28 ވަނަ ޓޭބަލް ޓެނިސް އެސޯސިއޭޝަން ޗެމްޕިއަންޝިޕްގެ ފިރިހެން ސިންގަލްސް ޗެމްޕިއަންކަން މުހައްމަދު ޝައްފާން އިސްމާއިލް ހޯދިއިރު، އަންހެން ސިންގަލްސް ޗެމްޕިއަންކަން ފާތިމަތު ދީމާ އަލީ ހޯދައިފި އެވެ.
މި ހަފްތާގެ އާދިއްތަ ދުވަހު ފެށި މުބާރާތުގައި ދީމާ ވަނީ އޭނާ ވާދަކުރި ހުރިހާ ކެޓަގަރީ އަކުން ޗެމްޕިއަންކަން ހޯދައިފަ އެވެ. އެއީ ފުރަތަމަ ޑިވިޝަންގެ އަންހެން ސިންގަލްސް، މިކްސް ޑަބަލްސްގެ އިތުރުން 17 އަހަރުން ދަށުގެ އަންހެން ސިންގަލްސް އަދި އަންހެން ޑަބަލްސް އެވެ.
ދީމާގެ ފަހަތުން ފުރަތަމަ ޑިވިޝަންގެ އަންހެން ސިންގަލްސް އަދި 17 އަހަރުން ދަށުގެ އަންހެން ސިންގަލްސް ދެ ވަނަ ހޯދީ މިޝްކާ މުހައްމަދު އިބްރާހިމް އެވެ. މިޝްކާ ވަނީ 15 އަހަރުން ދަށުގެ ސިންގަލްސް ޗެމްޕިއަންކަން ހޯދައި، ދީމާ އާ އެކު ފުރަތަމަ ޑިވިޝަންގެ އަންހެން ޑަބަލްސް އަދި 17 އަހަރުން ދަށުގެ އަންހެން ޑަބަލްސް ތަށި ހޯދާފަ އެވެ. އަދި މީގެ އިތުރުން 15 އަހަރުން ދަށުގެ އަންހެން ޑަބަލްސް ތަށި އައިޝަތު ޒާރާ ސާހިލްއާއެކު އޭނާ ހޯދި އެވެ.
ޝައްފާން ފުރަތަމަ ޑިވިޝަންގެ ސިންގަލްސް ޗެމްޕިއަންކަން ހޯދީ މޫސާ މުންސިފް އަހުމަދު ދެ ސެޓު ހޯދައި ކުރި ހޯދާފައިވަނިކޮށް ފަހަތުން އަރާ ހަތަރު ސެޓު ހޯދައިގެން 4-2 އިންނެވެ. މެޗުގެ ފުރަތަމަ ދެ ސެެޓު މުންސިފް ގެންދިޔައީ 7-11 އަދި 4-11 އިންނެވެ. ޝައްފާން ފަހަތުން އަރާ މޮޅުވީ 11-3، 11-9، 13-11 އަދި 11-3 އިން ސެޓުތައް ކާމިޔާބުކޮށްގެންނެވެ.
ޝައްފާން ވަނީ ސިންގަލްސްގެ އިތުރުން ދީމާއާ އެކު މިކްސް ޑަބަލްސް އަދި މުހައްމަދު ތާބިން ސުޖާއުއާ އެކު ޑަބަލްސް ޗެމްޕިއަންކަން ހޯދާފަ އެވެ.
މުބާރާތުގެ އެހެން ވަނަތަަކަށް ބަލާއިރު، ވެޓްރަންސް ޗެމްޕިއަންކަން ހޯދީ އަލީ އާދަމް މަނިކު (އަލިބެ) އެވެ. ދެ ވަނަ ހޯދީ އިބްރާހިމް ލަތީފް އެވެ. 19 އަހަރުން ދަށުގެ ފިރިހެން ޗެމްޕިއަންކަން ހޯދީ ޒީކް ހަސަން ލަތީފް އެވެ. ދެ ވަނަ ހޯދީ ތާބިން އެވެ.
ޒީކް ވަނީ 17 އަހަރުން ދަށުގެ ޗެމްޕިއަންކަންވެސް ހޯދާފަ އެވެ. ދެ ވަނަ ހޯދީ އުމެއިރު މުހައްމަދު މުއިއްޒު އެވެ. މި ބައިގެ ފިރިހެން ޑަބަލްސް ކާމިޔާބުކުރީ އުމެއިރު އާއި ޒީކް އެވެ. 17 އަހަރުން ދަށުގެ މިކްސް ޑަބަލްސް ޗެމްޕިއަންކަން ހޯދީ ޒީކް އާއި މިންހާ މަހުޖޫބު ސުޖާއުގެ ޕެއާ އެވެ. 17 އަހަރުން ދަށުގެ ފައިނަލުން ބަލިވި ނަމަވެސް އުމެއިރު ވަނީ 15 އަހަރުން ދަށުގެ ފިރިހެން ސިންގަލްސް ތަށި ހޯދައިފަ އެވެ. މި ބައިގެ ފިރިހެން ޑަބަލްސް ޗެމްޕިއަންކަން ހޯދީ އުމެއިރު އާއި މުހައްމަދު ހަލަފް ރާފިއު އެވެ.
15 އަހަރުން ދަށުގެ ފިރިހެން ސިންގަލްސް ދެވަނަ ހޯދީ އައުން އިބްރާހިމް ލަތީފް އެވެ. އަންހެން ސިންގަލްސް ދެވަނަ ހޯދީ މަރިޔަމް އުޒްމާ އަރީފް އެވެ. އަންހެން ޑަބަލްސް ދެވަނަ ހޯދީ މިންހާ އާއި އުޒްމާގެ ޕެއާ އެވެ.
މުބާރާތުގައި ކުރިއަށްދިޔަ އެންމެ ޖޫނިއާ އުމުރުފުރާކަމަށްވާ 13 އަހަރުން ދަށުގެ ފިރިހެން ސިންގަލްސް ޗެމްޕިއަންކަން ހޯދީ ޔަޒީން ހުސައިން ޝަރީފް އެވެ. ދެ ވަނަ ހޯދީ މުހައްމަދު އާލް އިމްރާން އެވެ. ތޭރަ އަހަރުން ދަށުގެ އަންހެން ސިންގަލްސް ޗެމްޕިއަންކަން ހޯދީ އައިޝަތު އަލްސާ ނާފިޒު އެވެ. ދެ ވަނަ ހޯދީ ސާރާ މޫސާ ޖަމީލް އެވެ.
