ކުރިއަށް އޮތް ރައްޔިތުންގެ މަޖިލީހުގެ އިންތިހާބުން ސަރުކާރާ އިދިކޮޅު ފަރާތްތަކަށް ކާމިޔާބު ލިބި ރައްޔިތުންގެ މަޖިލީހުގެ މެޖޯރިޓީ ލިބިއްޖެނަމަ ދައުލަތުގެ ދެ ބާރުގެ މެދުގައި އޮންނާނީ ހަމަނުޖެހުން ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
އައްޑޫ މަރަދޫ ދާއިރާއަށް ވާދަކުރައްވާ ޕީއެންސީގެ ކެންޑިޑޭޓުގެ ކެމްޕޭން ޖަލްސާގައި ރައީސް ވިދާޅުވީ ސިޔާސީ މަސްރަހުން ފެންނަ މަންޒަރު ބަދަލުވެފައިވާ ކަމަށެވެ. އެގޮތުން, މީގެކުރިން ފެނިފައިވަނީ ސިޔާސީ ގޮތުން މީހުން ހައްޔަރުކުރާ މަންޒަރު ކަމަށާއި އެހެން ނަމަވެސް އެމަނިކުފާނު އެގޮތަށް ކަންތައްތައް ނުކުރައްވާނެ ކަމަށް ރައީސް ވިދާޅުވި އެވެ.
"ސިޔާސީ މީހަކަށްވީތީ އެމީހަކަށް އުނދަގޫކުރާ ތަނެއް ނުފެންނާނެ. ނޫނިއްޔާ އެކަހަލަ އެއްވެސް ކަންކަމެއް, ކުރީގައި ފެނުނު އެއްވެސް ކަމެއް ނުފެންނާނެ. ބަދަލެއް ނުހިފާނަން. ގައުމަށް ހަގީގަތުގައި ވެސް ހަމަޖެހުން ގެންނަން މަސައްކަތް ކުރަނީ," ރައީސް ވިދާޅުވި އެވެ.
އެ ފަރާތްތަކުން ދައްކަމުންދަނީ ރައީސް ފާހަގަކުރެއްވި ކަންކަމުގެ އިދިކޮޅު ކަމަށް ވިދާޅުވެ އެމަނިކުފާނު ވަނީ އެ ބޭފުޅުން ބަދަލުހިފުމަށް އަބަދުވެސް ހިތްވަރުދޭ ގޮތަށް ވާހަކަ ދައްކަވާ ކަމަށް ތުހުމަތު ކުރައްވާފަ އެވެ.
"އަބަދުވެސް ހަމަނުޖެހުމުގެ ރޫހުގެ އިހުސާސްވާތަން އަޅުގަނޑުމެންނަށް ފެންނަނީ. އެ ރޫހަށް އެ ވިސްނުމަށް އަޅުގަނޑުމެން ދެން ޖާގަ ދޭނެ ކަމެއް ނެތް," އެމަނިކުފާނު ތާއީދުކުރައްވާ ކެންޑިޑޭޓުންނަށް ވޯޓު ދެއްވުމަށް އެދިވަޑައިގެން ރައީސް ވިދާޅުވި އެވެ.
މަޖިލިސް އިންތިހާބުގައި ވޯޓު ދެއްވާއިރު ހަމަޖެހުން އިސްކުރުމަށް ރައީސް އެދިވަޑައިގެންނެވި އެވެ. މިހާރު ވެސް އިދިކޮޅު މެޖޯރިޓީން ސަރުކާރަށް ޖެއްސުން ކުރަމުންދާ ކަމަށާއި އިދިކޮޅުން ދެންވެސް ކަން ކުރާނީ އެހެން ކަމަށް ރައީސް ވިދާޅުވި އެވެ.
"މި ދެންނެވި ބަދަލު ހިފުމާއި ދެކޮޅު ހެދުމުގެ ރޫހަށް މަޖިލިސް ތެރެއިން ޖާގަ ދީފި ކަމަށް ވަންޏާ ފެންނާނީ އެކަން. މަޖިލީހާއި ސަރުކާރާ ހަމަނުޖެހުމުގެ ތެރޭގައި ދާނީ. ރައްޔިތުން ތިބޭނީ މުޅިން ބާކީވެފައި," ރައީސް ވިދާޅުވި އެވެ.
"ހަމަނުޖެހުމުގެ ސައިކަލްގެ ތެރެއަށް ދާންވީ ސަބަބެއް ނެތެއް ނޫންތޯ. ބޭނުންވަނީ ތަރައްގީ ގެނެސް ހަމަޖެހުން ގެންނަން."
