ބަންގްލަދޭޝްގެ ބަޝުންދަރާ ކިންގްސް އަށް ހަ އަހަރު ކޯޗުކަން ކޮށްދިނުމަށް ފަހު، ސްޕެއިނުގެ އޮސްކާ ބްރުޒޮން ބަރޭރާސް އެ ޓީމު ދޫކޮށްލައިފި އެވެ.
އޮސްކާ، 47 ، ބަޝުންދަރާ ކިންްގްސްއާ ހަވާލުވީ، 2018 ވަނަ އަހަރުގެ އޮގަސްޓް މަހުގަ އެވެ. އެއީ ރާއްޖޭގެ ނިއު ރޭޑިއަންޓް ސްޕޯޓްސް ކްލަބް ދޫކޮށްލުމަށް ފަހު އެވެ.
މިދިޔަަ ބުރާސްފަތި ދުވަހު، އޮސްކާ ވަނީ ފޭސްބުކްގައި ޖެހި ޕޯސްޓެއްގައި، ބަޝުންދަރާގެ ކޯޗުކަން ދޫކޮށްލަން ނިންމާފައިވާ ކަމަށް ހާމަކޮށްފަ އެވެ. ބަޝުންދަރާ އަށް ކޯޗުކޮށްދިން ހަ އަހަރު އެ ޓީމަށް ފަސް ފަހަރު، ބަންގްލަދޭޝްގެ ޕްރިމިއާ ލީގު ކާމިޔާބުކޮށްދިން އޮސްކާ، އެ ޓީމާ އެކު ހަދާފައިވާ ކޮންޓްރެކްޓް ނިމުމަކަށް ގެނައީ، އެ ކްލަބްގެ މެނޭޖްމަންޓާ މަޝްވަރާ ކުރުމަށް ފަހު އެވެ.
އޮސްކާގެ ކޯޗުކަމުގައި ބަޝުންދަރާ އިން 11 ތަށި ހޯދިއިރު، އެ ޓީމު ވަނީ އެއް ސީޒަނުގައި އޭއެފްސީ ޗެމްޕިއަންސް ލީގުގެ ޕްލޭއޮފަށް ވެސް ކޮލިފައިވެފަ އެވެ. އަދި ގަވާއިދުން އޭއެފްސީ ކަޕްގައި ވާދަކޮށް ތަފާތު ދައްކައި، ރަނގަޅު ނަތީޖާތަކެއް ނެރެފައިވެ އެވެ.
ބަޝުންދަރާގެ ކޯޗަކަށް އޮސްކާ ހުރިއިރު، އެ ކްލަބްގެ މެނޭޖްމަންޓާއި ބަންގްލަދޭޝްގެ ފުޓްބޯޅަ ފެޑެރޭޝަނުން އެދިގެން، 2021 ވަނަ އަހަރު މާލޭގައި ބޭއްވި ސާފް ޗެމްޕިއަންޝިޕްގައި ބަންގްލަދޭޝްގެ ގައުމީ ޓީމަށް ވެސް ކޯޗުކޮށްދިނީ އޮސްކާ އެވެ. ބަޝުންދަރާގައި ހުރެ، އޮސްކާ ވަނީ ގިނަ ފަހަރުތަކެއްގެ މަތިން ރާއްޖޭގެ ޓީމުތައް އަތުން ކާމިޔާބު ހޯދައިފަ އެވެ. އޮސްކާގެ ކޯޗުކަމުގައި، ބަޝުންދަރާ އިން ރާއްޖޭގެ ކްލަބްތަކާ (ނިއު ރޭޑިއަންޓް/ޓީސީ/ މާޒިޔާ) ކުޅުނު ހަ މެޗުގެ ތެރެއިން ފަސް މެޗުން ވަނީ މޮޅުވެފަ އެވެ. މާޒިޔާ އިން ވަނީ އޮސްކާ ހުއްޓައި، ބަޝުންދަރާ ބަލިކޮށްފަ އެވެ.
ދެކުނު އޭޝިއާގެ ތިން ގައުމެއްގައި އޮސްކާ ވަނީ ފުޓްބޯޅައިގެ ކާމިޔާބު މަސައްކަތްތަކެއް ކޮށްފަ އެެވެ.
އެ ގޮތުން، ސެލްޓާ ވިގޯގެ ޔޫތު ޓީމުގެ ކުރީގެ ކޯޗު، އެންމެ ފުރަތަމަ މަސައްކަތްކުރީ އިންޑިއާ ފުޓްބޯޅައިގަ އެެވެ. އެ ގޮތުން، 2012 ވަނަ އަހަރު ސްޕޯޓިން ގޯއާގައި މަސައްކަތްކުރި އޮސްކާ، ފަހުން މުމްބާއި ސިޓީ އާއި މުމްބާއި އެފްސީގައި ކޯޗުކޮށްދިނުމަށް ފަހު، 2017 ވަނަ އަހަރުގެ މެދު ތެރެއިން ރާއްޖޭގެ ނިއު ރޭޑިއަންޓާ ހަވާލުވި އެވެ.
އޮސްކާ ވަނީ ނިއު އަށް 2017 ވަނަ އަހަރުގެ ދިވެހި ޕްރިމިއާ ލީގާއި އެފްއޭ ކަޕާއި ޕްރެޒިޑެންޓްސް ކަޕް އަދި 2018 ވަނަ އަހަރުގެ މާލޭ ލީގު ކާމިޔާބުކޮށްދީފަ އެވެ. އަދި 2018 ވަނަ އަހަރުގެ އޭއެފްސީ ކަޕުގެ ގްރޫޕް ސްޓޭޖުގައި ރަނގަޅު ނަތީޖާތަކެއް ނެރުނެވެ. އަދި ފަހުން، ބަޝުންދަރާ އަށް ބަދަލުވީ އެވެ.
