ޖުޑިޝަލް ސާވިސަސް ކޮމިޝަން (ޖޭއެސްސީ) އަށް ގާނޫނީ ވަކީލަކު އިންތިހާބުކުރުމަށް އިއްޔެ ބޭއްވި އިންތިހާބު އަލީ އަބްދުއްލަތީފް ކާމިޔާބުކުރައްވައިފި އެވެ.
ރާއްޖޭގެ ކޯޓުތަކަށް ގާޒީންނާއި، ފަނޑިޔާރުން އައްޔަން ކުރުމާއި ވަކިކުރުމާއި މަގާމުގެ ކުރިއެރުންތައް ދިނުމުގެ ބާރުތަކާއި، ކޯޓުތަކުގެ ގާބިލްކަމާއި، ފެންވަރާއި، ސުލޫކު ކަށަވަރުކުރުމަށް، ގާނޫނު އަސާސީގެ ދަށުން އެކުލަވާލާފައިވާ މިނިވަން މުއައްސަސާގެ އިންތިހާބު ބާއްވައިދިނީ ބާ ކައުންސިލުންނެވެ.
މި އިންތިހާބަށް ކުރިމަތިލެއްވީ އަލީ އަބްދުއްލަތީފް އެކަނި ކަމުން ނެގީ ފެންނަ ނުފެންނަ ވޯޓެކެވެ. ރަޖިސްޓަރީވީ 659 ވަކީލުންގެ ތެރެއިން 443 ވަކީލުން ވޯޓުލީ މި އިންތިހާބުގައި އަލީ އަބްދުއްލަތީފް އަށް 275 ވޯޓު ލިބުނެވެ. އެ މަގާމަށް އޭނާ ހޮވަން ނުފެންނަ ކަމަށް ވޯޓު ދިނީ 168 ވަކީލުންނެވެ.
ޖޭއެސްސީގެ މެމްބަރުކަމުގެ މަސްއޫލިއްޔަތާ އަލީ އަބްދުއްލަތީފް ހަވާލުވެވަޑައިގެންވާނީ ރައީސުލްޖުމްހޫރިއްޔާގެ ކުރިފުޅުމަތީގައި، މަގާމުގެ ހުވާ ކުރެއްވުމަށް ފަހު އެވެ.
އަލީ އަބްދުއްލަތީފަކީ، 2018 ވަނަ އަހަރުގެ ފެބްރުއަރީ މަހު އޭރުގެ ރައީސް އަބްދުﷲ ޔާމީންގެ އޯޑަރަށް ސުޕްރީމް ކޯޓުގެ ފަނޑިޔާރުން ހައްޔުރުކުރުމުން، އޭގެ ތެރެއިން ފަނޑިޔާރު އަލީ ހަމީދުގެ ވަކީލުކަން ކުރެއްވި ވަކީލެކެވެ. ދިވެހިރާއްޖޭގެ އިސްލާމީ ޔުނިވާސިޓިން ލޯ ޑިގްރީ ހާސިލްކުރެއްވި އަލީ އަބްދުއްލަތީފް ވަނީ ޖުމްހޫރީ ޕާޓީގައި ވެސް ހަރަކާތްތެރިވެވަޑައިގެންފަ އެވެ.
ޖޭއެސްސީގައި ވަކީލުން ތަމްސީލުކުރައްވާ މެމްބަރުގެ މަގާމު ހުސްވީ ކުރިން ހުންނެވި، އަބްދުލްމާނިއު ހުސައިން މަގާމުން އިސްތިއުފާ ދެއްވުމުންނެވެ. ޖޭއެސްސީން ވަނީ އޭނާ ހައިކޯޓުގެ ފަނޑިޔާރު ކަމަށް އައްޔަންކޮށްފަ އެވެ.
ޖޭއެސްސީގައި ތިބެނީ ރައްޔިތުންގެ މަޖިލީހުގެ ރައީސްއާއި، މަޖިލީހުން ކަނޑައަޅާ މަޖިލީހުގެ މެންބަރަކާއި، މަޖިލީހުން ކަނޑައަޅާ އާންމު މީހަކާއި، ސުޕްރީމް ކޯޓުގެ ފަނޑިޔާރަކާއި، ހައި ކޯޓު ފަނޑިޔާރަކާއި، ދަށު ކޯޓު ފަނޑިޔާރަކާއި، ސިވިލް ސާވިސް ކޮމިޝަންގެ ރައީސްއާއި، ވަކީލުން ތަމްސީލްކުރަން މެންބަރެކެވެ. އަދި ރައީސުލްޖުމްހޫރިއްޔާ އައްޔަންކުރައްވާ މެންބަރަކާއި ބަންޑާރަ ނައިބު ވެސް އިންނަވަ އެވެ.
