ފްރޭންކްފާޓް (ޖޫން 20) - އޭނާ އާއި އިނގިރޭސި ފުޓްބޯޅަ ޓީމަށް އަމާޒުވަމުން އަންނަ ފާޑުކިޔުންތަކާ މެދު ވިސްނައި ފިކުރުކޮށް ވަގުތުތަކެއް ނަގާލަން ބޭނުންނުވާ ކަމަށާއި ވިސްނުމަކީ ކޮންމެ މެޗަކަށް ވެސް ވީ އެންމެ ފުރިހަމަ އަށް ތައްޔާރުވެ ކާމިޔާބު ހޯދުން ކަމަށް އިނގިރޭސި ކޯޗު ގަރެތު ސައުތުގޭޓް ބުނެފި އެވެ.
ސައުތުގޭޓަށް ވަނީ އިނގިރޭސި މީޑިއާ އާއި އެނަލިސްޓުންގެ ގޮތުގައި މަސައްކަތްކުރާ ކުރީގެ ކުޅުންތެރިން އަދި ސަޕޯޓަރުންގެ ފާޑުކިޔުން ވަރަށް ބޮޑަށް އަމާޒުވެފަ އެވެ.
މި ފަހަރުގެ ޔޫރޯގައި އިންގްލެންޑުން ކުޅުނު ފުރަތަމަ މެޗުން ސާބިއާ އަތުން 1-0 އިން މޮޅުވި ނަމަވެސް އެ ގައުމުގެ މީޑިއާ އަދި ސަޕޯޓަރުންގެ ފާޑުކިޔުން އިންގްލެންޑަށް ވަނީ އަމާޒުވެފަ އެވެ. އެކަމަކު، މިއީ އިންގްލެންޑްގެ ތާރީހުގައި ޔޫރޯގެ ފުރަތަމަ މެޗުން އެ ޓީމު މޮޅުވި ދެ ވަނަ ފަހަރެވެ.
ސައުތުގޭޓް ބުނީ އިންގްލެންޑްގެ ކޯޗުގެ މަގާމުގައި މިދިޔަ އަށް އަހަރު ހޭދަކުރިއިރު, އޭނާ އަށް ދަސްވި އެއް ފިލާވަޅަކީ މީޑިއާގެ ފާޑުކިޔުންތަކަށް "ބީރު ކަންފަތެއް" ދިނުން ކަމަށެވެ. އަދި އިންގްލެންޑުން ކޮންމެ ނަތީޖާ އެއް ނެރުނަސް އެ ފާޑުކިޔުންތައް އަމާޒުވާނެކަން އެނގޭ ކަމަށް ސައުތުގޭޓް ވަނީ ބުނެފަ އެވެ.
އޭނާ ބުނީ މީޑިއާގެ ފާޑުކިޔުންތަކަށް ވިސްނާނެ ވަގުތު އޭނާގެ ނެތް ކަމަށެވެ. އަދި މި ވަގުތު ފޯކަސް ހުރީ ކުރިއަށް އޮތް ދެ މެޗު ކާމިޔާބުކޮށް ދެ ވަނަ ބުރުން ޖާގަ ހޯދަން ކަމަށް ސައުތުގޭޓް ބުނެފައިވެ އެވެ.
"އަހަރެންގެ ފޯކަސް މިހުރީ ގްރޫޕް ސްޓޭޖުގައި ބާކީ މިއޮތް ދެ މެޗަށް. އަހަރެމެންގެ އަމާޒަކީ އެ ދެ މެޗު ކާމިޔާބު ކޮށް ދެ ވަނަ ބުރަށް ދިޔުން،" ސައުތުގޭޓް ބުންޏެވެ.
ސާބިއާ މެޗުން އިންގްލެންޑް މޮޅުވި ނަމަވެސް، އެ ޓީމުން ރަނގަޅު ކުރަން ޖެހޭ ގިނަ ކަންތައްތަކެއް އެ މެޗުން ފާހަގަވެގެންދިޔަ ކަމަށް ސައުތުގޭޓް ވަނީ ބުނެފަ އެވެ.
"އަހަރެމެންގެ ސްކޮޑު ރަނގަޅު. އަހަރެންއަށް އެނގޭ މިއަށް ވުރެ ރަނގަޅު ކުޅުމެއް އަހަރެންގެ ކުޅުންތެރިންނަށް ދެއްކޭނެކަން" ސައުތުގޭޓް ބުންޏެވެ.
ޑެންމާކާ ދެކޮޅަށް އިންގްލެންޑުން ނުކުންނައިރު, މެންޗެސްޓާ ޔުނައިޓެޑްގެ ޑިފެންޑަރު ލޫކް ޝޯ އަށް އަނިޔާގެ ސަބަބުން މި މެޗުގައި ނުކުޅެވޭނެ އެވެ.
އިންގްލެންޑްގެ ތާރީހުގައި ވެސް އެ ޓީމުން ޔޫރޯގެ ފުރަތަމަ ދެ މެޗުން މޮޅުވެފައިނުވެ އެވެ. އިންގްލެންޑުން އެންމެ ފަހުން ޔޫރޯގެ ސެމީ ފައިނަލުގައި ވަނީ ޑެންމާކް އަތުން އިތުރު ވަގުތުގެ ދެ ހާފް ކުޅެގެން 2-1 އިން މޮޅުވެފަ އެވެ. މިރޭ މި ދެ ޓީމު ކުޅޭ މެޗު ފަށާނީ 9 ޖަހާއިރު އެވެ.
