ކޮވިޑް-19ގެ މެދުކެނޑުމަށް ފަހު، އޭއެފްސީ ކަޕް ފުޓްބޯޅަ މުބާރާތް އަލުން ހޯމް އެންޑް އަވޭ ފޯމެޓަށް ފަށަން ތައްޔާރުވެފައިވާއިރު، މިއީ އެންމެ އިންސާފުވެރި ފޯމެޓް ކަމަށް ބަންގްލަދޭޝްގެ ޗެމްޕިއަން، ބަޝުންދަރާ ކިންގްސްގެ ކޯޗު ސްޕެއިންގެ އޮސްކާ ބްރުޒޮން ބުނެފި އެވެ.
ފާއިތުވި ދެ ސީޒަނުގައި އޭއެފްސީ ކަޕްގެ ދެކުނު އޭޝިއާ އަށް ހާއްސަ ގްރޫޕްގެ މެޗުތައް ކުޅެފައިވަނީ ސެންޓްރަލައިޒްކޮށް އެއް ދަނޑެއްގަ އެވެ. އެ ގޮތުން 2021 ވަނަ އަހަރު މާލޭގައި ކުރިއަށްދިޔައިރު، މިދިޔަ އަހަރު ކުޅެފައިވަނީ އިންޑިއާގެ ކޮލްކަތާގަ އެވެ. އެ ދެ ފަހަރު ވެސް ބަޝުންދަރާ އަށް ގްރޫޕް ސްޓޭޖު ފަހަނައަޅައި ނުދެވުނީ ފަހު މެޗުގެ ނަތީޖާއާ ހެދި އެވެ. ބަޝުންދަރާ ފަހަތަށް ޖައްސާލުމަށް ފަހު، އެ ދެ އަހަރު ވެސް މި ގްރޫޕުން އަނެއް ބުރަށް ދިޔައީ އިންޑިއާގެ މޯހަން ބަގާން އެވެ.
ބަޝުންދަރާ އިން ވަނީ މި ފަހަރު، އޭޝިއާގެ ކްލަބް ފުޓްބޯޅައިގެ އެންމެ ބޮޑު މުބާރާތް، އޭއެފްސީ ޗެމްޕިއަންސް ލީގު ކޮލިފައިންގައި ކުޅެފަ އެވެ. އެ ގޮތުން، ޔޫއޭއީގެ ޝާރްޖާ އެފްސީ އަތުން ބަޝުންދަރާ 2-0 އިން ބަލިވުމުން އެ ޓީމު ކުޅެން ޖެހިފައިވަނީ އޭއެފްސީ ކަޕްގަ އެވެ.
އޭއެފްސީ ކަޕްގައި ބަޝުންދަރާ ކުޅޭ ފުރަތަމަ މެޗުގައި އަންގާރަ ދުވަހު ރާއްޖޭގެ ޗެމްޕިއަން، މާޒިޔާ ސްޕޯޓްސް އެންޑް ރެކްރިއޭޝަންއާ ކުޅޭއިރު، އެ ގްރޫޕްގައި ދެން ހިމެނެނީ އިންޑިއާގެ އޮޑީޝާ އާއި މޯހަން ބަގާން އެވެ.
ބަޝުންދަރާ ކިންގްސްގެ ޓީމު އެއާޕޯޓުގައި: މިއީ އެ ޓީމުން ގަލޮޅު ދަނޑުގައި މެޗެއް ކުޅޭނެ ދެ ވަނަ ފަހަރު.
އޭއެފްސީ ކަޕްގެ ކުރިން ބަންގްލަދޭޝް މީޑިއާގައި ވާހަކަ ދައްކަމުން އޮސްކާ ބުނީ މި ގްރޫޕަށް މި ވަގުތު ބަލާލިޔަސް ފެންނަން އޮތް ޓީމުތަކުގެ ތެރެއިން އެންމެ ވަރުގަދަ ޗެލެންޖަކަށް މި ފަހަރު ވެސް ވާނީ މޯހަން ބަގާން ކަމަށެެވެ.
މޯހަން ބަގާން ޓީމަކީ އިންޑިއާގެ އެންމެ ވަރުގަދަ ކްލަބް ކަމަށާއި ބަޝުންދަރާ އިން އެ ޗެލެންޖަށް މި ފަހަރު ކުރިއަށް ވުރެ ރަނގަޅަށް ތައްޔާރުވާނެ ކަމަށް އޮސްކާ ގަބޫލުކުރެ އެވެ.
"މި ފަހަރު (އަނެއްކާ ވެސް) މި އޮތީ ހޯމް އެންޑް އަވޭ ފޯމެޓް، މިއީ، މި މުބާރާތް އެންމެ ފޯރިގަދަވާނެ އެއް ސަބަބު، އަހަރެން އަބަދުވެސް ބުނާ ވާހަކައެއް މިއީ، އެންމެ އިންސާފުވެރި ފޯމެޓަކީ ހޯމް އެންޑް އަވޭ އޭ، ކޮންމެ ޓީމަކަށް ވެސް ހަމަހަމަ ފުރުސަތެއް ލިބޭނެ،" 2018 ވަނަ އަހަރު ރާއްޖޭގެ ނިއު ރޭޑިއަންޓް ސްޕޯޓްސް ކްލަބް ގޮވައިގެން އޭއެފްސީ ކަޕްގައި ނުކުތް އޮސްކާ ބުންޏެެވެ.
ހޯމް އެންޑް އަވޭ ފޯމެޓަށް ކުޅޭއިރު، އެންމެ ބޮޑު ހިތްހަމަޖެހުމެއްގެ ގޮތުގައި އޮސްކާ އަށް އޮތީ ފަހު ދެ މެޗު އެއް ވަގުތެއްގައި ކުޅޭއިރު، އަނެއް ބުރަށް ދާން ޓީމުތަކަށް ހަމަހަމަ ފުރުސަތެއް އޮތުމެވެ. މިދިޔަ އަހަރު، އޭއެފްސީ ކަޕް ސެންޓްރަލައިޒްކޮށް ކުޅުނުއިރު، ފަހު މެޗުގައި ބަޝުންދަރާ އަށް ކުޅެން ފުރުސަތު ރޭވިފައި ނެތުމުން އޮސްކާ އެކަމާ ކަންބޮޑުވުންފާޅުކުރީ، ވަކި ނަތީޖާއެއް ނެރެގެން އަނެއް ބުރަށް ދާން އެއް ޓީމަކަށް ފުރުސަތު ބޮޑުވާ ގޮތަށް އޮތުމުންނެވެ.
މިދިޔަ ސީޒަނުގައި ބަޝުންދަރާ ގްރޫޕް ސްޓޭޖުން ކެޓީ އެއް ވަނަ އަށް ދިޔަ މޯހަން ބަގާންއާ ޕޮއިންޓް އެއްވަރުވި ނަމަވެސް ފަހު މެޗުން މާޒިޔާ އަތުން މޯހަން ބަގާން އިން ބޮޑު މޮޅެއް ހޯދުމުންނެވެ.
ބަޝުންދަރާ އަށް ސިލްސިލާ ގޮތެއްގައި ބަންގްލަދޭޝްގެ ލީގު ތަށި ހޯދައިދިން އޮސްކާ ވަނީ ދާދި ފަހުން އެ ޓީމުގެ ކޮންޓްރެކްޓް އާ ކޮށްފަ އެވެ. ކޮންޓްރެކްޓްގެ މުއްދަތެއް އެ ޓީމުން ހާމަކޮށްފައިނުވި ނަމަވެސް ރިޕޯޓްތައް ބުނާގޮތުން އެ އެއްބަސްވުމުގެ ދިގުމިނަކީ އެއް އަހަރެވެ.
އޭއެފްސީ ކަޕްގެ ފުރަތަމަ މެޗަށް ބަޝުންދަރާ އިން މިއަދު މާލެ އަތުވެފައިވާއިރު، އެ ޓީމުން މިދިޔަ ދެ ސީޒަނުގައި ވެސް މާޒިޔާއާ ދެކޮޅަށް އޭއެފްސީ ކަޕްގައި ކުޅުނު މެޗުތަކުން ބަލިވެފައިނުވެ އެވެ. އެ ގޮތުން، 2021 ވަނަ އަހަރު މާލޭގައި ކުޅުނު މެޗުން ބަޝުންދަރާ އިން ވަނީ 2-0 އިން މާޒިޔާ ބަލިކޮށްފަ އެވެ. އަދި މިދިޔަ އަހަރު ކޮލްކަތާގައި ކުޅުނު މެޗުން ބަޝުންދަރާ މޮޅުވީ 1-0 އިންނެވެ.
