ކަމަށާއި ގައުމަކަށް ހަމަޖެހުމާއި ކުރިއެރުން ލިބޭނީ އޭރުން ކަމަށް ވެސް ވިދާޅުވި އެވެ. ތަކުރާރުކޮށް ރައީސް ވަނީ އެމަނިކުފާނަކީ އިހުލާސްތެރިއެއް ކަމަށާއި ތެދު ހައްދަވާ ބޭފުޅެއް ކަމަށް ވިދާޅުވެފަ އެވެ.
