ނަން: ކްރިސްޓިއާނޯ ރޮނާލްޑޯ
އުފަން ތާރީހް: 5 ފެބްރުއަރީ 1985 (33)
ޤައުމު: ޕޯޗުގަލް
މަގާމް: ފޯވަޑް
ކްލަބް: އަލް ނަސްރު (ސައުދީ އަރަބިއްޔާ)
ގައުމީ ޓީމަށް ކުޅެން ފެށީ: 2003 ވަނަ އަހަރު
ދުނިޔޭގެ މޮޅު ކުޅުންތެރިޔާގެ މަގާމު ފަސް ފަހަރު ހޯދާފައިވާ ކްރިސްޓިއާނޯ ރޮނާލްޑޯގެ ބައިނަލްއަޤްވާމީ ކެރިއަރުގައި މި އަހަރުގެ ޔޫރޯ އަކީ 11 ވަނަ މުބާރާތެވެ. އަދި މިއީ އޭނާ ޔޫރޯގައި ކުޅޭ ހަ ވަނަ ފަހަރެވެ.
މިހާރު އުމުރުން 39 އަހަރުވެފައިވާ ރޮނާލްޑޯގެ ޕޯޗުގަލްގެ ގައުމީ ޓީމަށް ކުޅެންފެށީ 2003 ވަނަ އަހަރެެވެ. ބައިނަލްއަޤްވާމީ ކެރިއަރުގެ ފުރަތަމަ މުބާރާތަކީ 2004 ވަނަ އަހަރު ޕޯޗުގަލްގައި އޮތް ޔޫރޯ އެވެ. އޭރު ރޮނާލްޑޯގެ އުމުރުން 19 އަހަރެވެ. އެ މުބާރާތުގެ ފައިނަލަށް ޕޯޗުގަލް ދަތުރުކުރި ނަމަވެސް، ޕޯޗުގަލް އަށް ކުރިމަތިވީ ނާކާމިޔާބީއެވެ.
އޭގެ ފަހުން ރޮނާލްޑޯ ވަނީ ޕޯޗުގަލްގެ ގައުމީ ޓީމަށް 150 އަށް ވުރެ ގިނަ މެޗު ކުޅެފަ އެވެ. ރޮނާލްޑޯ އަކީ ޕޯޗުގަލްގެ ގައުމީ ޓީމަށް މިހާތަނަށް އެންމެ ގިނަ މެޗު ކުޅުނު ކުޅުންތެރިޔާ އެވެ. އަދި ބައިނަލްއަޤްވާމީ ފުޓްބޯޅައިގެ ތާރީހުގައި ވެސް މިހާތަނަށް އެންމެ ގިނަ މެޗު ކުޅެފައިވާ ކުޅުންތެރިޔާ އެވެ. ގައުމީ ޓީމަށް 100 އަށް ވުރެ ގިނަ ލަނޑު ޖަހައި، ރޮނާލްޑޯ އަކީ ބައިނަލްއަޤްވާމީ ފުޓްބޯޅައިގައި މިހާތަނަށް އެންމެ ގިނަ ލަނޑު ޖަހާފައިވާ ކުޅުންތެރިޔާ އެވެ.
ރޮނާލްޑޯ އަކީ 2008 ވަނަ އަހަރުން ފެށިގެން ޕޯޗުގަލްގެ ކެޕްޓަނެވެ. ރޮނާލްޑޯގެ ކެޕްޓަންކަމުގެ ދަށުން ޕޯޗުގަލް އިން ވަނީ ދެ މުބާރާތެއް ކާމިޔާބުކޮށްފަ އެވެ. އެއީ 2016 ވަނަ އަހަރުގެ ޔޫރޯ އާއި 2019 ވަނަ އަހަރު ނޭޝަންސް ލީގުގެ ތައްޓެވެ.
ރޮނާލްޑޯގެ ކްލަބު ކެރިއަރު އޭނާ ފެށީ ޕޯޗުގަލްގެ ސްޕޯޓިން ލިސްބަން އިންނެވެ. ސްޕޯޓިންގެ ޔޫތު ޓީމުގައި ރޮނާލްޑޯގެ ފަރާތުން ފެނުނު މޮޅު ކުޅުމާ އެކު، އުމުރުން 16 އަހަރުގައި އޭނާ އަށް ސްޕޯޓިންގެ ސީނިއާ ޓީމުން ޖާގަ ލިބުނެެެވެ. ޕޯޗުގަލްގެ ފުރަތަމަ ޑިވިޝަންގައި ރޮނާލްޑޯ ފުރަތަމަ މެޗު ކުޅުނީީ 2002 ވަނަ އަހަރެވެ.
މެންޗެސްޓާ ޔުނައިޓެޑްގެ ކޯޗު އެލެކްސް ފާގަަސަންގެ ލޮލުގައި ރޮނާލްޑޯ އަޅައިގަތީ 2003 ވަނަ އަހަރު ސްޕޯޓިން އާއި ޔުނައިޓެޑް ކުޅުނު އެކުވެރިކަމުގެ މެޗެއްގަ އެވެ. ޔުނައިޓަޑަށް ކުޅުމަށްފަހު ރޮނާލްޑޯ ވަނީ ރެއާލް މެޑްރިޑް އަދި ޔުވެންޓަސް އަށްކުޅެފައެވެ. މިހާރު ކުޅެމުންދަނީ ސައުދީ އަރަބިއްޔާގެ އަލް ނަސްރަށެވެ.
ފުޓްބޯޅައިގައި އުފެދުނު އެންމެ މޮޅު ކުޅުންތެރިންގެ ތެރޭގައި ހިމެނޭ ރޮނާލްޑޯގެ ފަހު ޔޫރޯއަށް މި އަހަރު މުބާރާތްވުމަކީ ގާތްކަމެކެވެ. އެހެންކަމުން މި މުބާރާތުގެ ހާއްސަކަން ރޮނާލްޑޯއަށް ބޮޑުވެ އެވެ.
