މި އަހަރުގެ ޔޫރޯ އަށް ފްރާންސްގެ ކޯޗު ޑިޑިއޭ ޑެޝޯމްޕްސް ނެގި ސްކޮޑުގައި މިޑްފީލްޑަރު އެންގޯލޯ ކާންޓޭ ހިމެނުމުން ގިނަ ބަޔަކު އެ ނިންމުމާ މެދު ސުވާލު އުފެއްދިއެވެ. ކާންޓޭ ގައުމީ ޓީމަށް ނުކުޅޭ ދެ އަހަރެއްހާ ދުވަސްވެއްޖެ އެވެ.
އަނިޔާގެ ސަބަބުން 2022 ވަނަ އަހަރުގެ ވޯލްޑް ކަޕް ކާންޓޭ އަށް ނުކުޅެވުނެވެ. އަދި މިހާރު ސައުދީ އަރަބިއްޔާގެ އަލް އިއްތިހާދަށް އޭނާ ކުޅޭތީ، އޭނާގެ ގައުމީ ޓީމުގެ ކެރިއަރު އިތުރަށް ކުރިއަށް ނުދާނެ ކަމަށް އޮތީ ހީވެފަ އެވެ. އެހެންކަމުން، ކާންޓޭ އަށް ސްކޮޑުން ފުރުސަތު ދިނުމަކީ ސުވާލު އުފެދޭ ކަމެއްގެ ގޮތުގައި ބެލެވުނެވެ.
އެހެން ނަމަވެސް، ޔޫރޯގައި ފްރާންސް ކުޅުނު ފުރަތަމަ މެޗުގައި އޮސްޓްރިއާ އަތުން 1-0 އިން މޮޅުވިއިރު، އެ މެޗުގައި، އުމުރުން 33 އަހަރުގެ ކާންޓޭ ވަނީ އޭނާ އަށް ސްކޮޑުން ޖާގައެއް ހައްގުކަން ސާބިތުކޮށްދީފަ އެވެ. މެޗުގައި މޮޅު ކުޅުމެއް ދައްކައި، މެޗުގެ މޮޅު ކުޅުންތެރިޔާގެ މަގާމުވެސް ކާންޓޭ ހޯދިއެވެ.
އޮސްޓްރިއާއާ ދެކޮޅަށް ކާންޓޭ ފެނުނީ ވަރުބަލިކަމެއް ނެތި، ޑިފެންސާއި އޭޓޭކްގައި އެއްވަރަކަށް މަސައްކަތްކުރިތަނެވެ. ބުންވަރާއި މަސައްކަތުގެ ރޭޓު ރަނގަޅު ކުޅުންތެރިއެއްގެ ގޮތުގައި މަޝްހޫރުވެފައިވާ ކާންޓޭ ވަނީ ފްރާންސްގެ ލީޑު ހިފެހެއްޓުމުގައި މުހިންމު ދައުރެއް އަދާކޮށްފަ އެވެ.
އެ މެޗަށް ފަހު ޑެޝޯމްޕްސް ބުނީ ކާންޓޭ އަލުން ޓީމަށް ނެގުމަކީ ރަނގަޅު ނިންމުމެއްކަން މެޗުގައި އޭނާ ދެއްކި ކުޅުމުން ފެނިގެންދިޔަ ކަމަށެވެ.
"ކާންޓޭ އަކީ ވަރަށް ސްމާޓް ކުޅުންތެރިއެއް. ޓެކްނިކަލީ ބަލާއިރު އޭނާ ވަރަށް ރަނގަޅަށް ނަގައިގަނޭ ބޯޅަ އަންނާނެތަނާއި ހުންނަޖެހޭ މަގާމުތައް. މި މެޗުގައި ކާންޓޭ މޮޅަށް ކުޅުނު،" ޑެޝޯމްޕްސް ބުންޏެވެ.
އެ މެޗުގެ ފަހުކޮޅު ފްރާންސްގެ ކެޕްޓަން ކިލިއަން އެމްބާޕޭ އަށް އަނިޔާވެގެން އޭނާ ބަދަލުކުރަން ޖެހުމުން، މެޗުގައި ބާކީ އޮތް ވަގުތުކޮޅުގައި ފްރާންސްގެ ކެޕްޓަން ބޭންޑް އެޅީ ކާންޓޭ އެވެ. އެއީ އޭނާއަށް ލިބުނު ވަރަށް ބޮޑު ޝަރަފެެކެވެ.
"ކެޕްޓަން ބޭންޑް އެޅުމަކީ އަހަރެން އުންމީދުކުރި ކަމެއް ނޫން. އެއީ ލިބުނު ފަހުރެއް،" ކާންޓޭ ބުންޏެވެ.
ކާންޓޭ ބުނީ ސައުދީ ލީގުގައި ކުޅުމަކީ އޭނާގެ ފޯމު ދަށްވާނެ ކަމެއްގެ ގޮތުގައި އެއް އިރެއްގައިވެސް ނުދެކޭ ކަމަށެވެ.
"ސައުދީގައި ވެސް އަހަރެން މަސައްކަތްކުރަނީ އެންމެ ރަނގަޅު ފެންވަރުގައި ކުޅެން،" ކާންޓޭ ބުންޏެވެ.
ޔޫރޯ ފުޓްބޯޅަ މުބާރާތަށް އެކި ގައުމުތަކުން ގެނެސްދޭ ކަވަރޭޖްތަކުގައި ކުރީގެ ކުޅުންތެރިންނާއި ކޯޗުން އަންނަނީ ބައިވެރިވަމުންނެވެ. އެ ގޮތުން، ފްރާންސް މެޗަށް ފަހު ގިނަ ބަޔެއްގެ ސަމާލުކަން އަނެއްކާވެސް ހުއްޓިފައި މި ވަނީ ކާންޓޭ އަށެވެ. ދެ އަހަރު ތެރޭ ގައުމީ ޓީމަށް އެނބުރި އައިސް، ކުރިއެކޭ އެއްގޮތަށް ވަރުބަލި ކަމެއް ނެތި ކާންޓޭ ދައްކާ ކުޅުމަށް ގިނަ ބަޔަކު އަންނަނީ ތައުރީފުކުރަމުންނެވެ.
