އެސްޕަޔާ އެކަޑަމީގެ މީޑިއާ ޕާޓްނަރަކަށް އަދަދު ހަމަޖައްސައި އެއްބަސްވުމުގައި ސޮއިކޮށްފި އެވެ.
ގައުމީ ފުޓުބޯޅަ ދަނޑުގައި ބޭއްވި ހާއްސަ ހަފުލާއެއްގައި އެސްޕަޔާ ސްޕޯޓްސް އެކަޑަމީގެ ފަރާތުން ސޮއިކުރެއްވީ އެ އެކަޑަމީގެ ރައީސް ހަސަން އަދުހަމް (ސަޑޭ) އެވެ. އަދި "އަދަދު"ގެ ފަރާތުން އެއްބަސްވުމުގައި ސޮއިކުރެއްވީ "އަދަދު"ގެ މާކެޓިން މެނޭޖަރު އިސްމާއިލް ޝިއުތު އެވެ.
މި އެއްބަސްވުމުގެ ދަށުން އެސްޕަޔާ އެކަޑަމީގެ ހަރަކާތްތައް އަދަދު ނޫހުން ގެނެސްދޭނެ އެވެ.
މި ރަސްމިއްޔާތުގައި އެސްޕަޔާ އެކަޑަމީން ވަނީ އީގަލްސް އެކަޑަމީގެ ކުދިން ތަމްރީނު ކުރުމަށް އެ އެކަޑަމީ އާއެކު ވެސް އެއްބަސްވުމުގައި ސޮއި ކޮށްފަ އެވެ. މީގެ އިތުރުން އެސްޕަޔާ އެކަޑަމީގެ ޓެކްނިކަލް ޑިރެކްޓަރަކަށް މުހައްމަދު ޝިޔާޒް (މޯހަން) ވެސް ވަނީ ހަމަޖައްސައިފަ އެވެ.
މި ހަފުލާގައި އެސްޕަޔާ އިން ވަނީ އެ އެކަޑަމީގެ ކޯޗުންނާ އެކު ވެސް އެއްބަސްވުމުގައި ސޮއިކޮށްފަ އެވެ.
އެ އެކަޑަމީގެ ކޯޗުންގެ ގޮތުގައި ހަމަޖެއްސީ ޓީސީ ސްޕޯޓްސް ކުލަބްގެ ކުރީގެ ކުޅުންތެރިޔާ އަހުމަދު ފައްރާހު (ފައްރަ), ވިކްޓަރީއާ އެކު ދެ ވަނަ ޑިވިޝަން ކާމިޔާބުކުރި ކޯޗު ސޮބާހް މުހައްމަދު (ސޮބާ), ތަޖުރިބާކާރު ފުޓްސަލް ކޯޗު އަހުމަދު ނިޔާޒް (ނިޔާ), އަންހެން ގައުމީ ޓީމު ކުޅުންތެރިޔާ އަދި ސީ ލައިސަންސް ކޯޗު ހައްވާ ހަނީފާ އަދި ޝިޔާނާ އަހުމަދު ޒުހައިރު އެވެ.
ގައުމީ ލެވަލްގެ ފެންވަރު ރަނގަޅު ގިނަ ފުޓްބޯޅަ ކުޅުންތެރިންތަކެއް އުފެއްދުމުގެ ވިސްނުމުގައި އެސްޕަޔާ ފުޓްބޯލް އެކެޑަމީ ލޯންޗްކުރީ މީގެ ހައެއްކަ މަސް ދުވަސް ކުރިންނެވެ. އެ އެކަޑަމީގެ ކުޅުންތެރިން އަންނަނީ ފާއިތުވި މަސްތަކުގައި މާލެ ސަރަަހައްދުގެ އެކި މުބާރާތްތަކުގަައި މޮޅު ކުޅުމެއް ދައްކަމުންނެވެ.
