ރޯމް (ޖެނުއަރީ 2) - އިޓަލީގެ ބިދޭސީ ފުޓްބޯޅަ ކުޅުންތެރިންނަށް ލިބެމުންދިޔަ ޓެކްސްގެ ލުއިތައް އުވާލަން ނިންމައިފި އެވެ.
އިޓަލީގައި ކުރިން ކުޅޭ ބިދޭސީ ފުޓްބޯޅަ ކުޅުންތެރިންނަށް ފަސް އަހަރުގެ ދުވަހުގެ މުއްދަތަކަށް ޓެކްސް ދައްކަން ޖެހެނީ ލިބޭ މުސާރައިގެ ދެ ބައިކުޅަ އެއްބަޔަށްވާ އަދަދަށެވެ. މިއީ، އިޓަލީގެ ފުޓްބޯޅަ ލީގުތަކުގައި ކުޅޭ ބިދޭސީ ކުޅުންތެރިންނަށް ލިބޭ ފައިދާ އެކެވެ.
އެކަމަކު، އިޓަލީގެ ސަރުކާރުން ވަނީ 2024 ވަނަ އަހަރުގެ ޖެނުއަރީ މަހުގެ އެއް ވަނަ ދުވަހުން ފެށިގެން ބިދޭސީ ކުޅުންތެރިންނަށް ދޭ ޓެކްސްގެ ލުއިތައް އުވާލައިފަ އެވެ. އެހެންކަމުން، މިހާރު ބިދޭސީ ކުޅުންތެރިންވެސް އިޓަލީގެ ކުޅުންތެރިން ދައްކާ މިންވަރަށް ޓެކްސް ދައްކަންޖެހޭނެ އެވެ.
މި ނިންމުމަށް އިޓަލީގެ ފުޓްބޯލް ޕްލޭޔާސް އެސޯސިއޭޝަނުން ވަނީ މަރުހަބާ ކިޔައިފަ އެވެ.
"އިޓަލީ އަށް ނިސްބަތްވާ ކުޅުންތެރިންނާއި ބިދޭސީ ކުޅުންތެރިންނަށް މިހާރު އެއް ހަމައެއްގައި ވާދަކުރެވޭނެ،" އެ އެސޯސިއޭޝަންގެ ރައީސް ޔުމްބޭޓޯ ކަލްކަގްނޯ ބުންޏެވެ.
"އިޓަލީގެ ސަރުކާރަށް ޝުކުރު އަދާކުރަންޖެހޭ."
އިޓަލީގައި ކުޅޭ ބިދޭސީ ކުޅުންތެރިންނަށް ބޮޑެތި މުސާރަތައް ކްލަބުތަކުން ދޭއިރު، ޓެކްސްގެ ލުއިތައް ލިބޭތީ މީގެ ކުރިންވެސް ވަނީ ސަރުކާރަށް ފާޑުކިއުންތައް އަމާޒުވެފަ އެވެ.
