އެފްއޭއެމް އެމްޕީއެލް ދެ ވަނަ ޑިވިޝަން ފުޓުބޯޅަ މުބާރާތުގައި ގްރޫޕް ސްޓޭޖުގައި މަސް އޮޑި ސްޕޯޓްސް ކްލަބުން ކުޅުނު ފަހު މެޗުން ކުޑަހެންވޭރު ޔުނައިޓެޑް އަތުން 1-0 އިން މޮޅުވެ، ގްރޫޕްގެ އެއް ވަނަ ކަށަވަރުކޮށްފި އެވެ.
މަސް އޮޑިން، ގްރޫޕް އޭގެ އެއް ވަނަ ހޯދީ ކުޅުނު ހުރިހާ މެޗަކުން މޮޅުވެގެން 12 ޕޮއިންޓާ އެކު އެވެ. އެ ގްރޫޕްގެ ދެ ވަނައިގައި އޮތް ކުޑަހެންވޭރު ޔުނައިޓެޑާއި ތިން ވަނައިގައި އޮތް މަހިބަދޫ ސްޕޯޓްސް ކްލަބަށް ވަނީ ތިން މެޗުން ހަ ޕޮއިންޓް ލިބިފަ އެވެ.
މި ގްރޫޕުން ގަދަ ދެ ޓީމުގެ ތެރޭގައި ހިމެނިގެން، ކުއާޓާ ފައިނަލުގެ ޖާގަ ހޯދާ ޓީމެއް ކަނޑައެޅޭނީ، މި މަހު 28 ވަނަ ދުވަހު މަހިބަދޫ އާއި ކުޑަހެންވޭރު ކުޅޭ މެޗުންނެވެ. އެ މެޗުން ބަލިވާ ޓީމަކަށް ވެސް ކުއާޓާގެ ޖާގަ ލިބުމުގެ ފުރުސަތު އެބައޮތެވެ. އެއީ، އެންމެ ރަނގަޅު ނަތީޖާ ނެރޭ ތިން ވަނަ އަށް ދާ ޓީމުތަކުގެ ތެރޭގައި ހިމެނިގެންނެވެ.
މަސް އޮޑި ޓީމުގެ ކުޅުންތެރިން ލަނޑު ޖެހުމަށް ފަހު އުފާފާޅުކުރަނީ.--- ފޮޓޯ: އަބްދުﷲ އިޔާން / އަދަދު
ގަލޮޅު ދަނޑުގައި އިއްޔެ ހަވީރު ކުޅުނު މެޗަކީ މި ފަހަރުގެ ދެ ވަނަ ޑިވިޝަން ފުޓްބޯޅަ މުބާރާތުގައި މަސް އޮޑި އަށް އެންމެ އުނދަގުލުން މޮޅުވެވުނު މެޗެވެ. މި މެޗުގައި ފެނިގެންދިޔަ ހަމައެކަނި ގޯލު ޖެހީ، 38 ވަަނަ މިނިޓްގަ އެވެ. އެ ޓީމުގެ ލަނޑު ޖެހީ، އޭރިއާތެރެއަށް މަސް އޮޑީގެ އަލީ ޝާމިސް (ތޮއްޕޭ) ނެގި ހުރަަހަކުން، ކުޑަހެންވޭރު ޔުނައިޓެޑްގެ ޑިފެންސްގެ ތެރެއިން މަސް އޮޑީގެ ހުސެއިން ޝަރީފް ޖެހި ގޯލެކެވެ. ޝަރީފް ވެއްޓިގެންފައި ވޮލީ އަކުން ފޮނުވާލި ބޯޅަ އަމާޒުވީ ގޯލުގެ ތެރެއަށެވެ.
މި މެޗުގެ ދެ ވަނަ ހާފުގައި ކުޑަހެންވޭރު ޔުނައިޓެޑުން ނަތީޖާ ހަަމަހަމަކުރެވޭތޯ ގިނަ މަސައްކަތްތަކެއް ކުރި އެވެ. އެކަމަކު، މަސް އޮޑި ޓީމުގެ ފަހަތުގައި ކުޅެމުންދިޔަ، ގައުމީ ޓީމުގެ ކުރީގެ ޑިފެންޑަރު، މުހައްމަދު ރަޝީދު (ހޮކޭ) ވަނީ މޮޅު ކުޅުމެއް ދައްކައި، އެ ޓީމުގެ މި ނަތީޖާ ދެމެހެއްޓުމުގައި އިސް ރޯލެއް ކުޅެފަ އެވެ.
ދެ ވަނަ ގޯލެއް ޖަހަން މަސް އޮޑިން ވެސް އެޓޭކްތަކެއް ކުރި އެވެ. އެކަމަކު، އޭގެއިން ފުރުސަތެއްގެ ބޭނުމެއްހިފޭ ގޮތެއްނުވި އެވެ.
މިހާތަނަށް މަސް އޮޑީގެ އިތުރުން ދެ ވަނަ ޑިވިޝަނުގެ ކުއާޓާ ފައިނަލްގެ ޖާގަ ޔަގީންކޮށްފައިވަނީ ޓެންޓް ސްޕޯޓްސް ކްލަބް އާއި ވިކްޓަރީ ސްޕޯޓްސް ކްލަބް އެވެ.
ދެ ވަަނަ ޑިވިޝަން ފުޓްބޯޅަ މުބާރާތުގައި މިއަދު ހަވީރު ކުޅޭނީ ގްރޫޕް ބީގައި ނިއު ރޭޑިއަންޓް ސްޕޯޓްސް ކްލަބް އާއި ބީޖީ ސްޕޯޓްސް ކްލަބް އެވެ. މި ދެ ޓީމު މި ވަގުތު އޮތީ ޕޮއިންޓުގެ ގޮތުން އެއްވަރުވެފަ އެވެ. ދެ ޓީމަށް ވެސް ވަނީ ހަ ޕޮއިންޓް ލިބިފަ އެވެ.
