ޕޮލެންޑަކީ މި ފަހަރުގެ ޔޫރޯ ފުޓްބޯޅަ މުބާާރާތުގެ ފަހު ތިން ޖާގައިގެ ތެރެއިން އެއް ޖާގަ ހޯދި ޓީމެވެ. ޕޮލެންޑުން ޖެހިޖެހިގެން ފަސް ވަނަ ފަހަރަށް ޔޫރޯ ފުޓްބޯޅަ މުބާރާތުގައި ވާދަކުރަން ފުރުސަތު ހޯދީ ޕްލޭއޮފްގައި ވޭލްސްގެ މައްޗަށް ކުރިހޯދައިގެންނެވެ. ޕޮލެންޑުން އެންމެ ފުރަތަމަ ޔޫރޯގައި ވާދަކުރީ 2008 ވަނަ އަހަރު އެވެ.
ޔޫރޯގައި މިހާތަނަށް ޕޮލެންޑްގެ ރެކޯޑަށް ބަލާއިރު، އެ ޓީމު ވާދަކުރި ހަތަރު މުބާރާތުގެ ތެރެއިން ތިން މުބާރާތުގައި ކެޓީ، ގްރޫޕް ސްޓޭޖުންނެވެ. ފްރާންސްގައި 2016 ވަނަ އަހަރު ބޭއްވި ޔޫރޯ ފުޓްބޯޅަ މުބާރާތުގައި ޕޮލެންޑް ވަނީ ކުއާޓާ ފައިނަލުގައި ކުޅެފަ އެވެ. ކުއާޓާގައި އެ ޓީމު ބަލިވީ މުބާރާތުގެ ޗެމްޕިއަންކަން ހޯދި ޕޯޗުގަލް އަތުންނެވެ.
ޕޮލެންޑުގެ ކޯޗަކަށް ހުރީ އެ ގައުމުގެ ޒުވާން ގައުމީ ޓީމުތަކަށް ކުރިން ކުޅެ، 21 އަހަރުން ދަށުގެ ގައުމީ ޓީމުގެ ކުރީގެ ކޯޗު، މައިކަލް ޕްރޮބިއާޒް އެވެ. ޕްރޮބިއާޒް، ޕޮލެންޑްގެ ކޯޗުކަމާ ހަވާލުވީ، މިދިޔަ އަހަރުގެ ސެޕްޓެމްބަރު މަހުގެ 20 ވަނަ ދުވަހު އެވެ. އެއީ، އޭރު އެ ޓީމުގެ ކޯޗަކަށް ހުރި ޕޯޗުގަލްގެ ކުރީގެ ކޯޗު، ފެނާންޑޯ ސަންޓޯސް ވަކިކުރުމަށް ފަހު އެވެ.
ޕްރޮބިއާޒް ޓީމާ ހަވާލުވެ، މި އަހަރު މާޗް މަހު ކޮލިފައިން ޕްލޭއޮފްގައި ޕޮލެންޑް މޮޅުކޮށްދިނީ ވޭލްސް އަތުން ޕެނަލްޓީގަ އެވެ.
މި ފަހަރުގެ ޔޫރޯ ފުޓްބޯޅަ މުބާރާތުގައި ޕޮލެންޑް ހިމެނެނީ، ނެެދަލެންޑްސް އާއި އޮސްޓްރިއާ އަދި ފްރާންސާ އެއް ގްރޫޕެއްގަ އެވެ. މި ގްރޫޕުން ޕޮލެންޑަށް ކުރިއަށްދެވެން އޮތީ، ފްރާންސް ނޫނީ ނެދަލެންޑްސް ބަލިކޮށްގެން ނޫނީ، އެންމެ ރަނގަޅު ނަތީޖާ ނެރޭ ތިން ވަނަ އަށް ދާ ޓީމުތަކުގެ ތެރޭގައި ހިމެނޭ ވަރަށް ޕޮއިންޓް ހޯދައިގެންނެވެ.
ޕޮލެންޑަކީ ޔޫރަޕްގެ ފުޓްބޯޅައިގައި ނަން މަޝްހޫރު ކުޅުންތެރިން ހިމެނޭ ޓީމެކެވެ. އެ ޓީމުގެ އެންމެ ތަފާތު ކުޅުންތެރިއަކީ، ރޮބަޓް ލެވަންޑޯސްކީ އެވެ. ދެން، އެ ޓީމުން ފާހަގަކޮށްލެވޭ އެހެން ކުޅުންތެރިންނަށް ބަލާއިރު، އާކަންޑިއުޒް މިލިކް އާއި ޕިއޮޓްރޭ ޒިއެލިންސްކީ ހިމެނެ އެވެ.
