މަޑަގަސްކަރާގައި މިހާރު ކުރިއަށްދާ އިންޑިއަން އޯޝަން އައިލެންޑް ގޭމްސް (އައިއޯއައިޖީ)ގެ ބެޑްމިންޓަން އިވެންޓުގެ ކުއާޓާ ފައިނަލުން ރާއްޖޭގެ ގިނަ ކުުޅުންތެރިންތަކެއް ފުރުސަތު ހޯދައިފި އެވެ.
މިއަދު އައިއޯއައިޖީގެ ބެޑްމިންޓަންގެ ކުއާޓާ ފައިނަލާއި ސެމީ ފައިނަލް މެޗުތައް ކުރިއަށްދާނެ އެވެ.
ރާއްޖޭގެ ފަސް ކުޅުންތެރިއަކު ސިންގަލްސް ކުއާޓާ ފައިނަލުގައި ކުޅޭއިރު، ރާއްޖޭގެ ހަ ޕެއާއެއް ޑަބަލްސްގެ އިވެންޓްތަކުގެ ކުއާޓާ ފައިނަލުގައި ވާދަކުރާނެ އެވެ.
އެ ގޮތުން، ސިންގަލްސް އަށް ބަލާއިރު، ފިރިހެން ސިންގަލްސް އިވެންޓްގައި ރާއްޖޭގެ އަހުމަދު ނިބާލް ކުޅޭނީ މޮރިޝަސްގެ ކެމްޓީޝް ނުންޑާއާ އެވެ. ރާއްޖޭގެ ޒަޔާން ޒަކީ ނުކުންނާނީ މޮރިޝަސްގެ ލޫކަސްއާ ދެކޮޅަށެެވެ. ރާއްޖޭގެ ފާތިމަތު ނަބާހާ (ނަބާ) ބައްދަލުކުރާނީ ސީޝެލްސްގެ އަލިސެން ކަމިލްއާ އެވެ. ރާއްޖޭގެ އައިޝަތު އަފްނާން ރަޝީދު ކުޅެން ޖެހޭނީ މޮރިޝަސްގެ ލޯނާއާ އެވެ. އަދި ރާއްޖޭގެ އައިމިނަތު ނަބީހާ ކުޅޭނީ މަޑަގަސްކަރާގެ ސޯނިއާނާ އެެވެ.
ޑަބަލްސް އަށް ބަލާއިރު، ފިރިހެން ޑަބަލްސްގައި ރާއްޖޭގެ ނިބާލް އާއި އަޖުފާން ރަޝީދުގެ ޕެއާ ބައްދަލުކުރަން ޖެހޭނީ މޮރިޝަސްގެ މެލްވިން އާއި ތޭޖްރާޖްގެ ޕެއާއާ އެވެ. އަންހެން ޑަބަލްސްގައި ނަބީހާ އާއި ނަބާހާގެ ޕެއާ ވާދަކުރާނީ ސީޝެލްސްގެ ޖެސީ އާއި ސޭޖަލްގެ ޕެއާއާ އެވެ. އަންހެން ޑަބަލްސްގައި އަފްނާން އާއި އައިޝަތު ޝަހުރުނާޒް މޫސާގެ ޕެއާ ވާދަކުރާނީ ރީޔޫނިއަންގެ މެރީނާ ބިއެލް އާއި ލީ ހޯ ޗާއިގެ ޕެއާއާ އެވެ.
މިކްސް ޑަބަލްސް ކުއާޓާގައި ނިބާލް އާއި ނަބީހާގެ ޕެއާ ވާދަކުރާނީ ރީޔޫނިއަންގެ ޒަވިއޭ ޗޭން އާއި ލީ ހޯ ޗާއިގެ ޕެއާއާ އެވެ. ރާއްޖޭގެ އެއް ވަނަ މިކްސް ޑަބަލްސް ޕެއާ، ޒަޔާން އާއި ނަބާހާގެ ޕެއާ ކުޅެން ޖެހޭނީ މަޑަގަސްކަރާގެ ރަޒާފީމަންޑިމްބީ އާއި ރަޒާފީމަމޮންޖެރިސަންގެ ޕެއާއާ އެެވެ.
ކުއާޓާ ފައިނަލް މެޗުތައް ރާއްޖެ ގަޑިން 11 ޖަހާއިރު ފަށާނެ އެވެ. އަދި ސެމީ ފައިނަލް މެޗުތައް ކުޅޭނީ ރާއްޖެ ގަޑިން އިރުއޮއްސި ހައެއް ޖަހާއިރު އެވެ. އަދި ފައިނަލް ކުޅެން ހަމަޖެހިފައިވަނީ މާދަމާ އެެވެ.
