ރާއްޖޭގައި ކުޅޭ މެޗުން މޯހަން ބަގާން ސުޕަ ޖަޔަންޓް ބަލިކުރެވޭނެ ކަމަށް މާޒިޔާ ކޯޗު، ބޮސްނިއާގެ މިލޮމީރް ސެސްލިޖާ (މިލޯ) ބުނެފި އެވެ.
އޭއެފްސީ ކަޕްގެ ގްރޫޕް ޑީގައި ރޭ އިތުރު ވަގުތުގައި ޖެހި ގޯލާ އެކު، މޯހަން ބަގާން އިން ވަނީ އަމިއްލަ ދަނޑުގައި 2-1 އިން މާޒިޔާ ބަލިކޮށްފަ އެެވެ. ސްކޮޓްލެންޑަށް އުފަން، އޮސްޓްރޭލިއާ ގައުމީ ޓީމުގެ ފޯވާޑް ޖޭސަން ކަމިންގްސް ވަނީ މޯހަން ބަގާން އަށް ދެ ގޯލު ޖަހައިދީފަ އެވެ. މާޒިޔާގެ ގޯލު ޖެހީ ޖަޕާންގެ މިޑްފީލްޑަރު ޓޮމޯކީ ވާޑާ އެވެ.
މެޗަށް ފަހު މާޒިޔާ ކޯޗު މިލޯ ބުނީ ފުޓްބޯޅައިގައި ބައެއް ފަހަރު ވަރަށް ރަނގަޅަށް މަސައްކަތް ކުރުމަށް ފަހު ވެސް މި ގޮތަށް ނަތީޖާ ނުކުންނަ ފަހަރު އަންނަ ކަމަށެވެ.
"އަހަރެމެން އައީ އެ މީހުން (މޯހަން ބަގާން) ބަލިކުރަން. މިއީ ވަރަށް ރަނގަޅަށް ކުޅެވުނު، ވަރަށް އުނދަގޫ މެޗެއް. އަހަރެމެން އަމިއްލަ ދަނޑުގައި (ރާއްޖޭގައި) ކުޅޭ މެޗުން މޯހަން ބަގާން ބަލިކުރަން މަސައްކަތް ކުރާނަން. އެ މީހުންގެ ބަލިފައިތަށް ދެނެގަނެވިއްޖެ، ފުޓްބޯޅަ އަކީ ވަރަށް ފާޑެއްގެ ކަމެއް ބައެއް ފަހަރު. މޯހަން ބަގާން މި ހޯދި މޮޅަށް މަރުހަބާ ކިޔަން،" މިލޯ ބުންޏެވެ.
މިލޯ ވަނީ ރޭގެ މެޗުގައި އެ ޓީމުގެ ކެޕްޓަން، ސަމޫހު އަލީ (ސަމުއްޓެ) ނެތުމަކީ ދެރައެއް ކަމަށް ބުނެފަ އެވެ.
މިލޯ ބުނީ ޖުމްލަކޮށް މެޗަށް ބަލާއިރު، މާޒިޔާ އިން ޓެކްޓިކަލީ ވަރަށް ރަނގަޅަށް ކުޅެން މަސައްކަތްކުރި ކަމަށާއި އެކަން އެ ގޮތަށް ކުރުމަށް ޓީމުގެ ކުޅުންތެރިންނާއި މެނޭޖްމަންޓް ކުރި މަަސައްކަތް ފާހަގަކުރާ ކަމަށެެވެ.
މިއީ މާޒިޔާގެ މައްޗަށް މޯހަން ބަގާން އިން ޖެހިޖެހިގެން ހޯދި ތިން ވަނަ މޮޅެވެ. މި ދެ ޓީމު ކުޅުނު ފަސް މެޗުގެ ތެރެއިން މޯހަން ބަގާން ތިން މެޗުން މޮޅުވިއިރު، މާޒިޔާ ދެ މެޗު ކާމިޔާބުކުރި އެވެ. އަނެއް މެޗު ނިމުނީ އެއްވަރުވެގެންނެވެ.
މޯހަން ބަގާންގެ ކޯޗު ޖުއާން ފެރާންޑޯ ވެސް ވަނީ މާޒިޔާ އިން ވިސްނުންތެރިކަމާ އެކު ކުޅުނުކަން ފާހަގަކޮށްފަ އެވެ. އަދި މެޗުގެ ނަތީޖާ އެ ޓީމު ކޮޅަށް އެނބުރުމުގައި ޓީމުގައި ތިބި ވަކިވަކި ކުޅުންތެރިންގެ ހުނަރު ފެނިގެންދިޔަ ކަމަށް ޖުއާން ވަނީ ބުނެފަ އެވެ.
ރޭ މި ގްރޫޕްގެ އަނެއް މެޗުން ބަންގްލަދޭޝްގެ ބަޝުންދަރާ ކިންގްސް ވަނީ އިންޑިއާގެ އޮޑީޝާ އެފްސީ އަތުން 3-2 އިން މޮޅުވެފަ އެވެ.
ކޮންމެ ޓީމެއް ދެ މެޗު ކުޅެފައިވާއިރު، އެއް ވަނައިގައި މޯހަން ބަގާން އޮތީ ހަ ޕޮއިންޓާ އެކު އެވެ. ދެ ވަނައިގައި އޮތް މާޒިޔާ އާއި ތިން ވަނައިގައި އޮތް ބަޝުންދަރާ އަށް ތިން ޕޮއިންޓް ލިބިފައިވާއިރު، ފުލުގައި އޮތް އޮޑީޝާ އަށް އަދި ޕޮއިންޓެއް ނުލިބެ އެެވެ.
