މުމްބާއީ (މެއި 5) - އިންޑިއާގެ ބާސްކެޓްބޯޅަ އެސޯސިއޭޝަންގެ އިންތިހާބު ބޭއްވުން ލަސްވެ، ގައުމީ ފެންވަރުގެ މުބާރާތްތައް މަޑުޖެހިއްޖެ އެވެ.
އިންޑިއާގެ ބާސްކެޓްބޯޅަ އެސޯސިއޭޝަންގެ 2023-2027 ގެ އެސްކޯ ހޮވުމަށް ބާއްވާ އިންތިހާބު ބާއްވަން އޮތީ ފެބްރުއަރީ މަހުގަ އެވެ. އެހެން ނަމަވެސް، ފެބްރުއަރީ 18 ގައި ބާއްވަން އޮތް އިންތިހާބު ބޭއްވޭ ގޮތް ނުވެ ގަނޫނީ ގޮތުން މި ވަގުތު އެ އެސޯސިއޭޝަން އޮތީ ހުސްކަމެއްގެ ތެރޭގަ އެވެ.
މި ދަނޑިވަޅުގައި އިންޑިއާގެ ކޯޓުން ވަނީ އާ އިންތިހާބު ބޭއްވުމަށް ނޯމަލައިޒޭޝަން ކޮމިޓީއަކާ ހަވާލުކޮށްފަ އެވެ. މި މަހު ދެ ވަަނަ ދުވަހު، ކޯޓުން ނެރުނު އަމުރުގައި އަންގާފައިވަނީ އިންޑިއާގެ އޮލިމްޕިކް ކޮމިޓީ އާއި ސްޕޯޓްސް މިނިސްޓްރީ ހިމެނޭ ގޮތަށް ނޯމަލައިޒިން ކޮމިޓީގެ މަސައްކަތްތައް ސުޕަވައިޒް ކުރުމަށެވެ. އެ ގޮތުން، ކޮމިޓީގެ އިސް އެޑްމިނިސްޓްރޭޓަރަކަށް ހަމަޖައްސާފައިވަނީ ކަރްނަޓާކާގެ ކުރީގެ ޖަޖް، ކްރިޝްނާ ބަޓް އެވެ. ގާނޫނީ ގޮތުން އިންޑިއާ ބާސްކެޓްބޯޅަ ފެޑެރޭޝަން ހިންގުން އާ އިންތިބެއްގައި ހޮވޭ އާ ކޮމިޓީ އަކާ ހަވާލުވުމާ ހަމައަށް ހުރިހާ ކަމެއް ބެލެހެއްޓުން ވަނީ ނޯމަލައިޒިން ކޮމިޓީ/ އެޑްމިނިސްޓްރޭޓަރާ ހަވާލުކޮށްފަ އެވެ.
އިންޑިއާގެ ބާސްކެޓްބޯޅަ އެސޯސިއޭޝަންގެ އިންތިހާބު ނުބޭއްވި ދިގުލައިގެންދާ މި ދަނޑިވަޅުގައި އިންޑިއާގައި ބާއްވަން އޮތް ދުނިޔޭގެ ބާސްކެޓްބޯޅަ ފެޑެރޭޝާންގެ އޭޝިއާ ޖެނެރަލް އެސެމްބްލީ އެ ގައުމުގައި ނުބާއްވަން މިހާރު ވަނީ ނިންމައިފަ އެވެ.
މި މަހު އިންޑިއާގެ ބެންގަލޫރުގައި ބާއްވަން އޮތް އޭޝިއާ ސަރަހައްދުގެ ބޮޑު ބައްދަލުވުން މިހާރު ބާއްވަން ހަމަޖެހިފައިވަނީ މެލޭޝިއާގެ ކުއަލަމްޕޫރުގަ އެވެ.
ދެކުނު އޭޝިއާ ސަރަހައްދުގެ އެންމެ ވަރުގަދަ ބާސްކެޓްބޯޅަ އެސޯސިއޭޝަންގެ އިންތިހާބު ލަސްވަމުންދާތީ އެ ގައުމުގެ ސްޓޭޓް އެސޯސިއޭޝަންތަކުން އަންނަނީ ކަންބޮޑުވުން ފާޅުކުރަމުންނެވެ.
އާ އިންތިހާބު ބާއްވާނެ ތާރީޚު ކަނޑައަޅާފައި ނުވި ނަމަވެސް އިންތިހާބުގައި މި ފަހަރު ވެސް ރައީސް ކަމަށް ވާދަކުރާނެކަމަށް ބެލެވެނީ އެންމެ ފަހުން އެ މަގާމުގައި ހުރި ގޯވިންދަރާޖު އެވެ. މިދިޔަ ދެ ދައުރުގައި ވެސް އޭނާ ހުރީ ރައީސްކަމުގެ މަގާމުގަ އެވެ. ފަހު ފަހަރަށް އެ މަގާމު ފުރަން އޭނާ ތައްޔާރަށް ހުރި ނަމަވެސް އިންޑިއާގެ ދެކުނުގެ ގިނަ ސްޓޭޓްތަކުން ތިބީ އޭނާއާ ދެކޮޅަށްކަމަށް އިންޑިއާގެ މީޑިއާތަކުން ރިޕޯޓްކުރެ އެވެ.
އިންޑިއާގެ ބާސްކެޓްބޯޅަ އެސޯސިއޭޝަންގެ އިންތިހާބުގައި ރައީސްގެ މަގާމުގެ އިތުރުން ހަތް ނައިބު ރައީސުންނާއި، ޖެނެރަލް ސެކެޓްރީ، ފަސް ޖޮއިންޓް ސެކެޓްރީ ހާޒާންދާރު އަދި 11 އާންމު މެންބަރުން ހޮވާނެ އެވެ.
މި އިންތިހާބުގައި އިންޑިއާގެ 23 ސްޓޭޓް އެސޯސިއޭޝަނަކަށް ވޯޓު ލުމަށް ޝަރުތު ހަމަވެ އެވެ.
