ގައުމީ ލެވަލްގެ ފެންވަރު ރަނގަޅު ގިނަ ފުޓްބޯޅަ ކުޅުންތެރިންތަކެއް އުފެއްދުމުގެ ވިސްނުމުގައި އެސްޕަޔާ ފުޓްބޯލް އެކެޑަމީ ލޯންޗްކޮށްފި އެވެ.
ގައުމީ އާއި ބައިނަލްއަގުވާމީ ލެވަލްގައި ރާއްޖޭގެ ފުޓްބޯޅަ އަށް ގިނަ ހިދުމަތްތަކެއް ކޮށްދީފައިވާ ކުޅުންތެރިން އިސްކޮށް ހަރަކާތްތެރިވާ އެސްޕަޔާ ފުޓްބޯލް އެކެޑަމީ ފެއްޓީ، އިއްޔެ ބްރައިޓްވޭ ސްކޫލްގައި ބޭއްވި އިވެންޓެއްގަ އެވެ.
އެސްޕަޔާ ފުޓްބޯލް އެކެޑަމީގެ މި އިވެންޓް ޝަރަފްވެރިކޮށްދެއްވީ، އިމިގްރޭޝަން ކޮންޓްރޯލަރު، މުހައްމަދު ޝަމްއާން ވަހީދު އެވެ.
އެސްޕަޔާ ފުޓްބޯލް އެކެޑަމީގެ އިސްކޮށް ހަރަކާތްތެރިވަނީ ގައުމީ ފުޓްބޯޅަ ޓީމުގެ ކުރީގެ ކުޅުންތެރިޔާ އަދި މި ވަގުތު ވިކްޓަރީ ސްޕޯޓްސް ކްލަބްގެ ކޯޗަކަށް މަސައްކަތް ކުރަމުން އަންނަ، މުހައްމަދު ސޮބާހު އިބްރާހިމް (ސޮބާ) އާއި ގައުމީ ޓީމާއި ފުރަތަމަ ޑިވިޝަނުގެ ގިނަ ޓީމުތަކަށް ކުޅެފައިވާ އަހުމަދު ފައްރާހު (ފައްރަ) އެވެ.
އެސްޕަޔާ ފުޓްބޯލް އެކެޑަމީ ފެއްޓުމަށް ބޭއްވުނު އިވެންޓްގެ ތެރެއިން: (ކ.ވ)، ޓޯޑް، ޑަކޭ، ޝައްމާން، ފައްރަ، ސޮބާ.--- ފޮޓޯ: އަބްދުﷲ އިޔާން/ އަދަދު
މީގެ އިތުރުން، މި އެކެޑަމީގައި ކުރީގެ ކުޅުންތެރިޔާ، އަދި ވިކްޓަރީގެ އެސިސްޓަންޓް ކޯޗު މުހައްމަދު ފުހައިދު (ޓޯޑް)، ކުރީގެ ކުޅުންތެރިޔާ އަދި ގައުމީ ފުޓްބޯޅަ ޓީމުގެ ގޯލްކީޕަރު ޓްރެއިނަރު، ހަސަން ހަމީދު (ޑަކޭ) ވެސް ބައިވެރިވެ އެވެ.
ބްރައިޓްވޭ ސްކޫލާ ގުޅިގެން، މި ވަގުތު އެސްޕަޔާ ފުޓްބޯލް އެކެޑަމީގެ މަސަައްކަތް ފެށިއިރު، އެ އެކެޑަމީން އިންޑިވިޖުއަލް ޓްރެއިނިން އަށް ފޯކަސްކޮށްގެން ވެސް ސެޝަންތަކެއް ގެންދާނެ އެވެ. މާލެ ސަރަަހައްދުގައި އެކެޑަމީގެ އެކި އިވެންޓްތައް ކުރިއަށް އޮތްތަނުގައި ބާއްވަން ވަނީ ރާވައިފަ އެވެ.
އެ ގޮތުން، ބޭނުންވާ ކޮންމެ ސްކޫލަކަށް ވެސް އެސްޕަޔާ ފުޓްބޯލް އެކެޑަމީއާ ގުޅިގެން މަސައްކަތް ކުރުމުގެ ފުރުސަތު އޮތީ ހުޅުވާލެވިފަ އެވެ.
އެސްޕަޔާ ފުޓްބޯލް އެކެޑަމީ ފެއްޓުމަށް އިއްޔެ ބޭއްވުނު އިވެންޓްގެ ތެރެއިން.--- ފޮޓޯ: އަބްދުﷲ އިޔާން/ އަދަދު
"ބޭނުންވަނީ މުސްތަގުބަލަށްޓަކައި ގައުމީ ލެވަލްގެ ފެންވަރު ރަނގަޅު ކުޅުންތެރިންތަކެއް އުފައްދަން،" އެސްޕަޔާ ފުޓްބޯލް އެކެޑަމީގެ މައިގަނޑު މަގުސަދާ ބެހޭގޮތުން، ފައްރަ ބުންޏެވެ.
އެސްޕަޔާ ފުޓްބޯލް އެކެޑަމީގައި މި ވަގުތު ވެސް 50 އަށް ވުރެން ގިނަ ކުޅުންތެރިން އެބަތިބި އެވެ. އެ އެކެޑަމީން ދެކޭ ގޮތުގައި ކުރިއަށް އޮތްތަނުގައި ކުދިން އިތުރުވެ، މަސައްކަތް ކުރިއަށްދާ ވަރަކަށް އެކެޑަމީގެ ކަންކަން އިތުރަށް ރަނގަޅުކޮށް، ހަރަކާތްތައް ފުޅާކުރެވިގެންދާނެ އެވެ.
ރާއްޖޭގައި އެކި ކުޅިވަރުތަކުން ގިނަ އަަދަދެއްގެ އެކެޑަމީތަކެއްގެ މަަސައްކަތް މިހާރު އެކި ކަންކޮޅުތަކުގައި އަންނަނީ ކުރިއަށްދަމުންނެވެ. އެކެޑަމީތަކުގެ މަސައްކަތް ކުރަން އޮތް އެންމެ ބޮޑު ގޮންޖެހުމަކީ ބޭނުންވާ ލެވަލަށް ކަންކަން ގެންދަން ކުޅިވަރުގެ ވަސީލަތްތައް ހަމަޖެހިފައި ނެތުމެވެ.
