ހުޅުމާލެ ބެލެހެއްޓުމާއި އެ ރަށުގެ މުނިސިޕަލް މަސައްކަތް މާލޭ ސިޓީ ކައުންސިލާ ހަވާލު ކުރުމުގެ ގޮތުން، މިވަގުތު ރަށް ހިންގަމުންދާ އާބަންކޯ އާއި ސިޓީ ކައުންސިލާ ދެމެދު އެމްއޯޔޫއެއްގައި މިއަދު ސޮއިކޮށްފި އެވެ.
ހުޅުމާލޭގެ މުނިސިޕަލް މަސައްކަތާއެކު މުނިސިޕަލް ބިންތަކާއި މުވައްޒަފުން ސިޓީ ކައުންސިލަށް ބަދަލު ކުރަން މިދިޔަ ޑިސެމްބަރު 31، ގައި ނިންމެވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒެވެ. މިއަދުގެ އެމްއޯޔޫގައި މާލޭ ސިޓީ ކައުންސިލާއި އާބަންކޯގެ އިތުރުން މިނިސްޓްރީ އޮފް ސިޓީސް އިން ވެސް ސޮއި ކުރި އެވެ.
ހުޅުމާލޭގެ މުނިސިޕަލް މަސައްކަތް އާބަންކޯ އަތުން ނެގުމަށްފަހު ސިޓީ ކައުންސިލަށް ހަވާލު ކުރަން ނިންމީ ކެބިނެޓުގައި ބޭއްވި ބައްދަލުވުމެއްގަ އެވެ. އެކަން އިއުލާނު ކުރެއްވީ ރައީސް މުއިއްޒު އެކްސްގައި ކުރެއްވި ޕޯސްޓެއްގަ އެވެ.
"ގާނޫނުގައި ވަރަށް ސާފުކޮށް ބުނެފައިވާ ގޮތަށް، ހުޅުމާލޭގެ މުނިސިޕަލް ސާވިސްތައް މާލޭ ސިޓީ ކައުންސިލަށް ބަދަލު ކުރުމަށް މިއަދު ކެބިނެޓުގައި ބޭއްވި ބައްދަލުވުމުގައި ނިންމައިފިން. އެކަމަށް ބޭނުންވާ އިންތިޒާމުތައް މާދަމާއިން ފެށިގެން ފަށާނެ،" ރައީސް ވިދާޅުވި އެވެ.
ރައީސް ވިދާޅުވީ އާބަންކޯގެ ދަށުގައި މިވަގުތު ހުރި މުނިސިޕަލް ބިންތަކާއި މުވައްޒަފުންނާއި އެހެނިހެން ތަކެތި އެއް މަސް ދުވަހުގެ ތެރޭގައި މާލޭ ސިޓީ ކައުންސިލަށް ބަދަލު ކުރެވޭނެ ކަމަށެވެ.
"މުނިސިޕަލް ބިންތަކާއި ސާމާނާއި މެޝިނަރީސް އާއި މުވައްޒަފުން އަދި އެހެނިހެން ތަކެތި މާލޭ ސިޓީ ކައުންސިލަށް އެއް މަސް ދުވަހުގެ ތެރޭގައި ބަދަލު ކުރެވޭނެ. ހުރިހާ މުވައްޒަފުންނަށް މިހާރު ލިބެމުން އަންނަ މުސާރަ އާއި އިނާޔަތްތައް އެއް އަހަރު ދުވަހަށް ލިބޭނެ،" އެމަނިކުފާނު ވިދާޅުވި އެވެ.
ހުޅުމާލެއަކީ މާލެ ސިޓީގެ ބައެއް ނަމަވެސް މިހާތަނަށް އެ ރަށް ބަލަހައްޓަމުންދިޔައީ އާބަންކޯއިންނެވެ. އާބަންކޯއަކީ ސަރުކާރުގެ ކުންފުންޏެވެ. މާލޭ ސިޓީ ކައުންސިލުގެ ދަށަށް ހުޅުމާލެ ބެލެހެއްޓުން ބަދަލު ކުރުމަށް މީގެ ކުރިން ވެސް އެ ކައުންސިލް މަސައްކަތް ކުރި އެވެ. ނަމަވެސް ކުރީ ސަރުކާރުން ނިންމީ، އަބަދުވެސް ހުޅުމާލެ ހިންގަމުން އައި ގޮތަށް އާބަންކޯގެ ދަށުން ހިންގުމަށެވެ.
އެ މައްސަލަގަނޑުގެ ތެރޭގައި ޑިސެމްބަރު، 2021، ގައި އާބަންކޯގެ ދަށުގައި ރަޖިސްޓްރީކޮށްފައިވާ ހުރިހާ ބިމެއްގެ ރަޖިސްޓްރީ މާލޭ ސިޓީ ކައުންސިލުން ބާތިލު ކުރި އެވެ. ނަމަވެސް އެ މައްސަލަ ކޯޓަށް ވެއްދުމުން ކޯޓުން އެންގީ ރަޖިސްޓްރީތައް ބާތިލް ކުރަން ނިންމި ނިންމުމަށް އަމަލު ނުކުރުމަށެވެ.
ހުޅުމާލޭގެ މުނިސިޕަލް މަސައްކަތް އާބަންކޯއިން އަތުލުމަށްފަހު، މާލޭ ސިޓީ ކައުންސިލަށް ބަދަލު ކުރުމަކީ ރައީސް މުއިއްޒުގެ ރިޔާސީ ވައުދެކެވެ. އެއީ ސަރުކާރާ ހަވާލުވެވަޑައިގަންނަވާތާ 100 ދުވަހުގެ ތެރޭގައި ފުއްދަން އެމަނިކުފާނު ވެވަޑައިގެންފައިވާ ވައުދެކެވެ.
