ޑަސެލްޑޯފް (ޖޫން 18) - ޔޫރޯ ފުޓްބޯޅަ މުބާރާތުގައި ރޭ ފްރާންސުން ކުޅުނު މެޗުގައި އެ ޓީމުގެ ކެޕްޓަން، ކީލިއަން އެމްބާޕޭގެ ނޭފަތް ފަޅައިގެން ގޮސް ލިބުނު އަނިޔާ ހީކުރި ވަރަށް ވުރެ ސީރިއަސް ކަމަށް އެ ޓީމުން ބުނެފި އެވެ.
ފްރާންސްގެ ބައެއް މީޑިއާ ރިޕޯޓްތައް ބުނާގޮތުގައި، ދެން މުބާރާތުގައި އޭނާ ކުޅެން ޖެހޭނީ މޫނުގައި މާސްކެއް އަޅައިގެންނެވެ.
އޮސްޓްރިއާ އަތުން 1-0 އިން ފްރާންސް މޮޅުވި މެޗުގެ ދެ ވަނަ ހާުފުގައި އެމްބާޕޭ ބޮލުން ޖަހަން އެރި ބޯޅައެއްގައި އޮސްޓްރިއާގެ ކުޅުންތެރިއެއްގެ ކޮނޑުގައި ނޭފަތް ޖެހި ވަރަށް ބޮޑަށް ފަޅައިގެންދިޔަ އެވެ. ފަރުވާ އަށް ދަނޑުން، އެމްބާޕޭ ބޭލުވިއިރު، ރެފްރީގެ ހުއްދަ ނުހޯދައި އަލުން ދަނޑަށް އަރައި، އޭނާ ދަނޑުމަތީގައި އިށީނުމުން ރީނދޫ ކާޑެއް ވެސް ދެއްކި އެވެ. އެމްބާޕޭ ފަހުން ބަަދަލުވެސް ވަނީ ކޮށްފަ އެވެ.
މެޗަށް ފަހު ފްރާންސްގެ ކޯޗު ޑިޑިއޭ ޑެޝޯޕްސް ގާތުގައި އެމްބާޕޭގެ ހާލަތު އޮޅުންފިލުވަން ކުރި ސުވާލުތަކަށް ދިން ޖަވާބުގައި އޭނާ ބުނީ، ސީދާކޮށް އަދި އެއްޗެއް ބުނަން ނޭނގޭނެ ކަމަށާއި އެކަމަކު، ހީކުރި ވަރަށް ވުރެ އަނިޔާ ސީރިއަސް ކަމަށެވެ.
"ވަރަށް ބޮޑަށް ނޭފަތުގައި ޖެހިފައި ހުރީ. ދެން މެޑިކަލް ޓީމުން އެ އަންނަނީ ވަރަށް ރަނގަޅަށް ކަންކަން ބަލަމުން، މަަސާޖު ޓޭބަލްގައި ހުރެ، ފަރުވާ ހޯދަނިކޮށް އަހަރެން އެމްބާޕޭ ދުށިން، ވަރަށް ތަދުވެފައި އޭނަ ހުރީ، މިއީ އަހަރެމެންނަށް ވަރަށް ދެރަކޮށް ދިމާވި ކަމެއް،" ޑެޝޯމްޕްސް ބުންޏެވެ.
އެމްބާޕޭ ކުރި އެޓޭކެއްގައި އޮސްޓްރިއާގެ މެކްސިމިލިއަން ވޮބާ ޖެހި ބައި ގޯލުން ރޭ ފްރާންސް މޮޅުވިއިރު، ދެން އެ ޓީމު ކުޅޭ މެޗުގައި ބައްދަލުކުރާނީ ނެދަލެންޑްސްއާ އެވެ. އެ މެޗުގައި އެމްބާޕޭ އަށް ކުޅެވޭނެތޯ ނޫސްވެރިއަކު ކުރި ސުވާލަށް ދިން ޖަވާބުގައި ޑެޝޯމްޕްސް ބުނީ އެ ވާހަކަ ދައްކަން އަދި އަވަސް ކަމަށެވެ.
"ފްރާންސް އަބަދުވެސް ވަރުގަދަވާނީ ކީލިއަން (އެމްބާޕޭ)އާ އެކު، ދެން، އޭނަ ނެތިއްޖެ ހާލަތެއްގެ ވާހަކަ ދައްކާނީ އެ ކަމެއް އައުމުން،" ޑެޝޯމްޕްސް ބުންޏެވެ.
ފީފާ ވޯލްޑް ކަޕްގައި އެމްބާޕޭ 12 ގޯލު ޖަހާފައިވީ ނަމަވެސް، އަދި އޭނާ އަށް ޔޫރޯއެއްގައި ގޯލެއް ނުޖެހެ އެވެ. ދާދި ފަހުން ރެއާލް މެޑްރިޑަށް ބަދަލުވި އެމްބާޕޭ ވަނީ ފްރާންސަށް ކުޅުނު 80 މެޗުން 47 ލަނޑު ޖަހައިފަ އެވެ.
